Loma: 8:5-27

⁵Wanda꞉hali epi amedama꞉ ika꞉ lokena꞉ hone pa꞉la꞉ ekimanu pea꞉tiki pimika꞉na꞉ta꞉ kota꞉ ika꞉ hone witeleme ekita꞉ mo ekima꞉ kone handeteke hatiki pilieke. Wanda꞉hali epi amedama꞉ hande Sipitidima꞉ walo hala꞉eki pea꞉tiki pimika꞉na꞉ta꞉ kota꞉ ika꞉ hone witeleme ekita꞉ ipikana꞉ma꞉ handeteke hatiki pilieke.

⁶Ika꞉ hone witeleme ekita꞉ ika꞉ lokena꞉ hone pa꞉la꞉eki manuma꞉ handeteke hatiki pia꞉ka꞉na꞉ta꞉ kota꞉ homa꞉la꞉eki milimikie. Kutu pulu pelemepate ika꞉ hone witeleme ekita꞉ hande Sipitidima꞉ handeteke hatiki pia꞉ka꞉na꞉ta꞉ kota꞉ Koda꞉ma꞉ ika꞉ puki lopa꞉niawao iki da꞉taalieke.

⁷Koto ekina꞉ hali epita꞉ ipika꞉ lokena꞉ hone pa꞉la꞉eki manuma꞉ ipika꞉ hone wita꞉la꞉eki handeteke hatiki pia꞉ka꞉na꞉ta꞉ kota꞉ ipikita꞉ Koda꞉na꞉ a꞉nda꞉ tunkuliki hali halieke. Ipikana꞉ma꞉ta꞉ Koda꞉na꞉ Lo Pimanu na opu hala꞉ ekima꞉ pita꞉la꞉pate ipikana꞉ma꞉ ota꞉ opua꞉peke na ya꞉la꞉me.

⁸Wanda꞉hali epi amedama꞉ ika꞉ lokena꞉ hone pa꞉la꞉ ekimanu pea꞉tiki pu hata꞉ Koda꞉na꞉ hone pa꞉la꞉ haumanu pea꞉pa꞉peke na yelieke.

⁹Kutupu halemepate ika꞉ lokena꞉ hone pa꞉la꞉eki manuma꞉ iki na handeteke hatiki pita꞉la꞉pateta꞉ Koda꞉ ipika꞉ Sipitidita꞉ iki tukiki pa꞉ta꞉ ota꞉ pitia꞉ka꞉na꞉ta꞉ kota꞉ hande Sipitidima꞉ walo hala꞉eki pea꞉tiki pu halememe. Hali ma꞉nda꞉ pa꞉ta꞉ Ketiso ipika꞉ Sipitidi na pitia꞉ka꞉na꞉ta꞉ kota꞉ ipikita꞉ Ketisona꞉eki dia꞉me.

¹⁰Koto pa꞉la꞉pate Ketiso iki tukiki pa꞉ta꞉ pitia꞉ka꞉na꞉ta꞉ kota꞉ hande Sipitidima꞉ iki mea da꞉taalieke. Hoke hauma꞉ta꞉ ika꞉ loke lia homaalo pa꞉la꞉pate hande Sipitidima꞉ iki mea da꞉taalieke. Ketisoma꞉ iki pa꞉ta꞉ koto hau peaeya꞉ka꞉na꞉ta꞉ ikita꞉ Koda꞉ yaapo tikitiki yao hamina꞉ la꞉la꞉ ekina꞉ peaalieke.

¹¹Hande Yesu homeekepate kone paa mea tiaeyeke Koda꞉ ipika꞉ Sipitidi iki tukiki pa꞉ta꞉ pitia꞉ka꞉na꞉ta꞉ kota꞉ hande Ketiso homeekepate kone paa mea tiaeyeke Koda꞉ma꞉ta꞉ iki tukiki pa꞉ta꞉ pitaala꞉ ipika꞉ Sipitidima꞉ kone ika꞉ homolo peleme lokemanu mea da꞉taalieke.

¹²Ya kame tonuo. Koto ekina꞉ nikana꞉ma꞉ yano ale hala꞉pa꞉peke ya꞉la꞉me. Nika꞉ hande lokena꞉ hone pa꞉la꞉ ekimanu pea꞉tiki pulu poloma꞉ ekina꞉ na loa꞉me.

¹³Ikana꞉ma꞉ ika꞉ lokena꞉ hone pa꞉la꞉ ekimanu pea꞉tiki pu haemeka꞉na꞉ta꞉ ota꞉ homilimikie. Kutu pulu pelemepate Sipitidi ipika꞉ wele pita꞉la꞉ ekina꞉ ikana꞉ma꞉ ika꞉ lokema꞉ hoke hau piteleme ekimanu lu homaemeka꞉na꞉ta꞉ kota꞉ iki da꞉ta halimikie.

¹⁴Koda꞉na꞉ Sipitidima꞉ hatuku pula꞉ wanda꞉halita꞉ Koda꞉na꞉ weki wandiki halememe.

¹⁵Koda꞉ma꞉ iki ka꞉la꞉ Sipitidima꞉ta꞉ iki paala꞉ tiao pa hameke e pokaasa꞉ hali leke na hamina꞉ la꞉la꞉me. Dia꞉me. Koto hau na pita꞉la꞉me. Hande Sipitidima꞉ ikita꞉ Koda꞉ ipika꞉ wekiwandiki hamina꞉ la꞉la꞉me. Koto pa꞉la꞉ ekina꞉ Sipitidi ipika꞉ wele pita꞉la꞉ ekina꞉ nikana꞉ma꞉ Koda꞉ pa꞉ta꞉ wi alo alota꞉ Apa꞉o. Yaka Apa꞉o lo haloma꞉me.

¹⁶Koda꞉ ipika꞉ Sipitidima꞉ nika꞉ temoko yaapo ta꞉ma꞉ni pea hata꞉ nikita꞉ Koda꞉ ipika꞉ wekiwandiki haloma꞉eki peneme yao waluekema꞉ pa꞉la꞉me.

¹⁷Nikana꞉ma꞉ta꞉ ipika꞉ weki wandiki hata꞉ Koda꞉ma꞉ ipika꞉ wanda꞉hali epealuekema꞉ wina꞉ la꞉la꞉ ekimanu mulumeke. Kutupa Koda꞉ma꞉ Ketiso pa꞉ta꞉ haluekema꞉ wina꞉ la꞉la꞉ ekimanu make Ketiso ame̱le̱ mulumeke. Nikana꞉ma꞉ Ketiso ame̱le̱ tanda pa꞉la꞉ ekimanu muma꞉ka꞉na꞉ta꞉ kota꞉ ipika꞉ pa̱a̱ pa꞉la꞉eki make ipiki ame̱le̱ mandakena꞉ halumeke.

¹⁸I̱ma꞉ handolo ekita꞉ dupae. Wetepe mo hande kapu tieke handolo poloma꞉ ekima꞉ta꞉ ame do nikana꞉ma꞉ tanda tanda minoloma꞉ ekita꞉ ota꞉ ankulalieke.

¹⁹Koda꞉ma꞉ wepia wina꞉ la꞉la꞉ alemanu paeyaoma꞉ta꞉ Koda꞉ma꞉ ipika꞉ eiyeketiti halemeeki peneme yao walena꞉yeke ta꞉na꞉ma꞉ homa hata꞉ leke wia handeteke hao halememe.

²⁰Do wa꞉pa꞉la꞉ ale manuta꞉ pa ekimanu wina꞉ leekepate ipika꞉ kone na leke Koda꞉ma꞉ kone paeki wina꞉e laa pa꞉la꞉me. Kutu piekepate Koda꞉ma꞉ honema꞉ tumao hata꞉

²¹hande wa꞉pa꞉la꞉ ekimanu paeyao wetepe tandepena꞉ tonkaake nono pea ula꞉pate ipikana꞉ma꞉ ka꞉la꞉pa꞉ tapaaluekema꞉ hone wiekeme. Koda꞉ma꞉ ipika꞉ weki wandiki honkopu hao ota꞉ epeke tupa꞉ ka꞉la꞉pa꞉ tapaalo pa꞉la꞉ ekita꞉ mo hande wa꞉pa꞉la꞉ ekimanu make kotoeki kone mina꞉e hone wiekeme.

²²Amba꞉ titina꞉ putiki a꞉pa pa ame make mo hande wa꞉pa꞉la꞉ ekimanu paeya꞉ tapaoma꞉ta꞉ tanda minolo hata꞉ta꞉ hande weki hoki nala꞉ wanda꞉ leke kimi yanda꞉ yanda꞉ pitolo hata꞉ e̱ wi lo halememe.

²³Koto wa꞉pa꞉la꞉eki manuma꞉ homeke na alemepate niki make hande Koda꞉ma꞉ titina꞉ amba꞉la ka꞉la꞉ Sipitidi mea hata꞉ta꞉ nikana꞉ma꞉ make niki tukiki pa꞉ta꞉ keme lo haloma꞉me. Koda꞉ma꞉ niki ipika꞉ wekitonu hamono laata꞉ nika꞉ loke tieke paeyao ka꞉la꞉pa꞉ tapaowaena꞉yeke handeteke hao hata꞉ lo haloma꞉me.

²⁴Nikana꞉ma꞉ honema꞉ tumao hamono Koda꞉ma꞉ niki da꞉taala꞉me. Koto pa꞉la꞉pate nikana꞉ma꞉ nika꞉ honema꞉ tumao witoloma꞉eki ota꞉ yao puma꞉ka꞉na꞉ta꞉ kota꞉ nika꞉ honema꞉ tumaasoma꞉eki ta paeyaasoma꞉me. Hali homekema꞉ ipika꞉ kone ipika꞉ handa꞉la꞉eki honema꞉ tumaapeke na ya꞉la꞉me.

²⁵Koto pa꞉la꞉pate nikana꞉ma꞉ na handoloma꞉eki kone honema꞉ tumao haoma꞉ka꞉na꞉ta꞉ kota꞉ ota꞉ yaalo pa꞉la꞉eki puluekema꞉ eiei na leke yopu handeteke hao halumeke.

²⁶Koto tupa꞉ kone nikita꞉ damakopiki wanda꞉hali haloma꞉ ekina꞉ mo hande Sipitidima꞉ niki tamba꞉ mulu ipu hala꞉me. Nikana꞉ma꞉ta꞉ yeni pea꞉peke ekimanu na handoloma꞉ ekina꞉ mo hande Sipitidima꞉ta꞉ peneme yao pi lapeke na yalo hata꞉ kemema꞉ kemema꞉ pitolo kone Koda꞉ pa꞉ta꞉ nika꞉ yeni peao hala꞉me.

²⁷Kutupa mo hande Sipitidima꞉ Koda꞉na꞉ hone pa꞉la꞉ ekimanu handeteke haena꞉ laata꞉ ipika꞉ wanda꞉halina꞉ yeni manuta꞉ Koda꞉ pa꞉ta꞉ peao hala꞉me. Koto ekina꞉ Koda꞉ma꞉ wanda꞉halina꞉ puki pa꞉ta꞉manu handolo hata꞉ mo hande Sipitidima꞉ hone wita꞉la꞉eki hando hala꞉me.