Lii Lolo nèti Dhèu Pajuu-paleha 2:24-39

²⁴Lula tatao miu, ka Nèngu madhe tareꞌa. Te ngaa Ama Lamatua dꞌèi boe ho Yesus madhe taruu. Nèti èèna ka, Lamatua patalale eele Nèngu nèti koasa mamadhe, ka pamamuri hari Ne. Te koasa mamadhe bisa boe segi Ne.

²⁵Nèti uru ka mai, dhèu aae Daud suri tèke le lula-nèti Yesus ne, peka na: ‘Jaꞌa keꞌa, na, Lamatua sama-sama taruu dènge jaꞌa. Nèti èèna ka, ngaa èci sa bisa boe pamanahu jaꞌa, lula Ama Lamatua ètu baboa jaꞌa taruu.

²⁶Nèti èèna ka, dꞌara jaꞌa karejꞌe, ka jaꞌa koa-kio Ne taruu, aa jaꞌa mate Lamatua dènge dꞌara mera-milu.

²⁷Te Nèngu soro tèke boe samanga jaꞌa pea taruu ètu era dhèu madhe sèra. Aa Ama Lamatua tèke eele boe ngiꞌu aae Dhèu Nèngu dhu Dꞌara Mola-Mèci, ele iie ètu dꞌara rai.

²⁸Lamatua padꞌelo le jaꞌa jꞌara mamuri dhu mola. Nèti èèna ka dꞌara jaꞌa karejꞌe dꞌai seli, lula Lamatua bera-bera dènge jaꞌa.’ Neꞌe ne ka dhu dhèu aae Daud suri tèke nèti uru ka mai.

²⁹Aꞌari aaꞌi-aaꞌi! Miu mata ku ho jaꞌa lole paie ku dènge miu lula-nèti dhèu aae Daud. Na peka sèmi èèna, te ngaa na lole boe ngiꞌu nèngu. Èdhi teꞌa, lula nèngu madhe le, aa ra padhane ne. Roꞌa na abhu ètu talora èdhi toke dꞌai sange neꞌe.

³⁰Dhèu aae Daud ne jꞌajꞌi dhèu nèti lii padhai Ama Lamatua. Aa na neꞌa, na, Ama Lamatua dhu moa le pake lii subha, ho limuri mai èci nèti ana-èpu Daud nèdꞌu paredha. Nèngu èèna ka dhu Lamatua pajꞌujꞌu mema nèti uru ka mai.

³¹Lodꞌo èèna, Daud pangee madhera. Aa na peka uuru lula-nèti Dhèu dhu Lamatua pajꞌujꞌu tèke le. Èena na Dhèu èèna madhe, te ngaa mamuri hari kahèi. Aa Daud peka kahèi, na, Dhèu èèna pea taruu boe ètu era dhèu madhe, aa ngiꞌu Na ele iie boe kahèi.

³²Dhèu dhu Daud peka-padhai ne, nuka Yesus! Ama Lamatua pamamuri hari Ne nèti mamadhe Na. Ka jiꞌi aaꞌi-aaꞌi mi ngèdhi le dènge musi madha jiꞌi!

³³Ka limuri ne, Ama Lamatua dedꞌe le Yesus, ho nèdꞌu paredha dhu dedha risi eele. Aa Na madhèdi ètu baboa gꞌana Ama Lamatua, ètu era dhu Lamatua sadia tèke le. Aa Ama Na hia le Roh Na dhu Mola-Mèci, sama sèmi dhu Na moa tèke nèti uru ka. Aa Na moa neo hia Roh Mola-Mèci Na mi èdhi kahèi. Èèna ka dhu miu tadèngi dènge laladhe mèdhi deo na, nuka Ama Lamatua hia Roh Na.

³⁴Daud mesa na caꞌe boe laꞌe asa sorga, te ngaa na suri, peka na, ‘Ama Lamatua padhai lii dènge Lamatua jaꞌa, peka na, “Madhèdi mi sebhe gꞌana Jaꞌa, ètu era dhu Jaꞌa sadia mema,

³⁵toke Jaꞌa tao musu Èu sèra, pahaha iisi mi Èu.’ ”

³⁶Nèti èèna ka dhèu Israꞌel aaꞌi-aaꞌi ra hudꞌi reꞌa ku tareꞌa-reꞌa, lula-nèti Yesus dhu miu paku pamadhe ètu ajꞌu palolo-palèbha. Nèngu, nuka Kristus dhu Ama Lamatua hagꞌe nare le. Aa Nèngu neꞌe ka dhu jꞌajꞌi Kètu èdhi.”

³⁷Ropa tadèngi rare lii Petrus ne, dꞌara dhèu sèra roe. Ka ra karèi Petrus dènge dhèu pajuu-paleha leo sèra, peka na, “Aꞌari! Jiꞌi hudꞌi tao tasamia ku?”

³⁸Hèia Petrus dhaa, peka na, “Miu èci-èci hudꞌi ele-hoꞌa ku, aa tèke eele ku sasala-sasigo miu aaꞌi-aaꞌi mi, ho miu lèpa hari madhutu Lamatua. Hèia soro iisi mi ho sarani, sèna ka jꞌajꞌi mi tadha, peka na, miu lèpa hari le madhutu Jꞌara Mamuri Yesus Kristus. Aa èèna jꞌajꞌi tadha kahèi, peka na, Lamatua saku eele le sasala-sasigo miu. Èle èèna, miu sèmi mere Roh Ama Lamatua dhu Mola-Mèci.

³⁹Te Ama Lamatua moa le hia Roh Na mi dhèu aaꞌi-aaꞌi dhu jꞌajꞌi le dhèu unu Na. Dènge jꞌara neꞌe, lii mamoa lula-nèti Roh Na, jꞌajꞌi hia miu dènge ana-èpu miu kahèi. Na moa hia mi dhèu leo kahèi.”