Lifitikos 23:10-35

¹⁰pwe epwe üreni ekewe aramasen Israel: Lupwen oupwe tolong lon ewe fanü, ewe Samol mi Lapalap epwe ngenikemi, o kini uan, oupwe uwato epilük mwen kiniemi uän wiich ren ewe souasor.

¹¹Iwe, ewe souasor epwe assawa ewe pilük fän mesen ewe Samol mi Lapalap sorotän ewe ränin sapat, pwe Kot epwe etiwakemi.

¹²Lon ewe ränin ämi oupwe assawa ewe pilük, oupwe pwal eäni asor eman ätemwänin lam eu ierin esap wor terin, pwe eu asoren kek ngeni ewe Samol mi Lapalap.

¹³Iwe, oupwe afiti ngeni rüanü paun pilawa mi amas o mürina pwe asoren mongö, epwe pwal nofitfengen me apüra. Ei epwe eu asor ewe Samol mi Lapalap a efich pwoon. Nge oupwe pwal afiti ngeni eu kuoch wain pwe asoren ün.

¹⁴Ousap fokun mongö pilawa ika föün irän wiich mi tüün ika föün mi fö tori ewe chök rän oua uwato ei asor ngeni Kot. Ei epwe eu allük oupwe apwönüetä ämi me mwirimwirimi kana seni eu täppin aramas tori eu täppin lon leniemi meinisin.

¹⁵Iwe, oupwe aleani ükükün fisu wik seni sorotän ewe ränin sapat, ewe rän oua uwato ewe pilük fän iten asoren assaw.

¹⁶Lon alimeen rän, sorotän ewe afisuen sapat, oupwe uwato ren ewe Samol mi Lapalap pwal eu asoren mongö seni ekewe föün irän wiich mi fö.

¹⁷Oupwe uwato seni lon en me imwan ruofoch pilawa pwe repwe assaw. Ekewe pilawa repwe för seni rüanü paun pilawa mi amas o mürina, repwe um fiti iis, pwe ämi mwen ua ngeni ewe Samol mi Lapalap.

¹⁸Oupwe pwal afiti ngeni ewe pilawa füman lam eu ierir esap wor terir, pwal eman nienifön ätemwänin kow me ruoman ätemwänin sip. Ekei man repwe eu asoren kek ngeni ewe Samol mi Lapalap fiti ämi asoren mongö me asoren ün. Ei epwe eu asor ewe Samol mi Lapalap a efich pwoon.

¹⁹Oupwe pwal eäni asor eman ätemwänin kuuch fän iten asoren tipis, me ruoman ätemwänin lam eu ierir pwe asoren kinamwe.

²⁰Iwe, ewe souasor epwe assawa ekewe ruoman lam fitifengen me ewe pilawan mwen ua, pwe eu asoren assaw fän mesen ewe Samol mi Lapalap. Ekei asor repwe pin me ren ewe Samol mi Lapalap fän iten ewe souasor.

²¹Iwe, lon ewe chök ränin oupwe asilefeili pwe epwe fis eu mwich mi pin. Ousap föri och angang lon. Iei eu allük mwirimwirimi kana repwe apwönüetä seni eu täppin aramas tori eu täppin lon leniemi meinisin.

²²Iwe, lupwen oupwe kini resin fanüemi, ousap kiniela uän tanipimi tori kiännin, ousap pwal rusifengeni mine a turutiu seni kiniemi wiich. Iwe, oupwe likitirela fän iten chon wöüngau me chon ekis. I ewe Samol mi Lapalap ämi we Kot.

²³Iwe, ewe Samol mi Lapalap a kapas ngeni Moses,

²⁴pwe epwe üreni ekewe aramasen Israel: Lon aeuin ränin ewe afisuen maram oupwe afisi eu ränin asösö mi pin, eu ränin achem fiti tikin rappwa, eu fansoun mwich mi pin.

²⁵Ousap föri och angang lon, nge oupwe eäni eu asor ngeni ewe Samol mi Lapalap.

²⁶Iwe, ewe Samol mi Lapalap a ngeni Moses ekei allük:

²⁷Lon aengolun ränin ei afisuen maram epwe fis ewe ränin ächächä. Iwe, epwe eu fansoun mwich mi pin fän itemi, nge oupwe echikefel o eäni asor ngeni ewe Samol mi Lapalap.

²⁸Ousap föri och angang lon ewe rän, pun eu ränin ächächä, pwe epwe fis asoren amusamusen tipis fän itemi fän mesen ewe Samol mi Lapalap ämi we Kot.

²⁹Nge iö esap echikefel epwe käriwu seni lein aramasan.

³⁰Are eman epwe föri och angang lon ewe chök rän, ewe Samol mi Lapalap epwe afeiengaua ewe aramas me lein aramasan.

³¹Ousap fokun föri och angang. Iei eu allük oupwe apwönüetä, ämi me mwirimwirimi kana, seni eu täppin aramas tori eu täppin lon leniemi meinisin.

³²Ei rän epwe eu ränin asösön sapat mi pin, ämi oupwe echikefel lon. Seni lekuniolun ewe atiuen ränin ewe maram tori lekuniolun sorotan oupwe apwönüetä ämi asösön sapat.

³³Iwe, ewe Samol mi Lapalap a ngeni Moses ekei allük

³⁴fän iten ekewe aramasen Israel: Lon engol me limuen ränin ewe afisuen maram epwe fis ewe chulapen likachoch ngeni ewe Samol mi Lapalap lon ükükün fisu rän.

³⁵Lon aeuin rän epwe fis eu mwich mi pin. Ousap föri och angang lon.