Lii Lolo nèti Dhèu Pajuu-paleha 8:27-39

²⁷Ropa tadèngi nare lii paredha èèna, ka na pakèdꞌi dènge ka. Lodꞌo nèngu kako ètu jꞌara èèna, ladhe nèdhi dhèu èci. Dhèu èèna, pegawi kapai nèti rai Etiopia. Nèngu ne ka dhu ladhe-leru mèdha-panyau dhèu aae bhèni, ngara na Kandake. Pegawi èèna heka sabajꞌa nare ètu Yerusalem, ka na lèpa èmu caꞌe kareta. Ropa Pelipus nèdhi ne, nèngu madhèdi baca ètu dedha kareta. Na baca sasuri dhèu nèti lii padhai Ama Lamatua, ngara na Yesaya.

²⁹Èle èèna ka, Roh Lamatua pua Pelipus laꞌe padètu asa kareta èèna, sèna ka na paraga dènge dhèu èèna.

³⁰Ropa na dètu, ka na tadèngi, na, dhèu èèna baca sasuri Yesaya. Ka Pelipus karèi ne, peka na, “Ama! Ama ku meꞌa, do aadꞌo, ngaa dhu ama baca èèna?”

³¹Ka dhèu ne dhaa, peka na, “Aadꞌo, jaꞌa keꞌa boe. Hudꞌi abhu ku dhèu dhu peka-padhai dènge jaꞌa, heka jaꞌa keꞌa kèna. Caꞌe mai ho madhèdi dènge jaꞌa.”

³²Sasuri dhu na baca èèna, sèmi neꞌe ka, “Ra nuni rèti Ne, sama sèmi nuni kahibꞌi-kalèbho, ho neo roro Ne. Nèngu jꞌajꞌi sama sèmi ana kahibꞌi-kalèbho dhu dhèu gꞌute rèu Ne, te ngaa nèngu mau-mau sène, na kabee boe. Hèbꞌa Na kutu mèno, aa na kalua boe lii ca lamusi sa.

³³Ka ra lalangu Ne, Ra jꞌue lii langu Na lèke boe. Lodꞌo èèna, ra pamadhe Ne, masi ka Nèngu dènge boe sasala-sasigo. De èdhi peka ngaa hari lula-nèti ana-èpu Na?”

³⁴Ropa na baca nare, hèia na karèi Pelipus, peka na, “Tasamia, ee? Sasuri Yesaya ne, lèke mi nèngu, do, lèke mi dhèu leo?”

³⁵Ka Pelipus ajꞌa ne Lii Lolo Beꞌa Lamatua Yesus. Na lolo nèti lii sasuri Yesaya, ho padꞌelo jꞌara madhutu Yesus.

³⁶Lodꞌo rèngu ètu dꞌara kakako era, rèngu rage loko èci dènge èi. Ka dhèu èèna peka dènge Pelipus, aku nèngu na, “Ama. Ladhe ku èi ka nèi. Ladhe èu ngee, na, cadhui boe, mai puru lati, ho èu sarani ku jaꞌa.”

³⁷Hèia Pelipus dhaa, aku nèngu na, “Ladhe ama tareꞌa-reꞌa parcaya Lamatua Yesus, na, cadhui boe. Mai dua ti puru ho jaꞌa sarani èu.” Ka na dhaa, peka na, “Jaꞌa parcaya tareꞌa-reꞌa, na, Yesus èèna Dhèu dhu Ama Lamatua pajꞌujꞌu nèti uru ka mai. Nèngu èèna, Ana Ama Lamatua.”

³⁸Hèia pegawi èèna, paredha ho patitu kareta. Ka dua ra puru asa dꞌara èi èèna, ka Pelipus sarani ne.

³⁹Ropa ra kalua mai nèti dꞌara èi, kabèdhi laa Roh Lamatua dedꞌe nèti Pelipus asa era leo. Ka dhèu èèna nèdhi heka Pelipus. Hèia pegawi kapai èèna lèpa dènge dꞌara karejꞌe-karae.