Loc Hechos 12:3-18

³Afémɨe tɨtátari judíuaɨ ɨere ióbidiaɨoɨ. Aféfuena Herodes fɨdɨ́namona nane Pedro lláɨtajide. Ja birui ɨráɨzillaruillaɨ. Afe ɨráɨzillaruillaɨdo fáitañega pan güitíaɨoɨ.

⁴Pedro llaɨtada mei Herodes llavéracomo íena ɨ́baicuaide. Dɨnomo cuatro dɨ́gagüelli íena úiñotiaɨoɨ. Naga afe güéllimona cuatro dɨ́gamɨrie llaɨzɨ́riraɨnɨ ite. Herodes comecɨ facade pascua rafue meífodo Pédrona jino comɨ́nɨmo cɨ́otallena.

⁵Ie jira Pedro llavéracomo llaveda ñue úiñoga. Mei íadɨ Juzíñamuimo gaɨrídɨno íemo izire Juzíñamuimo jɨcáoidiaɨoɨ.

⁶Herodes Pedro jino comɨnɨ uiécomo óiacanarui uícodo, afe naɨo Pedro llavéracomo ɨnɨde ñue úiñoga. Nágafene onoɨ llóejina maɨga úiñoraɨma íaillɨnoɨ jaɨnáoigari ɨnɨde. Afe llezica jɨáɨe úiñoraɨma íaillɨnoɨ jino llavéraco naze úiñoide.

⁷Iemo Juzíñamui abɨ ímɨe raɨre cɨ́ocaizaɨbite. Afe llezica llavéraco ero úzerecaide. Juzíñamui abɨ ímɨe Pedro cɨraigɨ teténote íena cazítate. Cazítano íena daɨde: —Mai raɨre náidacai, —daɨde. Iemona llóejillaɨ Pedro ónoɨmona ana cocɨde.

⁸Afe Juzíñamui abɨ ímɨe íena daɨde: —Mai o cɨraigɨ tirɨ́norafe jofo rɨire tirɨno. O éɨba ico jɨta, —daɨde. Pedro daɨí abɨ fɨ́nua llezica Juzíñamui abɨ ímɨe íena daɨde: —O emodo jɨtaca áreroi jɨtada, cuedo bi, —daɨde.

⁹Iemona Juzíñamui abɨ ímɨe óodana Pedro jaide. Afe abɨ ímɨe fɨnócafue Pedro onóñedeza; nɨbaɨ uafue nɨbaɨ táɨnofue. Comecɨ facáoide: “Nɨcaɨ anado cɨona izóidɨfuena cɨódɨcue.”

¹⁰Mei íadɨ fuéñeide jóonetɨmɨemona baɨ júijicaillano báɨfeicana jóonetɨmɨemo dúcɨdiaillɨnoɨ. Ie mei afémɨemona júijicaillano baɨ nazemo dúcɨzaidiaillɨnoɨ. Afe naze ɨbaira lloébani. Dúcɨdiaillɨnoɨmo afe naze ɨbaira daɨngo túijicaide. Jino jáillano baɨ iodo daallu macádiaillɨnoɨ. Ie mei Juzíñamui abɨ ímɨe ie fɨénocaide.

¹¹Iemona Pedro ñue onócaillano daɨde: —Ɨco ɨere uáfueza. Juzíñamui abɨ ímɨe cuemo orede Herodes cue llavéinamona cue zuitállena. Afe izói nana judíuaɨ cue duere fɨnóacanafuemona cuena zúitaɨbite, —daɨde.

¹²Aféfuemo comécɨillano Juan ei María jofomo jaide. Afe Juan jɨáɨfodo mameide Marcos. Afécomo aillo comɨnɨ Juzíñamuimo ɨere úrillena gaɨrídiaɨoɨ.

¹³Pedro afeco abɨ ibɨrɨ llaveca nazemo náidazaide. Náidaillano jofo ero imacɨ jɨ́ɨrite. Iemona Ródena mámecɨrede rɨngoza bu billa daɨíllena eróizaide.

¹⁴Mei íadɨ Pédrona uáimona onóillano, nazena tuiñóñeno, ióbicaillano meine jofo aizɨda lluájide: —Pedro nazemo dúcɨna, —daɨízaide.

¹⁵Jira íena daɨdíaɨoɨ: —¡Uáɨritaidɨo! Mei íadɨ afengo daɨde: —Uáfuena ñue llotɨcue; uáfuena Pedro dɨnomo ite, —afengo daɨíoide. Mei íadɨ afémacɨ ɨ́ɨnoñeno daɨdíaɨoɨ: —Pédroñedeza; fia ie joreño, —daɨdíaɨoɨ.

¹⁶Mei íaɨoɨ úrioina llezica, Pedro nazemo naɨ jɨ́ɨrioide. Afe meífomo naze tuiñoda íemo érocaidiaɨoɨ. Erocaillano jacɨ́naitiaɨoɨ: —Ua meita Pédrodɨo, —daɨdíaɨoɨ.

¹⁷Mei íadɨ ónoɨdo: —Mai omoɨ úriñeno, llɨɨcai, —daɨde. Iemona Juzíñamui llavéracomona ie zúitafue llote. Iemo íaɨoɨna daɨde: —Bifue Santiágomo lluájiri nana jɨáɨe ámatɨaɨri, —daɨde. Ie meífodo jino jaillano oni jɨáɨnomo jaide.

¹⁸Jae monáizaidemo, llavécano úiñoraɨnɨmo aillo rɨire júfidotiaɨoɨ, mei onóñediaɨoɨza; daɨdíaɨoɨ: —Benó caɨ úiñoga Pedro ¿nɨné jaide? —daɨdíaɨoɨ.