LOS HECHOS 12:3-17

³Suꞌwe ꞌa tiꞌ neꞌ judío xaꞌan chaꞌ yjwi ree ꞌin Santiago, kanꞌ chaꞌ loꞌo Tyu msñi ree bra kanꞌ. Kwiꞌ tsan taꞌa ꞌin neꞌ judío msñi ree ꞌin yu, taꞌa nu nchku neꞌ jaxlya nu ja loꞌo skwan tiyeꞌ ndyaꞌ.

⁴Msñi neꞌ ꞌin Tyu, msuꞌwa neꞌ ꞌin yu niꞌ ñaꞌan chkwan bra kanꞌ. Kanꞌ nganun jakwa ta sndaru kwan ꞌin yu, jakwa sndaru nsuꞌwi ska ta; nduun neꞌ kwan tunaꞌan chkwan seꞌen nsuꞌwi Tyu. Xa nu tyii tsan taꞌa pascua, bra kanꞌ tyoꞌ tiꞌin nchga nten kichen tloo yu, ngwa tiꞌ ree kanꞌ, bra nu kuꞌni biyaꞌ yu ꞌin Tyu.

⁵Kanꞌ chaꞌ mdiꞌin chaꞌ suꞌwe ti tyiꞌin sndaru kwan ꞌin yu bra nu nsuꞌwi yu niꞌ ñaꞌan chkwan. Laja bra kanꞌ lye ꞌa ykwiꞌ taꞌa nten ꞌin Jesucristo loꞌo Ndiose chaꞌ kulaa Ni ꞌin Tyu.

⁶La xka tsan wa kulo ti Herodes ꞌin Tyu chaꞌ ka biyaꞌ ꞌin yu seꞌen nduun neꞌ kichen kanꞌ. Wa mskanꞌ neꞌ ꞌin Tyu loꞌo tukwa karenan, ska karenan ndukwi yaꞌ ska sndaru. Kwiꞌ ngwañaꞌan, nduun xka sndaru kwan tunaꞌan chkwan nde chunꞌ naꞌan kanꞌ. Xa wa tla ngwiꞌya sla Tyu.

⁷Laja nu lajaꞌ yu, mdoꞌo tukwa ska angajle yten seꞌen ysu yu. Suꞌwe ꞌa ñaꞌan xaa msti niꞌ ñaꞌan chkwan bra kanꞌ. Mxkwi angajle kanꞌ ꞌin Tyu, ykwiꞌ loꞌo yu bra kanꞌ: ―Tyituun lyaa ―ndukwin angajle kanꞌ ꞌin yu. Bra ti ngatiꞌ karenan chkwan nu nchkanꞌ yaꞌ yu.

⁸Xiyaꞌ ykwiꞌ angajle loꞌo yu bra kanꞌ: ―Skaanꞌ siiꞌ ―ndukwin―. Suꞌwaa snaan kiyaaꞌ. Xa wa yꞌni Tyu ngwañaꞌan, ykwiꞌ angajle loꞌo yu xiyaꞌ: ―Kuxiin teꞌ kichanꞌ chuunꞌ. Bra ti tyoꞌo ñaꞌaan ꞌñaǎn ―ngwañaꞌan ykwiꞌ angajle kanꞌ loꞌo yu.

⁹Loꞌo mdoꞌo ñaꞌan Tyu ꞌin angajle bra kanꞌ, ja mgii tiꞌ yu si chañi chaꞌ wa mdiyan angajle seꞌen ysu yu nu ngwa tsan ti; mskeꞌ tiꞌ yu chaꞌ nu ykwiꞌ sla ti yu.

¹⁰Mdijin neꞌ seꞌen nduun sndaru kwan tunaꞌan chkwan, loꞌo mdijin neꞌ seꞌen ndiꞌin xka ta sndaru kwan. Mdiyan neꞌ tunaꞌan chkwan tlyu bra kanꞌ, xkwiꞌ chkwan lka tunaꞌan kanꞌ. Loꞌo ngalaa tunaꞌan kanꞌ, ti ykwiꞌ ran; ngwañaꞌan ngwa chaꞌ mdoꞌo neꞌ tuꞌwa tuwiin ndyaa lo kichen. Mdoꞌo angajle kanꞌ ndyaa bra kanꞌ, xka ti Tyu nganun tuꞌwa tuwiin kanꞌ.

¹¹Bra kanꞌ ngwa biyaꞌ tiꞌ yu: ―Loꞌo ni, nchka biyaꞌ tiǎnꞌ chaꞌ wa ngulo Xꞌnaan tñan ꞌin angajle kanꞌ ꞌin Ni, chaꞌ mdiyan angajle ngulo ꞌñaǎn niꞌ ñaꞌan chkwan kwa ―ndukwin yu―. Ngwa tiꞌ Herodes ta yu nu tiꞌí ꞌñaǎn, chaꞌ xaꞌan ꞌa nka tiye neꞌ judío kanꞌ ñaꞌan neꞌ ꞌñaǎn; loꞌo ja ngwa ꞌin neꞌ kuꞌni neꞌ tñan kuxi kanꞌ.

¹²Kaꞌan ꞌa chaꞌ mdaꞌan tiye Tyu seꞌen mduun yu tuꞌwa tuwiin. Bra nu ngwa biyaꞌ tiꞌ yu chaꞌ kanꞌ, ndyaa yu seꞌen ndiꞌin Liya jyaꞌan Xuwa Marku bra kanꞌ. Niꞌ ñaꞌan kanꞌ ndyoꞌ tiꞌin tyun nten ꞌin Jesús, nchkwiꞌ neꞌ loꞌo Ndiose.

¹³Wa mchkunꞌ tunaꞌan kanꞌ, kanꞌ chaꞌ ndyaa ska nu kunaꞌan kuneꞌ nu naan Rode, ndyaa naꞌan chinꞌ tunaꞌan bra kanꞌ. Nduun ti nu kunaꞌan kanꞌ tunaꞌan nde niꞌ ñaꞌan ti.

¹⁴Bra ti yuꞌwi lyo nu kunaꞌan kanꞌ tyiꞌi Tyu bra nu ykwiꞌ yu loꞌo. Loꞌo suꞌwe ꞌa ngwa tiye nu kunaꞌan bra kanꞌ, msnan ndyaa ytsaꞌ ꞌin taꞌa ndiꞌin niꞌ ñaꞌan kanꞌ. Loꞌo ñaꞌan ti nduun Tyu chunꞌ naꞌan chaꞌ ja ya slaa neꞌ tunaꞌan.

¹⁵―¡Wa mnaꞌ chaꞌ tiya ꞌiin! ―ndukwin neꞌ ꞌin Rode bra kanꞌ. Lye la ykwiꞌ nu kunaꞌan kanꞌ loꞌo neꞌ bra kanꞌ, chaꞌ chañi chaꞌ Tyu lka nu nduun chunꞌ naꞌan kanꞌ. ―Siꞌi ―ndukwin neꞌ bra kanꞌ―. Kwiꞌ angajle nu ñaꞌansiin ꞌin Tyu lka nu kwa ―ndukwin neꞌ ꞌin nu kunaꞌan kanꞌ.

¹⁶Loꞌo ñaꞌan ti mduun Tyu chunꞌ naꞌan mjiꞌin ndukunꞌ yu tunaꞌan. Kanꞌ ndyaa neꞌ mslaa neꞌ tunaꞌan. Bra nu naꞌan neꞌ chaꞌ kwiꞌ Tyu lka, nduwe ꞌa tiꞌ neꞌ chaꞌ ngulaa yu.

¹⁷Yꞌni yaꞌ yu ꞌin neꞌ bra kanꞌ, chaꞌ tiin ti tyuun neꞌ. Ytsaꞌ yu ꞌin neꞌ sa ñaꞌan ngwa chaꞌ ngulo Xꞌnaan Ndiose ꞌin yu niꞌ ñaꞌan chkwan bra kanꞌ. ―Chkwiꞌ wan loꞌo Santiago loꞌo nchga neꞌ taꞌa ndaꞌaan ―ndukwin Tyu ꞌin neꞌ―, katsaꞌ wan ꞌin neꞌ ni ñaꞌan tñan yꞌni Ndiose loꞌoǔn chaꞌ ngulo Ni ꞌñaǎn niꞌ ñaꞌan chkwan. Mdoꞌo yu ndyaa yu xka seꞌen bra kanꞌ.