Loc Hechos 18:1-22

¹Afe meífodo Pablo Aténasmona oni Corinto jófuemo jáizaide.

²Dɨnomo dúcɨa meífomo Aquila mámecɨrede judío ímɨe baizájide. Afémɨe Ponto énɨe ímɨe. Afe Aquila aɨ Priscila. Afe íaillɨnoɨ cómoicana Itáliamona botádiaillɨnoɨ; romano caifóidɨllaɨma Claudio nana judíuaɨ Roma jófuemona oni íaɨoɨ oréina jira. Dɨnomo Pablo Aquila uáiduaide.

³Aquila ie aɨ dɨga jédacɨede ɨniroi tɨ́fuano bɨzáinicaife nitíaɨoɨ. Afe íaɨoɨ níllado úcube otíaɨoɨ. Pablo afe táɨjɨnana fɨbídɨmɨe. Ie jira Pablo afe íaillɨnoɨri fɨébicaide, dájena íaɨoɨ táɨjɨllena.

⁴Naga ocózinaillaruimo llófueriracomo Pablo llófuiaifɨrede. Afemona judíuaɨmona dáarie ɨ́ɨnotiaɨoɨ. Afe dájerize judíoñedɨmacɨmona ja ɨ́ɨnotiaɨoɨ.

⁵Jae Macedonia énɨemona Silas Timoteo dɨga dúcɨdiaillɨnoɨmo, Pablo ie bɨzáinillaɨ nilla fáɨcanocaillano, dama Juzíñamui ñúefue jino llóllena ɨere izire llocana uite. Judíuaɨna uáfodo daɨde: —Jesús omoɨ úiñogamɨe Cristo, —daɨde.

⁶Mei íadɨ judíuaɨ íena uáitaoidiaɨoɨ. Iemo fɨénide uaillaɨ nitádiaɨoɨ. Ie jira Pablo ie ɨnícuiro íaɨoɨmo faiánote. Afe faiánua daɨde: Iaɨoɨ ɨáɨre fɨnócafue ɨ́coɨnia afémɨe ɨ́coɨniañedeza, danɨ íaɨoɨ ɨ́coɨnia. Pablo íaɨoɨna daɨde: —Danɨ omoɨ ɨ́coɨnia tɨmáritɨomoɨ. Jae ómoɨri nɨ́fuenidɨmɨedɨcue. Biruímona judíoñedɨmacɨmo lluájitɨcue, —daɨde.

⁷Llófueriracomona jino jaillano, Justo maméidɨmɨe jofomo jaide. Justo Juzíñamuimo áɨnozillano caɨmare úritɨmɨe. Afémɨe jofo llófueriraco abɨmo ite.

⁸Afe llófueriraco illaɨma Crispo. Afémɨe naa ie comɨ́nɨri Ocuíraɨma Jesucrístomo ɨ́ɨnotiaɨoɨ. Afe llezica aillo Corinto jófuemo itɨno, Pablo lloga ñúefuiaɨna cacáillano áfemo ɨ́ɨnotiaɨoɨ. Ɨɨnuamona báutizagaiaɨoɨ.

⁹Afe mei Juzíñamui Páblona nɨcaɨ anado daɨde: —Jacɨ́ruiñeno iri. Mai ñúefue llɨ́ɨcaiñeno lloíri, mei o dɨga itɨ́cueza.

¹⁰Fɨénidɨfuena bu omo jíritanide. Naɨ bie jófuemo aillo cuemo ɨ́ɨnoitɨnona ite, —daɨde.

¹¹Iemona Pablo Coríntomo naɨ daa fɨmona átuedo Juzíñamui uaillaɨ comɨ́nɨmo llófullofuede.

¹²Mei íadɨ Galióna mámecɨredɨmɨe, Acaya énɨemo illáɨmana illáruido nana judíuaɨ Páblona uáitaoicana gaɨrídiaɨoɨ. Iemona íena lláɨtano, rɨ́imacɨ uiécomo uitíaɨoɨ.

¹³Illáɨmana daɨdíaɨoɨ: —Bímɨe comɨnɨ cɨ́gɨdo llófuericaide. Jɨáɨfodo Juzíñamuimo áɨnozillɨ uaillaɨ llófuecaide. Iemona afe uáillaɨmo cacáreidiaɨoɨ. Mei íadɨ afefue caɨmo ocuica uaillaɨ uáitaoicaide, —daɨdíaɨoɨ.

¹⁴Pablo como úrizaidemo, illaɨma Galión judíuaɨna daɨde: —¡Judíuaɨ, cue omoɨ áɨfedoñeno iri! Bímɨemo aillo fɨénidɨfue ɨ́coɨnia íadɨ, cómena fájafue izói, come merɨ́rinafue izói, ua afémɨe daɨí íadɨ ómoɨmo cacáreitɨcue.

¹⁵Mei íadɨ fia omoɨ uáillaɨdo, omoɨ mámecɨaɨdo júfidotɨomoɨ, ómoɨmo judíuaɨ ocuícafuiaɨ dɨga. ¡Mai danɨ jaɨ́cɨna omoɨ fɨnori! Aféfuiaɨmo izire jɨcánoraɨmana íacañedɨcue, —daɨde.

¹⁶Ie mei afémɨe nana íaɨoɨna jino jɨcánoracomona orede.

¹⁷Iemona nana griéguaɨ Sóstenes maméidɨmɨe llaɨtádiaɨoɨ. Sóstenes llófueriraco illaɨma. Iena lláɨtano, rɨ́illaɨma Galión uiécomo íena fáfadiaɨoɨ. Mei íadɨ Galión afe fɨnócafuiaɨna raa daɨíñede.

¹⁸Dɨno Coríntomo Pablo dɨga iruillaɨ ite. Ie jáiacanaruimo, ámatɨaɨ íiraɨcaiño íena facádonocaidiaɨoɨ. Afe mei Pablo nocaedo Siria énɨemo ruica jáizaide. Aquila ie aɨ Priscila dɨga Pábloɨri jáizaidiaɨoɨ. Naɨ Cencrea ígobemona naɨ jáiñediaɨoɨmo, Pablo ie ɨfo cuidode. Daɨí fɨnode, jae ie naui Juzíñamuimo llogáuai fuilla jira.

¹⁹Ruica jáillano jae Efeso jófuemo dúcɨdiaɨoɨ. Dɨnomo Pablo, Aquila Priscila dɨga fɨénocaillano, llófueriracomo jaide. Afénomo gaɨride judíuaɨmo Pablo úrizaide.

²⁰Afémacɨ ie íaɨoɨ dɨga are íllena izire jɨcádiaɨoɨ, mei íadɨ Pablo faɨríoñede.

²¹Iiraɨcaiño íaɨoɨna uáidonocaillano íaɨoɨna daɨde: —Ja Jerusalemo íacade ɨráɨzillafuemo raɨre jáiacadɨcue, mei íadɨ Juzíñamui óiacania dáanomo abɨdo ómoɨna éroizaɨbitɨcue, —daɨde. Iemona nocaedo Efésomona oni monáillaido jaide.

²²Cesarea jófuemo dúcɨillano, Pablo arɨdo Jerusalemo jaide, dɨnomo ite Juzíñamuimo gaɨrídɨno uáidollena. Afe mei oni Antioquíamo jaide.