Lipitikase 23:31-40

³¹Mawa pii dake nakamana para pyao parami dupwane ingyara. Yuu anjale palyuo kararami dokona pii mende daa.

³²Imambu singi yuu gii angingyuo suu pyao karo yuu gii mange mendaki neta yapao sii piramo dokona piso pao yuu gii akalisana dee neta yalu piramo dokopa nenge kuki injisi mendepe naa narami, leya.

³³Kamongome Mosese kando pii dapa lao Isaraele wambu dupwa lamainya leya.

³⁴Kana yanda ipingi dokona yuu gii akalisa ipisu kingi paki dokopa anda kauwana nenge nenge yuu gii doko pyaka sera. Pyaka sepala yuu yanda ipingi dusipana mee sooko para.

³⁵Koro dakena yuu gii mupwa dokopa nakama rangena yulu yaki nyepala nyuo malu palyuo namba lakando misi lao pisirami.

³⁶Koro dakena yuu gii yaka lao nakamame namba nenge kiso jerami. Jepala yuu gii mange lama karo dokona kamba epo nyuo malu palyuo lakando piso nenge kiso jerami. Yuu gii doko mee misi iki lao piso yulu pii narami.

³⁷Yuu gii andake dusipana nakama malu palyuo piso namba lakando nenge kiso joo bange kiso sunjura pinyi nembo witipi waenepe joo mena pyao kiso joo nambame nakama yuu peparae dopa pipwape dapa pipwape lao langiyunuli pyuo piraminyi dokopa nambana kingi ketae pyambuo kararaminyisa pira.

³⁸Nakamame koro petenge yuu gii dokopa imambu soo nambana lao suu pyao piso bange maipa pyuope bange joo pii lalu lao lasi dupwana manda manjo paramo dupwa joope dee range lapo maso jimwali lao suu pyao kararaminyipape nakama yuu gii andake dasipa opetae poraiyuo minyuo misi lao bange joo kararami.

³⁹Nakamana ee dokona nenge manjo nyuo otapala dokopa kana yanda ipingi dokona yuu gii akalisa ipisu kingi paki dokopa nyuo malu palyuo yuu gii yanda ipingi nyepo nambame langiyunuli pyuo pyuo pisirami. Yuu gii dusipana yuu gii mupwa doko angingyuo imambu soo pisirami.

⁴⁰Nakamame yuu gii mupwa dokona nakamana isa jingi lyingi dupwana lyuo nyuo dee yala isa wangyape isa yoko malu mandenge wangya dupwape lakyuo nyuo pipala yuu gii yanda ipingi nyepo nakamana Kamongo Anatu dokona lenge kambu dokona baapa lao ketae nembo rae maiyuo pisirami.