Lifitikos 6:14-21

¹⁴Nge iei allükün ewe asoren mongö: Nöün Aaron kewe mwän repwe uwato ewe asoren mongö ngeni ewe Samol mi Lapalap mwen ewe rongen asor.

¹⁵Iwe, eman leir epwe angei ekumwuch pilawa mi amas o mürina seni ewe asoren mongö me ewe apüra seni föün olif, pwal unusen ewe apach mi pwokus mi nom won, o kenala me won ewe rongen asor, iei asisilan pwe a asor meinisin. Iei eu asor ewe Samol mi Lapalap a efich pwoon.

¹⁶Nge lusun ewe asoren mongö Aaron me nöün kewe mwän repwe mongö. Iwe, repwe mongö ewe asoren mongö esap wor iis lon me lon eu leni mi pin lon ewe leni lükün ewe imw mangaku ia aramas ra churi Kot ie.

¹⁷Iwe, resap tongeni umuni ewe pilawa fiti iis. Ewe Samol mi Lapalap a ngeniir pwe inetir seni ewe asoren mongö. Iei eu asor mi unusen pin usun chök ewe asoren tipis me ewe asoren pupungau.

¹⁸Iteiten mwän me lein ekewe mwirimwirin Aaron repwe mongö seni. Iei inetir seni ewe asor ngeni ewe Samol mi Lapalap, seni eu täppin aramas tori eu täppin. Esap fokun wor eman lükür epwe atapa ekewe asor, pun iö a atapa epwe feiengau ren pinin.

¹⁹Iwe, ewe Samol mi Lapalap a ngeni Moses ekei allük

²⁰fän iten afeiöchün eman souasor i mwirimwirin Aaron: Lon ewe rän, lupwen eman leir a kepit, epwe eäni asor ngeni ewe Samol mi Lapalap ruu paun pilawa mi amas o mürina usun chök ükükün ewe asoren mongö ra eäni iteiten rän. Esop seni ewe asor epwe eäni asor lesosor, nge esop lekuniol.

²¹Iwe, epwe nokopuni fiti apüra lon eu furaipan, epwe aipwötü o kinikisietiu usun eu asoren mongö. Mürin epwe eäni asor pwe epwe eu asor ewe Samol mi Lapalap a efich pwoon.