Lifitikos 25:34-48

³⁴Nge ekewe fanü mi nom pwelin ünükün ar kewe telinimw resap fokun tongeni amömöla, pun ekei fanü fanüer tori feilfeilachök.

³⁵Are eman pwiüm chon Israel a wöüngauala pwe esap chüen wor püsin an tufich, en kopwe atufichi, usun ka atufichi eman chon ekis ika eman wasöla, pwe epwe tongeni nomomola reöm won ewe fanü.

³⁶Iwe, kosap angei manauen an liwinimang ngonuk. Nge kopwe niueiti om we Kot o mwüt ngeni pwiüm we chon Israel an epwe nonomola reöm won ewe fanü.

³⁷Kosap ngeni pwiüm we chon Israel noum moni pwe kopwe angei seni manauan, kosap pwal amömö ngeni anom mongö pwe kopwe angei winom ren.

³⁸Ei allük än ewe Samol mi Lapalap ämi we Kot mi emwenikemiiwu seni ewe fanü Isip, pwe epwe ngenikemi ewe fanü Kanaan, epwe pwal ämi Kot.

³⁹Are eman pwiüm chon Israel mi nom reöm a wöüngauala pwe a amömöla püsin inisin ngonuk, kosap anganga usun eman noum amanau.

⁴⁰Epwe nom reöm usun eman chon angang mi mö ika usun eman wasöla. Epwe angang ngonuk tori ewe ierin supili.

⁴¹Mürin epwe feila senuk fiti nöün kana. Epwe liwiniti püsin an famili o liwinsefäliti fanüen saman.

⁴²Pun ekewe chon Israel nöün ewe Samol mi Lapalap chon angang i a emwenirewu seni ewe fanü Isip. Kosap amömömörela pwe aramas repwe nöüniir amanau.

⁴³Kosap nemeni pwiüm we chon Israel fän pöchökül, nge kopwe niueiti om we Kot.

⁴⁴Nge are oua mochen kamö mwän me fefin pwe oupwe nöüniir amanau, oua tongeni möniir seni ekewe mwü mi nom ünükümi.

⁴⁵Oua pwal tongeni kamö nöümi chon angang me lein ekewe chon ekis mi wasöla remi, chokewe mi uputiu lon fanüemi. Ikkei ir oua tongeni nöüniir amanau.

⁴⁶Iwe, oua tongeni eäniir amwirinimä ngeni nöümi kewe mwän pwe repwe nöüniir amanau tori ar mäla. Ikkei ir oua tongeni nöüniir amanau, nge pwimi kewe chon Israel ousap nemeniir fän pöchökül.

⁴⁷Are eman chon ekis ika eman wasöla mi nom reöm a pisekisekila, nge pwiüm we chon Israel a wöüngauala pwe a amömöla püsin inisin ngeni ewe chon ekis ika ngeni eman eterekesin ewe chon ekis,

⁴⁸eman epwe tongeni mönisefäli mürin an amömöla püsin inisin. Iwe, eman me lein pwin kana a tongeni mönisefäli.