Text copied!
CopyCompare
Tti jian joajné Jesucristo - LOS HECHOS - LOS HECHOS 12

LOS HECHOS 12:6-25

Help us?
Click on verse(s) to share them!
6Ttie mé co ndoexin Herodes rrogantsjexin Pedro de ngain cárcel para rrojinchejuzguehe, co ttie mé Pedro tajijoa ngagué yó xisoldado co tajic̈hiaxin yó cadena co icanxin xisoldado tenda xa cárcel ndojaxin.
7Co rato mé joí ná angél Dios co ngoixin ngaxinhi cárcel anto vingasán ẍohi. Angel mé catte nttachén Pedro co joinchexingamehe co ndache Pedro: ―Dingattjen jaicoa. Cottimeja cadena tti jic̈hiaxin rá Pedro vinttji cadena ngataha nontte.
8Co ángel mé ndache: ―Nchenttedo cinturoan co tjanga cattea. Co are Pedro joinchehe cain yá, ángel mé ndac̈ho ngain: ―Daritsí noẍá co chjin na.
9Co Pedro rroé ángel co sacjoi, masqui noeha andoa ni nahi tti jitsjehe. ẍaxaon ixin jitsjehe inchin are toxinxin ni.
10Pero vatto na tti te xisoldado saho co xisoldado yoxin, co are joiji na ngain puerta chia que jixin nongaxin nttiha, xiré puerta jeho puerta. Co vac̈hje na, co cjoi na inchin ná esquina. Cottimeja ángel cointtohe jeho Pedro.
11Cottimeja Pedro coinxin co ndac̈ho: ―Janché onona ixin Jesús, tti chonda cain joachaxin, rroanha ná ángel co vantsjexin na de ngá rá Herodes co de ngain cainxin tti rrojinchena chojni judío.
12Co are Pedro ẍa jiẍaxaon de ixin cain yá, sacjoi nchiandoha María, janné Juan que cai vinhi Marcos. Co nttiha anto tsje chojni tenchetsenhe na ñao Dios.
13Co are Pedro vinga puerta, vac̈hje ná xannc̈hí vinhi Rode para joitsjehe xan quensen joí.
14Co are coinhi xan tté Pedro, anto ché xan co ẍa conxireha xan puerta. Sacjan xan ttinga xan joiquetonha xan ngaxinhi ixin Pedro ngain puerta tají.
15Cottimeja ndac̈ho cainxin na: ―¡Ndadixenga jaha! Co jehe xan anto ndac̈ho xan ixin ndoa. Pero masqui jamé, jehe na ndac̈ho na: ―Jeha jehe Pedro. Yá tti ángel que jinda Pedro.
16Co ngoi rato mé ndoja Pedro ẍa jidinga puerta. Co are conxiré na puerta co vicon na Pedro, cainxin na ẍaon na.
17Pero jehe joinchehe seña conixin rá para que jehe na tencoa na co coequinhi na queẍén Jesús vantsjexin de ngaxinhi cárcel co ndache na: ―Ttequinhi ra cain yá Jacobo co ni icha que ditticaon Jesús. Cottimeja vac̈hje co sacjoi ojé lugar.
18Co are vingasán xisoldado anto ẍaon xa ixin noeha xa quehe conhe conixin Pedro.
19Herodes coetonha joicjé na pero c̈hoha vittja na. Cottimeja Herodes joanchianguihi xisoldado ixin queẍén Pedro sacjoi, co coetonha nagoenxon na cainxin xisoldado mé. Cottimeja Herodes sacjoixin de nonttehe Judea co sacjoi ngain ciudad de Cesarea. Co nttiha vehe tsje nchanho.
20Icha saho Herodes vaganjo tti vane chojni ciudad de Tiro co Sidón. Cottimeja Herodes coñao ngain chojni mé. Co jehe na cjoao chó na ixin joitsjehe na Herodes. Co jehe na joincheconvensé na Blasto, ná xinchehe ẍé Herodes que chonda xa tsje joachaxin, ixin ndache xa Herodes ixin itsoñaoha ngain cayoi ciudad mé.
21Co Herodes coín ná nchanho para ixin coinhi tti ndac̈ho na. Co nchanho mé vengá lonttoe rey co tavetaha nttaxintaoen tti dehe are ttetonha, co coexinhi nichja ngain cain chojni.
22Cottimeja cainxin chojni coexinhi coyao na co ndac̈ho na: ―¡Jeha ná xí tti jinichja! ¡Jihi ná dios!
23Co rato mé ná angél Jesús, tti chonda cain joachaxin, joinchehe que tse ná chin co joxon cotsindo coexinhi joine cuerpoe hasta ndavenhe jehe Herodes. Jañá conhe Herodes ixin joinao que chojni joincheguinhi na dios jehe.
24Pero icha co icha tsje chojni coinhi joajné Dios co jamé icha co icha tsje lugar chojni vitticaon na Jesús.
25Co are Bernabé co Saulo joexin joinchehe na ẍé na, cjanxin na de ngain ciudad de Jerusalén co joicao na Juan que vinhi Marcos cai.

Read LOS HECHOS 12LOS HECHOS 12
Compare LOS HECHOS 12:6-25LOS HECHOS 12:6-25