Lifitikos 25:11-28

¹¹Iwe, ewe alimeen ier epwe eu ierin supili fän itemi. Ousap fofot, ousap pwal ionifengeni mine a püsin pwükütä, ousap pwal ionifengeni uän ekewe irän wain resap pökütol.

¹²Pun iei eu ierin supili epwe pin me remi. Oupwe chök mongö seni mine a püsin pwükütä me won ewe fanü.

¹³Iwe, lon ewe ierin supili eman me eman leimi epwe angeisefäli fanüan.

¹⁴Nge are ka amömöla ngeni chon arum eu fanü ika möni seni chon arum eu fanü, ousap kirikiringaufengen lefilemi.

¹⁵Are kopwe möni seni chon arum eu fanü, kopwe liwini ngeni ükükün fitu ier mürin ewe supili, nge i epwe amömö ngonuk ükükün fitu ier ka tongeni kini uän irän ewe fanü.

¹⁶Iwe, are ekewe ier ra chomong, liwinin ewe fanü epwe pwal watte. Nge are ekewe ier ra chokükün, liwinin epwe pwal kükün, pun chon arum epwe amömö ngonuk ükükün fitu ier ka tongeni kini uän irän ewe fanü.

¹⁷Ousap kirikiringaufengen lefilemi, nge oupwe meniniti ewe Samol mi Lapalap ämi we Kot.

¹⁸Iei mine oupwe aleasochisi än ewe Samol mi Lapalap allük o apwönüetä an kewe pwüüng, pwe oupwe nonom lon ewe fanü fän kinamwe.

¹⁹Iwe, ewe fanü epwe efisätä ua, pwe ämi oupwe mongö o möt, oupwe pwal nonom lon ewe fanü fän kinamwe.

²⁰Nge are oupwe ais, ‘Meta aipwe eni lon ewe afisuen ier, are aisap tongeni fofot ika ionifengeni uän ekewe irä?’

²¹Ewe Samol mi Lapalap epwe tinato an feiöch womi lon ewe awonuen ier, pwe ewe fanü epwe efisätä ua fän iten ükükün ülüngat ier.

²²Nge are oupwe fofot lon ewe awaluen ier, oupwe chök chüen mongö ekewe uän lom oua kini lon ewe awonuen ier. Tori lon ewe atiuen ier, lupwen oupwe kini ekewe ua mi fö, oupwe chüen mongö ekewe uän lom.

²³Iei mine ousap amömö ewe fanü tori feilfeilachök. Pun ei fanü fanüen Kot, nge ämi oua usun chök chon ekis me chon siamü won.

²⁴Ei allük a fän iten unusen ewe fanü oua fanüeni, pwe oupwe mwütätä ngeni ätewe a amömöla fanü pwe epwe fanüenisefäli.

²⁵Iwe, are eman chon Israel a wöüngauala o amömöla eu kinikinin fanüan, eman fitukan epwe feito o mönisefäli mine pwin a amömöla.

²⁶Nge are esap wor eman fitukan epwe tongeni möni, püsin i a tongeni mönisefäli, lupwen a wor an tufich.

²⁷Iwe, epwe aleani ekewe ier seni ewe fansoun a amömöla ewe fanü o liwini ngeni ätewe a möni ewe fanü me mwan ükükün liwinin ekewe lusun ier tori ewe ierin supili. Mürin a tongeni fanüenisefäli fanüan.

²⁸Nge are esap naf liwinin pwe epwe mönisefäli fanüan, ätewe mi möni epwe chök fanüeni tori ewe ierin supili. Iwe, lon ewe ierin supili ätewe mi amömöla ewe fanü me mwan epwe fanüenisefäli fanüan.