LOS HECHOS 12:8-24

⁸Ʉmʉreco Pacʉ pʉto macʉ̃ pea o biro cʉ̃re ĩiupi ñucã: —Juti jãña, dʉpo juti jãña, tiiya —ĩiupi. Pedro pea cʉ̃ ca ĩirore biro tiiupi. Ʉmʉreco Pacʉ pʉto macʉ̃ pea o biro cʉ̃re ĩi nemoupi ñucã: —Jotoa mʉ ca jãñarito cãare jãña, yʉre nʉnʉ dooya —cʉ̃re ĩiupi.

⁹Pedro, Ʉmʉreco Pacʉ pʉto macʉ̃ to biro cʉ̃ ca tiirijere, “To biro yʉ biicu,” ĩi majiti pacagʉ, cʉ̃ jiro nʉnʉ witi waaupi. Quẽñaricaro ca biirore biro pee cʉ̃re biicãupe.

¹⁰Too witi waarã, ca nii jʉorã, ñucã jiro macãrã ca coterã uwamarãre ametʉa, come jope wiije watoa macã maare ca niiri jopere eaupa. Tii jope pea tee majuropeera pãacoaupe. Tii jopere witi, jĩcã caa wiijeri caare waa yapano eagʉra, Ʉmʉreco Pacʉ pʉto macʉ̃ pea ca niiro tʉjarora jĩcʉ̃ra cʉ̃re cũu, waa weocoaupi.

¹¹To cõropʉ Pedro pea tʉgoeña maji bojoca cati ea: —Mecʉ̃ docare díámacʉ̃ra, Herodes, to biri judíos, ñañarije yʉre cʉ̃ja ca tiirʉgarijere yʉre ametʉenerʉgʉ cʉ̃ pʉto macʉ̃re tiicojojapi Ʉmʉreco Pacʉ —ĩiupi Pedro.

¹²Teere ĩa maji, Juan Marcos cʉ̃ja ca ĩigʉ paco María yaa wii, paʉ bojoca nea poocãri cʉ̃ja ca juu bue niiri wii pee waacoaupi.

¹³Tii wiipʉ eagʉ, wiijeri caa pee ca niiri jope pee eari, jʉoupi. Cʉ̃ ca jʉoro tʉori, jĩcõ wãmo Rode ca wãme cʉtigo, ĩago witi waaupo.

¹⁴Cõ pea, Pedro cʉ̃ ca wederijere tʉo majiri, bʉaro ʉjea niima ĩigo jope pãatigora, “Jope niimi Pedro,” cʉ̃jare ĩigo waago toopʉra ũmaacã jãa waaupo. To biro cõ ca ĩiro, cʉ̃ja pea:

¹⁵—Mecʉ̃go mʉ ĩi —cõre boca ĩicãupa. Cõ pea: —Yee méé yʉ ĩi. Cʉ̃ra niijãwi —cʉ̃jare ĩimiupo. Cʉ̃ja pea ñucã: —Cʉ̃ méé niicumi. Cʉ̃ yʉʉ cʉ̃re coteri majʉ niicumi —cõre ĩiupa.

¹⁶To biro cʉ̃ja ca ĩi niiro ʉno, Pedro pea jope peera jʉogʉ tiiupi. To biro cʉ̃ ca ĩiro tʉo, cʉ̃re jope pãama ĩirã, ĩa ʉcʉacoaupa.

¹⁷Cʉ̃ pea wedeticãña ĩigʉ, cʉ̃ amori mena tii cõoña, tia cũurica wiipʉ ca niigʉre Wiogʉ cʉ̃re cʉ̃ ca ami wieneriquere cʉ̃jare wede, ñucã “Santiagore, to biri Jesucristore ca tʉo nʉnʉjeerã cãare, atere cʉ̃jare wedeya,” ĩiupi. Teere cʉ̃jare ĩi yapano witi, aperopʉ waacoaupi Pedro.

¹⁸Boeri tabe ca niiro uwamarã, Pedrore ca cotericarã pea Pedro cʉ̃ ca biiriquere majitima ĩirã, no ca boorora ameri ĩi mecʉ̃cãupa.

¹⁹Herodes pea jãiña ama dotiñami Pedrore bʉatima ĩigʉ, cʉ̃re ca cotemiricarãrena tee jʉori cʉ̃jare jĩa batecã dotiupi. Ate jiro Herodes, Judea yepa ca niiricʉ waari, Cesarea pee niigʉ waacoaupi.

²⁰Herodes, Tiro, Sidón macãri macãrã mena bʉaro ajiaupi. To biri cʉ̃ja pea cʉ̃ pʉtopʉ cʉ̃ja ca waapere ameri wede peni, “O biro mani biijaco” ameri ĩi, cʉ̃re ĩarã waaupa. Wiogʉ Herodes're pade nemori majʉ Blastore, “Jãare mʉ ĩi nemowa,” cʉ̃re ĩi, cʉ̃ jʉoripʉ wiogʉ Herodes're, “Añuro mani niijaco” cʉ̃re ĩi jãiupa, cʉ̃ ca doti niiri yepa maquẽ baariquere ca baa niirã niiri.

²¹To biri Herodes: —Tii rʉmʉ ca niiro, cʉ̃ja mena yʉ wede penirucu —cʉ̃ ca ĩirica rʉmʉre, cʉ̃ wiogʉ jutire jãñacãri, cʉ̃ ca doti duwiri cũmuropʉ ea nuu ea, bojocare wedeupi.

²²To cõrora, bojoca pea o biro ĩi acaro buiupa: —¡Ano ca wedegʉa bojocʉ méé niimi. Jʉ̃guẽ niimi! —ĩiupa.

²³To biro cʉ̃re cʉ̃ja ca ĩi nʉcʉ̃ bʉori nimarora, Ʉmʉreco Pacʉ yʉʉ, cʉ̃re queti wede bojari majʉ pea cʉ̃ ca dia ñaaro cʉ̃re tiicãupi, Ʉmʉreco Pacʉre cʉ̃ ca ĩi nʉcʉ̃ bʉotirije jʉori. To biri becoa baa eco biicã yai waaupi.

²⁴Ʉmʉreco Pacʉ yee queti pea õo jañuri bate nʉcã nʉnʉa waa, niipetiri taberipʉ wede bato nʉnʉa waarique nii, biiupa.