Loma 3:12-26

¹²Gegewel Yabowaine ana en hi pek, inoke hi nogegi, nige etega wana ginol i wawaisi, nige etega.

¹³Baaba toto i tagilem gamwaniniliyaa bosowaina avaliyau ni lolil ge nihi aliga. Memeliya kakawi ana baaba i baubaunan, ge baaba toto i soguem hohopeliyaa i ola mwata lelamwina.

¹⁴Ba nuwamut ge pihigelgel ana baaba awaliya i kalaopopwi.

¹⁵Aeliya i mweyaha te nihi na gamagal nihi tagapaaligal,

¹⁶ebo ga nihi noek, yaka gamagalau nihi apapanak-agil ge nihi papalomwan-agil,

¹⁷mibubun ana minamina nige hi aatena.

¹⁸Yehoba ana lovakun nige i gagan elal.

¹⁹Baaba bolo ya i neem Logugui ana buki elana, ge ta atena hauna gun Logugui i baunan, he Yudiya kaiweliya to, heliya hi miminaa Logugui o gabulanaa. Inoke heliya ge gamagalau gegewel panayawiya hi minaa Yehoba wana yatala elana, ge nige etega bosowaina ni ba, “Nau nige no gegi i gagan.”

²⁰He nige tage gamagal logugui ni henapuan inoke Yehoba gamagal o ni awa sapusapu-an. Yaa logugui wana tuwalali te wala gegi ni pankitela.

²¹Inoke sauga ya Yehoba kamwasa iyaka i pamasal ge eliyana gamagalau ni awa sapusapu-agil, yaa nige logugui ana henapuan eliyana i oola. Kamwasa o Mosese wana Logugui ge palopitau iyaka hi wasaan.

²²Gamagalau wali abulilek Yeisu Keliso eliyana kaiwena te Yehoba i awa sapusapu-agil. He gamagalau gegewel bolo hi abulilek baliya to. Nige ana getoga i gagan Yudiya elal ge bolo nige Yudiya i oola elal,

²³kaiwena gamagalau gegewel iyaka hi gegi inoke waisi ana luvi toto Yehoba i nuwatuan kaiweliya ana bwaga i gan elal.

²⁴Inoke gegewel al Yehoba wana mulolu bwagabwaga elana i awa sapusapu-agil, kaiwena Keliso Yeisu i pwamola pasikaliliem gegi elana.

²⁵Yehoba Yeisu i teli gegi ana abayakiyakil gamagalau kaiweliya, bolo hi abulilek wana yaomal elana. Inoke bwagana valila Yehoba i palahikan ge gamagalau houhouwel wali gegi i nuwaehik ya, he Yeisu gamagalau o wali gegi ana abayakiyakil, inoke ta atena Yehoba wana ginol sauga houhouwena o i sapu ya.

²⁶I ola al, Yeisu iya gegi ana abayakiyakil, inoke ta atena Yehoba wana ginol sauga ya elana i sapu al, kaiwena Yehoba bosowaina ni logugui pasapu ge bosowaina al gamagal toto i abulilek Yeisu elana ni awa sapusapu-an.