Lifitikos 26:8-14

⁸Iwe, limman senikemi repwe akufu ipükü, nge ipükü repwe akufu engol ngeröü. Iei usun chon oputakemi repwe kuf remi lon maun.

⁹Üpwe ümöümöch ngenikemi, üpwe aupukemi o achomongakemi, üpwe pwal apwönüetä ai pwon ngenikemi.

¹⁰Räsin fanüemi epwe fokun chomong, pwe oupwe chüen mongö mongön ewe ier a la tori oupwe aturala ewe mongö minen lom seni ämi lenien iseis, pwe epwe wor lenien ewe mongö mi fö.

¹¹Iwe, üpwe imweimw lefilemi lon imwei mi pin, nge üsap oputakemi.

¹²Üpwe nonom remi pwe üpwe ämi Kot, nge ämi oupwe nei aramas.

¹³Ngang ewe Samol mi Lapalap ämi we Kot, üa emwenikemiiwu seni ewe fanü Isip, pwe resap chüen nöünikemi amanau. Iwe, üa kupi ewe waas mi nom won afaremi, pwe oupwe wenetä le fetal.”

¹⁴Iwe, ewe Samol mi Lapalap a apasa, “Are ousap mochen aleasochisi aloi, ousap pwal apwönüetä ai kewe allük meinisin, ngang üpwe apwüngükemi.