Lifitikos 4:3-20

³Are ewe souasor mi lap a tipis o ren an tipis a atoto tipis won ekewe aramas, epwe uwato ngeni ewe Samol mi Lapalap eman nienifön ätemwänin kow esap wor terin, pwe epwe eäni asor fän iten an tipis.

⁴Iwe, epwe uwato ewe ätemwänin kow leasamalapen ewe imwenfel seni mangaku, epwe anomu pöün won möküran o niela me fän mesen ewe Samol mi Lapalap.

⁵Mürin, ewe souasor mi lap epwe angei ekis chan ewe ätemwänin kow o uwato lon ewe imwenfel seni mangaku.

⁶Epwe atukalong aütün lon ewe cha o äsupu fän fisu ekis seni ewe cha mwen chechen lon ewe leni mi pin fän mesen ewe Samol mi Lapalap.

⁷Ewe souasor epwe pwal tofätä ekis seni ewe cha won mächän ewe rongen asoren ötüöt mi nom lon ewe imwenfel seni mangaku fän mesen ewe Samol mi Lapalap. Nge lusun chan ewe ätemwänin kow epwe ninätiu lepopun ewe rongen asoren kek mi nom leasamalapen ewe imwenfel seni mangaku.

⁸Iwe, seni ei asoren tipis epwe angei kirisin ewe ätemwänin kow meinisin, ewe kiris mi pwölüela pisekin lon inisin meinisin,

⁹ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün.

¹⁰Iwe, ewe souasor epwe keniir won ewe rongen asoren kek, usun chök mine a föri ngeni ewe mönün asoren kinamwe.

¹¹Nge silin ewe ätemwänin kow me fitukan meinisin, pwal möküran me pechen, pisekin lon inisin fiti taran,

¹²unusen ewe ätemwänin kow epwe uwawu lon eu leni mi limöch lükün ewe ia ra nonom ie. Iwe, epwe keni won ekkei seni mwüch, ia ra ninala ie ewe falang.

¹³Iwe, are unusen ewe mwichen aramasen Israel epwe tipisin chechengau, nge resap mefi pwe ra föri mine ewe Samol mi Lapalap a allük ngeniir pwe resap föri, ra atoto tipis wor.

¹⁴Nge are ra mefi pwe ra tipis, ewe mwichen aramas epwe emwenato mwen ewe imwenfel seni mangaku eman nienifön ätemwänin kow fän iten asoren tipis.

¹⁵Iwe, ekewe souakomwen ewe mwich repwe anomu pöür won möküren ewe ätemwänin kow o niela me fän mesen ewe Samol mi Lapalap.

¹⁶Mürin, ewe souasor mi lap epwe uwato ekis seni chan ewe ätemwänin kow lon ewe imwenfel seni mangaku.

¹⁷Epwe atukalong aütün lon ewe cha o äsupu fän fisu mwen chechen lon ewe leni mi pin fän mesen ewe Samol mi Lapalap.

¹⁸Iwe, ewe souasor epwe pwal tofätä ekis seni ewe cha won mächän ewe rongen asoren ötüöt mi nom fän mesen ewe Samol mi Lapalap lon ewe imwenfel seni mangaku. Nge lusun ewe cha epwe ninätiu lepopun ewe rongen asoren kek mi nom leasamalapen ewe imwenfel seni mangaku.

¹⁹Mürin epwe angei kirisin ewe mönün asor meinisin o kenala me won ewe rongen asor.

²⁰Usun mine a föri ngeni ewe mönün asoren tipis, iei usun epwe pwal föri ngeni ei ätemwänin kow. Ren ei ewe souasor epwe föri asoren amusamusen tipis fän iten ekewe aramas, pwe ar tipis epwe musala.