Lifitikos 27:14-29

¹⁴Iwe, are eman aramas a fangala imwan pwe epwe pin fän iten ewe Samol mi Lapalap, ewe souasor epwe aükü ükükün liwinin aüchean ewe imw o filätä ika men öch ika men ngau. Nge ükükün mine ewe souasor epwe aükü ngeni epwe chök ina.

¹⁵Nge are ätewe mi fangala imwan ngeni Kot a mochen mönisefäli, epwe pacheetä eu lelimu ngeni ükükün liwinin aüchean ewe imw ren moni. Mürin epwe pwal imwenisefäli.

¹⁶Iwe, are eman aramas a fangala eu kinikin seni fanüan me won saman ngeni ewe Samol mi Lapalap, ükükün liwinin aüchean epwe alongolong won ükükün mine a tongeni fotutiu won. Iwe, ükükün liwinin iteiten wone paun föün parli a tongeni fot won epwe engol föün moni silifer.

¹⁷Are ewe aramas a fangala fanüan ngeni Kot lon ewe ierin supili, ükükün liwinin aüchean epwe unus.

¹⁸Nge are a fangala fanüan mürin ewe ierin supili, ewe souasor epwe aükü ükükün liwinin aüchean, nge epwe alongolong won ükükün fitu ier mi chüen nom tori ewe ierin supili me mürin. Iwe, ükükün liwinin aüchean epwe kotur won ükükün ekewe ier ra fen wes.

¹⁹Iwe, are ätwe mi fangala ewe fanü ngeni Kot a mochen mönisefäli, epwe pacheetä eu lelimu ngeni ükükün liwinin aüchean ewe fanü ren moni. Mürin epwe pwal fanüenisefäli.

²⁰Nge are esap mochen mönisefäli ewe fanü, ika a amömöla ngeni eman, esap chüen wor an pwüng won me mürin.

²¹Are ewe fanü a pichila lon ewe ierin supili, ei fanü epwe pin fansoun meinisin usun chök eu fanü a fen pin fän iten ewe Samol mi Lapalap. Iwe, ewe souasor epwe fanüeni.

²²Nge are eman a fangala ngeni ewe Samol mi Lapalap eu fanü sap fanüan me won saman pwe a möni,

²³ewe souasor epwe aükü liwinin aüchean seni fansoun än ewe aramas fangala tori ewe ierin supili. Iwe, ewe aramas epwe mönätiu ükükün liwinin aüchean mi kaük lon ewe chök rän. Ei moni a fän iten ewe Samol mi Lapalap.

²⁴Nge lon ewe ierin supili ewe fanü epwe liwiniti ätewe mi amömöla, pun fanüan me won saman.

²⁵Iwe, iteiten aükükün liwinin epwe för won ewe kilo ra aea le aükük lon ewe imw mi pin.

²⁶Iwe, esap wor eman a tongeni fangala ngeni Kot eman mweinöün nöün man pwe an asor seni püsin letipan, pun a fen nöün ewe Samol mi Lapalap. Ese lifilifil ika ätemwänin kow ika sip, ir nöün ewe Samol mi Lapalap.

²⁷Nge are ewe man eman mweinöü me lein ekewe man mi limengau, ätewe nöün ewe man a tongeni mönisefäli won ükükün liwinin aüchean a fen kaük ngeni, nge epwe pacheetä eu lelimu ngeni. Nge are esap mönisefäli, repwe amömöla ewe man won ükükün liwinin aüchean a fen kaük ngeni.

²⁸Nge are eman aramas a apini och mettoch seni mine an fän iten ewe Samol mi Lapalap pwe epwe katala, ese lifilifil ika eman aramas ika nöün man ika fanüan me won saman, esap tufich an epwe amömöla are mönisefäli. Iteiten mettoch mi pin pwe repwe katala ra unusen pin fän iten ewe Samol mi Lapalap.

²⁹Eman aramas mi apinipin pwe epwe kärila esap tufich pwe epwe mösefäl, nge epwe ninnila.