Lifitikos 4:27-34

²⁷Iwe, are eman me lein ekewe aramas a tipisin chechengau le föri mine ewe Samol mi Lapalap a allük ngeni pwe esap föri, a atoto tipis won.

²⁸Nge are a mefi pwe a tipis, epwe uwato eman liafefinin kuuch esap wor terin, pwe an asor fän iten an tipis.

²⁹Epwe anomu pöün won möküren ewe mönün asoren tipis o niela me lon ewe leni ia ra niela ie ekewe mönün asoren kek.

³⁰Mürin, ewe souasor epwe angei ekis chan ewe mönün asoren tipis o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asor.

³¹Mürin, epwe aserala kirisin meinisin, usun a aserala kirisin ekewe mönün asoren kinamwe. Iwe, ewe souasor epwe keni me won ewe rongen asor, pwe ewe Samol mi Lapalap epwe efich pwoon. Iei usun ewe souasor epwe föri asoren amusamusen tipis fän iten ewe aramas, pwe an tipis epwe musala.

³²Iwe, are eman aramas a uwato eman sip pwe an asoren tipis, epwe uwato eman liafefin esap wor terin.

³³Epwe anomu pöün won möküren ewe mönün asor o niela me lon ewe leni ia ra niela ie ekewe mönün asoren kek, pwe eu asoren tipis.

³⁴Mürin, ewe souasor epwe angei ekis chan ewe mönün asor o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asor.