Livitikasi 2:2-16

²meke kaqu paleke la nia si keke sinara lima siṉina koari na hiama tanisa butubutu te Eroni, meke kaqu va uqui rini pa hope pude na vina gilagilana sapu ele ta vala beto si arini koe Zihova. Sa tivusuna sa vinariponi huiti hie si ta qetue koe Zihova.

³Sa kukuruna sa vinariponi huiti koa holana si tadi na hiama, tava hope hola si asa sina ta vagina koari na vinariponi ginani pu ta vala koe Zihova pa nika.

⁴Be na bereti ta kinana pa keke motumotuana, si kaqu loke isitina si asa. Kaqu na palava ta muzara va memehena sapu ta henie oela olive, babe bisikiti manivisidi pu ta ṉuzapae oela olive si arini.

⁵Be na vinariponi palava si ta kina koa keke peleta aeana labelabe, si kaqu ta tavete koasa palava memehena sapu henia oela olive si asa, meke loke isitina.

⁶Mamu va umumia sa bereti asa, mamu zoropo nia oela pana vala nia goi sa vinariponi asa.

⁷Be na bereti ta kinana koa keke vovoina bobolokuhae, sa vinariponi asa, si kaqu ta tavete pa palava memehena meke na oela olive si asa.

⁸Mu paleke la nia sa vinariponi hie koe Zihova, mamu la vala nia koasa hiama, meke asa kaqu paleke la nia pa hope si asa.

⁹Sa kukuruna si kaqu ta hena koasa hiama pude na vina balabalana sa vinariponi sapu ta vala beto koe Zihova, meke kaqu va uqua sa koasa hope. Sa hibina sa vinariponi ginani asa si ta qetue koe Zihova.

¹⁰Sari na vinariponi bereti sapu koa hola si tadi na hiama, tava hope hola si arini, sina ele ta vagi koasa ginani sapu ta vala koe Zihova.

¹¹Loke vinariponi palava sapu ta vala koe Zihova si kaqu ta henie isiti; namu loke isiti d na zipale si kaqu heni nia gamu koasa ginani sapu kaqu vala nia gamu koe Zihova.

¹²Sa vinariponi tana vua kekenu sapu paketia gamu koari hopeke vuaheni si kaqu heni nia isiti na zipale, meke ta paleke la koe Zihova, ba lopu kaqu tava uqu si asa koasa hope pude humaṉa lea variva qetu koe Zihova.

¹³Veko ni soloti sari doduru vinariponi huiti sina sa soloti si na vina gilagilana sa vinariva egoi pa vari korapamu goi meke sa Tamasa.

¹⁴Totoso ta paleke la koe Zihova sari na huiti tana vua kekenu, si kaqu valani goi sari na kiko huiti ta kinadi meke tava umumudi.

¹⁵Mamu vala nia sa oela olive meke oto huda humaṉa lea koa Sa. Keke vinariponi huiti si asa.

¹⁶Sa hiama si kaqu va uqua, kukuruna sa huiti asa, pu koa ia na oela meke na oto huda humaṉa lea, pude guana keke vina balabalana sa vinariponi huiti sapu ta vala koe Zihova.