Lifitikos 26:17-43

¹⁷Üpwe ü ngenikemi, nge oupwe kuf ren chon oputakemi. Chokewe mi oputakemi repwe nemenikemi. Iwe, ämi oupwe sü, ngei esap wor eman a tapwerikemi.

¹⁸Lupwen ekei feiengau ra torikemi, nge ousap mochen aleasochisi aloi, üpwe awatteloi ai apwüngükemi fän fisu pokiten ämi tipis.

¹⁹Iwe, üpwe aükätiu ämi lamalamtekia me ülöförea. Üpwe föri pwe üt esap püngütiu won fanüemi, nge ewe fanü epwe pwasapwas o pöchökül usun mächä.

²⁰Epwe solapmwälila ämi pöchökül le angang ngeni ewe pwül, pun irän fanüemi resap mämäritä, resap pwal ua.

²¹Mürin, are oua chüen lükümach ngeniei pwe ousap mochen aleasochisi aloi, üpwe awatteloi ämi riaföü, pwe epwe fän fisu lap seni me mwan pokiten ämi tipis.

²²Iwe, üpwe tinala ekewe manmwacho pwe repwe afeiengauakemi. Repwe niela nöümi semirit o ochei nöümi man, repwe pwal achokisikisikemiila pwe alen fanüemi repwe pönüla.

²³Are üpwe apwüngükemi iei usun, nge ousap kul ngeniei, pwe oua chüen ü ngeniei,

²⁴mürin ngang üpwe pwal ü ngenikemi o afeiengauakemi fän fisu lap seni me mwan pokiten ämi tipis.

²⁵Üpwe awarato maun womi, pwe iei chappen ämi atai ewe pwon. Nge are oua sülong lon ämi kewe telinimw, üpwe tinala mätter leimi. Oupwe tolong fän nemenien chon oputakemi.

²⁶Lupwen üpwe akisikisala enemi mongö, epwe fis pwe engol fefin repwe umuni ener pilawa lon eu chök um. Mürin repwe paunei ewe pilawa o ineti. Iwe, oupwe mongö, nge ousap möt ren.

²⁷Are iei mwo ai ariaföüükemi, nge ousap mochen aleasochisiei pwe oua chök sopwela le ü ngeniei,

²⁸mürin üpwe pwal ü ngenikemi lon ai song o püsin emiritikemi fän fisu lap seni me mwan pokiten ämi tipis.

²⁹Iwe, pokiten watten ämi echik oupwe ochei fituken püsin nöümi ät me nengin.

³⁰Üpwe atai ämi kewe lenien fel won ekewe leni tekia o pökükisietiu ämi kewe rongen asoren ötüöt. Üpwe pwal moneetä inisin ämi kewe somä won ämi kewe uluulun anümwäl mi tatakis. Iwe, üpwe fokun oputakemi.

³¹Üpwe atai ämi kewe telinimw o apönü ämi kewe leni mi pin. Üsap fokun etiwa ämi kewe asor oua keni.

³²Ewer, üpwe fokun ataela fanüemi, pwe chon oputakemi mi lefanüla lon repwe mairü ren.

³³Iwe, üpwe awarato maun womi o atoropasafeilikemi lein ekewe mwü. Fanüemi epwe tala, nge ämi kewe telinimw repwe tatakis.

³⁴Mürin, ewe fanü epwe pwapwaiti an kewe ierin asösö lon ükükün fansoun a tala. Lupwen oua oola lon fanüen chon oputakemi, ewe fanü epwe asösö o pwapwaiti an kewe ierin sapat.

³⁵Iwe, ükükün fansoun ewe fanü a tala lon, ina pwal ükükün fansoun an epwe asösö, pun esap asösö lon ämi kewe ierin sapat, lupwen oua nonom won.

³⁶Nge üpwe awora niuokus lon leluken chokewe me leimi mi chüen manau lon fanüen chon oputer, pwe repwe sü ren mwataten echö chön irä mi äs ren asepwäl, usun chök eman aramas a sü lupwen maun. Iwe, repwe turula, nge esap wor eman a tapweriir.

³⁷Eman epwe tumula won eman, usun chök aramas ra tumula ren ar sü lupwen maun, nge esap wor eman a tapweriir. Epwe wor ämi pireir, pwe ousap tongeni ü ngeni chon oputakemi.

³⁸Iwe, oupwe mäla lein chon ekewe mwü, nge fanüen chon oputakemi epwe oromikemiila.

³⁹Nge chokewe me leimi mi chüen manau lon fanüen chon oputer, epwe üttüla inisir pokiten ar föföringau, pwal pokiten an semer föföringau.

⁴⁰Mürin epwe fis pwe repwe pwärätä ar föföringau, pwal än semer kewe föföringau ra föri ngeniei lon ar ekisolä me ü ngeniei,

⁴¹iei popun ngang üa pwal ü ngeniir o tinirela lon fanüen chon oputer. Iwe, lupwen leluker mi ülöförea epwe tekison pwe ra angei chappen ar tipis,

⁴²ngang üpwe chechemeni ai pwon ngeni Jakop, ai pwon ngeni Isaak me ai pwon ngeni Apraham, üpwe pwal chechemeni ewe fanü.

⁴³Nge akom ekewe aramas repwe likitala ewe fanü, pwe ewe fanü epwe pwapwaiti an kewe ierin asösö, lupwen a tala. Iwe, repwe angei chappen ar tipis, pun ra purätiu ai kewe allük o oput ai kewe pwüüng.