Loekaas 21:11-35

¹¹Hia hoewa barka bhoeidol aai, akaal parie aur tjaaro bagal kharaab bemaarie phailie. Aur bhie bahoet ghabaraahat aur atjambho tjienha aasmaan me dekhaaiga.

¹²Ie sab tjiedj howe se pahiele manai toelogke pakarke partjaar ke ghar ke barkwan ke haath me saup deiga. Oesab toelogke djahal me band kar deiga, aur hamaar tjela bane ke biese me raadja aur laat log ke aage ledjaaiga.

¹³Tab toelog aapan bieswaas ke biese me gawaahie dei sakiehe.

¹⁴Bakie toelog agwe se sotj-phiekier na kariehe kaise apane ke batjaawe ke tjaahie.

¹⁵Ham to apane toelogke gjaan aur baat debe, tab doesman koetjh na bol paawe.

¹⁶Toelog bhie aapan maai-baap, bhaai, palwaar aur sanghatian dwaara doesman ke haath me saup dewal djaihe aur oesab toelog me se koi koi ke maar dhaariega.

¹⁷Sab koi toelogke djaran kariega hamare me bieswaas kare ke khaatien.

¹⁸Tabbo koi tor koetjh na kar paaiga.

¹⁹Aur djab toelog hiemmat na hariehe, tab toelog aapan djiewan batjaihe.

²⁰Djab toelog dekhiehe kie soerdjaatie ke djhoend Jeroesaalem ke ghere hai, tab djaan djaihe kie sahar ke barbaadie nagietj aai gail hai.

²¹Tab Joedea diehaat waalan ke pahaar ke or bhaage ke tjaahie. Aur dje sahar me hai, ohoeke hoewa se bhaage ke parie aur dje khet me hai, oke sahar me na djaaike tjaahie.

²²Oe dien Parmeswar sadja deiga djaise oe aapan sanesian se liekhwaais hai.

²³Djaun aurat log ke larka hoiga kie to doedh piaite rahiega, oesabke oeppar bahoet doekh pariega. Ie des ke oeppar barka moesiebat aaiga aur Parmeswar ie djaatie ke oeppar goessaail rahiega.

²⁴Oe dien dher manai talwaar se maar dhaaral djaaiga. Bhie doesar log pakaraaike aur har ek rakam des me ledjaawal djaaiga. Aur doesar des ke manai log Jeroesaalem me kara hoekoem se raadj tjalaaiga djab talak ohoesabke sadja na mieliega.”

²⁵Jiesoe bolies: „Oe tem me soeroedj, tjaan aur tarai me har ek rakam tjienha dekhaaiga. Aur doenia bhar ke manai log samoendar ke halfa ke aawaadj soenke dar ke maare kaape lagie.

²⁶Aasmaan ke sab saktie hieliega aur manai log ke bahoet dar samaaiga kie doenia par ka hoiga.

²⁷Tab sab koi iensaan ke Beta ke baadar par barka saktie aur biesaal maahaanta me aawat dekhiega.

²⁸Tab toelog halieje se tjhoetkaara paihe. Ohie se khara hoike oeppar takiehe.”

²⁹Jiesoe ek matlab ke kaahaanie bataawe lagal kie: „Adjier ke per aur sab doesar per ke khoeb thiek se takiehe.

³⁰Djab phoel dewe lagie, tab toelog djaan djaihe kie phal ke tem aaiga.

³¹Aisane djab toelog ie sab baat poera howat dekhiehe, tab samadjh djaihe kie dher dien na rahie gail hai kie Parmeswar raadj tjalaaiga.

³²Thiek se soen. Djaun manai ie sab tjiedj soeroe howat dekhiega, oesabke tem me hamaar sab baat poera hoiga.

³³Dhartie aur aasmaan miet djaaiga, bakie hamaar baat hardam khaatien rahiega.”

³⁴Oe bolies: „Batjaaike rahiehe kie toelog aapan dhiaan nauta, daaroe aur rodj ke kaar-baar me na lagaihe, nahie to oe dien toelogke khaat atjakke me aai.

³⁵Oe dien doenia bhar ke manai khaatien aaiga.