Livitikasi 9:1-11

¹Koasa rane vina vesu pa mudina sa vina madi hiama, si tiokia Mosese se Eroni, meke sari na tuna koreo, meke sari na koimata tadi na tinoni Izireli.

²Zama si asa koe Eroni, “Mu vagia si keke bulumakao kokoreo vaqurana meke keke sipi kokoreo sapu loke ari kisakisadi; mamu va vukivukihi ni koe Zihova. Sa vina vukivukihi bulumakao kokoreo vaqurana si tana sinea, meke sa sipi kokoreo si tana vina vukivukihi va uququ.

³Beto asa si mamu tozini sari na tinoni Izireli pude vagia si keke vina vukivukihi qoti kokoreo pude tana sinea, keke bulumakao keke vuahenina, meke keke tuna sipi keke vuahenina, saripu loke ari kisakisadi, pude na vina vukivukihi va uququ,

⁴meke keke bulumakao kokoreo meke keke sipi kokoreo si pude na vina vukivukihi binaere. Kaqu va vukivukihi lani rini koe Zihova si arini; turaṉae koasa vinariponi huiti sapu henia na oela. Kaqu tavetia rini sapu gua asa, sina kote vura koa rini se Zihova pa rane ṉinoroi.”

⁵Paleke lani rini pa kenuna sa Ipi Hopena sari doduru pu tozi e Mosese, meke varigara vasina sari doduru tinoni pude vahesia se Zihova.

⁶Zama se Mosese, “Se Zihova tozini gamu pude taveti sari doduru pu gua hire, pude kaqu ṉedala vura mae si Asa koa gamu.”

⁷Beto asa si zama koe Eroni si asa, “Mamu la koasa hope, mamu va vukivukihi nia sa vina vukivukihi tana sinea, meke sa vina vukivukihi vina uququ, pude taleosae sari na mia sinea, meke sari na sinea tadi doduru tie. Mi tavetia sa vina vukivukihi hie pude vagi taloa sari na sinea tadi na tinoni, gua puta tugo sapu zama nia e Zihova.”

⁸La pa hope se Eroni, meke va matea sa sa bulumakao kokoreo vaqurana, pude na vina vukivukihi tanisa nana sinea soti.

⁹Paleke lani ri na tuna koreo sari na eharana koe Eroni, poṉa ia sa sa kakarutuna pa ehara, meke vekoi sa sari na ehara koari na kikihona sa hope, meke zoroponi sa saripu koa hola pa hubina sa hope.

¹⁰Beto asa si va uqua sa pa hope sa deanana, sari leleqatana, meke sa kukuruna sa bero leanana hola, gua puta tugo sapu tozia e Zihova koe Mosese.

¹¹Ba va uqua sa sa masa koa holana, meke sa kapuna si va uqui sa pa valena sa vasina pu koa sari na tie.