Lokasu 1:38-80

³⁸Giyagni Mariya wane china, “Gitsrukaachi wayegrerno. Wane nixikolupa pixa chinyawakpotuko.” Wala yegi yiyatka Goyakalutowreru.

³⁹Walegognekaka tpalnamta Mariya. Kmagkatewaka tya. Teyakawamta. Gotechijne gajeru pokchi tya.

⁴⁰Sakariyapji tjiglokamta. Taluklo Gilisaweti.

⁴¹Wane tixatka. Wa Gilisaweti yijnaka galukletinitkalo wa Mariya, wa mturu tonanwaka gajeru ruptekapa. Wa Gilisaweti Giwekikaluru Kpashiri gwagajitanro potu gixachrotkani.

⁴²Tsru saple tixa. Wane china sapleta, “Giglenshinikanyegitkaluryi pixje suxonyegiya. Giglenshinikanyegitkaluru punanwaka gishpakyachripa.

⁴³¿Gi nixge gita wa tye giknogyapno, wa Nutsrukate ginro ginyegityawakno?

⁴⁴Gi rixanu neyijnako galukletiniyakawayi, wa mturu nonanwaka gajeru ruptekapa rumuwle chinanu.

⁴⁵Giglenshinikanyegitkaluro galixachro, gi rixanu poyagkakikolupa wa tunkakikolupirana, wa Gitsrukaachi ginkakjixyalo.”

⁴⁶Mariya wane china, Numalwutlu Gitsrukaachi nonshinikanuya.

⁴⁷Ga wa numuwyegitlu Goyakalu, Nognetkakjeru.

⁴⁸Gi rixanu mpogireto retyano wayegrerno. Xaniyakawa giglenshinikanyegitkalurno Wane chinannona pejnurune gimuweekakgognenatachinepa gapkatatachineshaklumnunanukapa.

⁴⁹Gi rixanu wa Kgiyaklewakleru tsrupirana kamruyegitno. Kpashiri giwakni.

⁵⁰Retwamonunanumtna pagwashlukaka gimuweekakgognenatachinmnunanuka wa pikjene.

⁵¹Muchkowamyota. Galixkotnachinewa rajiyna ga wa ginshinikanuyna kopalatna.

⁵²Pogirewatyawakna tsrukakalune ruknokya. Mpogirene tsrune rutaka.

⁵³Kiglerkakaya jinanu rixkakna nachichachine. Ga wa ponikolune maleshayalune yokanatna.

⁵⁴Rupxaklu wayegreru Gisrayili, gi rixanu rushiniklu retwamonrewle,

⁵⁵Chinyawakpotukna wutsrukatenni, Gawra ga wa giklopishane rushinityawakpotuko.

⁵⁶Mapa ksuru Gilisawetiyma wane twa Mariya. Wanepnute topji tsatokatnaka.

⁵⁷Ga wa Gilisaweti poyagkakatkalu togogne tushpakawgenetinripatka, rushpakatka toturu.

⁵⁸Yijnakotinitkana tumwastsitanune ga wa tomolene wa tsru getwamonre rixyalo Gitsrukaachi, rumuwatna walayma.

⁵⁹Wane rixatka. Yokgipgogne chininri runna wa sajruka gistakletyapatkaluna wa mturu. Ruru giwakmaka rutakluna, Sakariya.

⁶⁰Tugita runro. Wane china, “Gike. Seyni Gwa giwakatko.”

⁶¹Wane chinrona, “Gi satuna pumole wane tye giwaka giwakatletachri.”

⁶²Rutsejrigjeyegitluna ruru klu giwaka ralukyalu wale.

⁶³Ragjitlu pamta. Yonatlu. Wane china, “Gwanwa giwaka.” Pejnuruneko giglajita.

⁶⁴Waneklu Sakariya kotpuknamatka ga wa ginnu. Yanumatatka. Rumalwutlu Goyakalu.

⁶⁵Tsru piklu rixanna pejnuruneko rumwastsitanune. Ga wa psoluko Gotechijne gajeru kmagkatewaka pogiwatya pejnuruko tyepirankaka.

⁶⁶Pejnuruneko yijnakotachine gimretpiranatlu rajiyna. Wane chinna, “¿Gi gixachrini: xani tye mturu? Gi rixanu waleymalu Goyakalu.”

⁶⁷Ga wa Sakariyni ruru, Giwekikaluru Kpashiri gwagajitanru potu. Goyakalu tokanu reneklewata. Wane china:

⁶⁸Gimalwutkalurni Gitsrukaachi, Gisrayiline Goyakalute. Salwayegitna rayinerutene koshpakapna.

⁶⁹Wixa yegi rupgujewnakakyalu Gognetkaklewatachri potu, satu wayegrerni Tawniklopisha.

⁷⁰Reyinuwakleyakawa wane chinjetyawakpotuko pejnurunniko kpashirinni tokanchi geneklewatachinniya,

⁷¹Gognewatikalurupapirana, wkamnixjeneyegiya, ga wa pejnuruneko wayegixjeneyegiya.

⁷²Gi rixanu retwamonutna wutsrukatenni ga wa rushiniklu kpashiri tokanu rupiratanru.

⁷³Wutsrukatni Gawrani rupiratya Wale kawchinanu renekyapwu

⁷⁴Mpiikonepwu wushatkapko wkamnixjenyegiya, Wale yegi wkamrurewatinripa,

⁷⁵Kpashirinepwu, poyagkakachinepwu Goyakalu getanu psolgogneko wugogne.

⁷⁶Ga wa pixa, mturu, teno potu Gajeru tokanu geneklewatachri pchinko Gi rixanu Gitsrukaachi kosekachripyi palpokgapotyaplu.

⁷⁷Rayinerutene pumatkakanu gognewatikalurupirana kaspukmukochiretikolupna,

⁷⁸Woyakalute gishiniklewle ga wa retwamonrewle chinanu, Wa wale chinanu salwayegitwu pokamlatachri tengogne potu gishpakyachri.

⁷⁹Wane rixa pokamlatyegityapna mapshagwaka gwachine, ga wa gipnalchikle tuplanatachinena, wkosekikolupa, giglewanshinikanrugapo gayinripa.

⁸⁰Ga wa mturu tseruwna. Muchkowata Giwekikaluruya. Yineru mwiyawakanu rawanata walegognepotunanuko wa Gisrayiline yegi rupgujewnini.