Lipitikase 19:22-30

²²Koo Anatu baapa ingyuo piyamo doko nyuo nembakana lao purisi akalimi mena sipisipi pyao kisaramo dokopa Anatumi nyuo kame sakamira.

²³Nakama yuu Kenane epo kando nyepala dokopa jingi lyingi isa rara dupwa wara piyami kande dokopa koo ingyasaraŋa ee kana remana naa nao wasaka pyuo kararami.

²⁴Ee kana kisima doko epeya kande dokopa ee isa jingi dupwa peparae lyepala namba keta joo nambana kingi ketae pyambuli lao piramisa pira.

²⁵Dopa piraminyipape ee kana kingi paki dokopa kanda soo isa jingi lyuo narami. Nakama dopale pirami ramo dokopa isa jingi lyuo kakana pira. Namba nakamana Kamongo Anatuŋu karo.

²⁶Minju lapo ranjama paleta siya kande doko naa nalapape. Pipu mauli ropaka kemalipi kingi lenge dokona mendepe nakamame minyalyuo pyuo laa narami.

²⁷Nakamana kyawa wangupi angasi pinjingi dupwape pyakepowape pisarami doko daaŋa leto.

²⁸Nakama yongo kamu kepaope dee enda akalipi mende kumuyami kande dokopa yanenge kunjowape pii narami. Namba doko Kamongo karapunu pilyamo.

²⁹Nakamame nakamana wanene dupwa mee bange anatuŋu lenge tembole anda dupwana kepo yulu pingi dokona pyuo petena lao maiya nalapape. Daaŋa lao maiyuo larami ramo dokopa namba yaki nyepala mee bange anatuŋu lao suu pingi doko mana nyeraminyipa nakamana yuu andape dupwa pamuku yulu dokome simbwara ingilyamo.

³⁰Koro petenge yuu gii doko yaki nyii napala misi lao namba lakandenge panda doko kyawa nyuo minyuo karalapape. Namba Kamongoŋo karo.