Lifitikos 7:22-37

²²Iwe, ewe Samol mi Lapalap a ngeni Moses ekei allük

²³fän iten ekewe aramasen Israel: Ousap ochoch kirisin kow ika sip ika kuuch.

²⁴Iwe, kirisin eman man mi püsin mäla ika kirisin eman mi tatakis ren manmwacho oua tongeni aea fän iten och, nge ousap fokun tongeni ochei.

²⁵Iteiten eman me eman aramas mi ochei kirisin ekewe man ra eäni asor won ekkei ngeni ewe Samol mi Lapalap epwe käriwu seni aramasan.

²⁶Ekis meinisin ia oua nonom ie ousap fokun ün cha, ese lifilifil ika chan mansüsü ika chan man.

²⁷Iteiten eman me eman aramas mi ün cha epwe käriwu seni aramasan.

²⁸Iwe, ewe Samol mi Lapalap a pwal ngeni Moses ekei allük

²⁹fän iten ekewe aramasen Israel: Eman mi eäni an asoren kinamwe ngeni ewe Samol mi Lapalap epwe uwato eu kinikin pwe an asor ngeni ewe Samol mi Lapalap.

³⁰Epwe püsin uwato ekewe asor ngeni ewe Samol mi Lapalap. Iwe, epwe uwato kirisin ewe mönün asor pwal leupwan, pwe ewe leupw epwe assaw fän mesen ewe Samol mi Lapalap.

³¹Iwe, ewe souasor epwe kenala ewe kiris won ewe rongen asor, nge leupwen ewe mönün asor epwe fän iten Aaron me nöün kewe mwän.

³²Oupwe ngeni ewe souasor pelifichin pechen ämi mönün asoren kinamwe.

³³Iö me lein nöün Aaron kewe mwän a eäni asor chan ewe mönün asoren kinamwe pwal kirisin, i epwe eäni pelifichin pechen ewe mönün asor pwe ina inetin.

³⁴Pun üa angei seni än ekewe aramasen Israel mönün asoren kinamwe leupwan mi assaw pwal pechen o ngeni ewe souasor Aaron me nöün kewe mwän. Iei ekewe kinikin ekewe aramasen Israel repwe ngeni ekewe souasor fansoun meinisin.

³⁵Iei inetin Aaron me nöün kewe mwän seni ekewe asor ngeni ewe Samol mi Lapalap, mi apinipin fän iter lon ewe ränin ar tolong lon wisen souasor.

³⁶Ewe Samol mi Lapalap a allük pwe ekewe aramasen Israel repwe ngeniir inetir kei lon ewe ränin ra kepit, pwe wiser fansoun meinisin seni eu täppin aramas tori eu täppin.

³⁷Iwe, iei allükün ewe asoren kek, ewe asoren mongö, ewe asoren tipis, ewe asoren pupungau, ewe asoren apinipin me ewe asoren kinamwe.