Lifitikos 22:7-33

⁷Nge lupwen akkar a tuputiu, epwe limöch. Mürin a tongeni mongö seni ekewe asor mi pin, pun ekei asor anan.

⁸Iwe, esap ochoch eman man mi püsin mäla ika eman mi mäla ren manmwacho, pun epwe limengau ren: Ngang ewe Samol mi Lapalap.

⁹Ekewe souasor meinisin repwe apwönüetä ai kewe allük, pwe resap atoto tipis wor o mäla pokiten ar lükümach ngeni ai kewe allük. Ngang ewe Samol mi Lapalap üa apiniir.

¹⁰Iwe, esap wor eman me lükün familien ewe souasor a tongeni mongö seni ewe asor mi pin, sap mwo nge eman wasölan ewe souasor ika eman nöün chon angang mi mö a tongeni mongö seni.

¹¹Nge are eman souasor a möni ren moni eman amanau pwe nöün, ika eman amanau a uputiu lon imwan, ätewe epwe tongeni mongö seni enen ewe souasor.

¹²Iwe, are nöün eman souasor fefin a pwüpwülüwu lükün an ainang, neminewe esap tongeni mongö seni ekewe asor mi pin.

¹³Nge are eman fefin nöün eman souasor a mä pwülüan ika mwü seni pwülüan, esap pwal wor nöün, are a liwiniti imwen saman pwe a usun chök lekükünün, neminewe a tongeni mongö seni enen saman. Nge eman me lükün familien ewe souasor esap tongeni mongö seni.

¹⁴Iwe, are eman aramas lükün familien souasor a mongö och seni ewe asor mi pin fän chechengau, ätewe epwe uwato siwilin ren ewe souasor, nge epwe pacheetä eu lelimu ngeni mine a angei.

¹⁵Iwe, ekewe souasor resap fokun apiningaua än ekewe aramasen Israel asor mi pin ra eäni asor ngeniei

¹⁶ren ar mwüt ngeni ekewe aramas pwe repwe mongö seni ekewe asor mi pin. Ren ei repwe atoto tipis me pupungau wor. Pun ngang ewe Samol mi Lapalap üa apini ekewe asor.’”

¹⁷Iwe, ewe Samol mi Lapalap a pwal kapas ngeni Moses,

¹⁸pwe epwe ngeni Aaron me nöün kewe mwän pwal ekewe aramasen Israel meinisin ekei allük: Are eman me lein chon Israel ika eman me lein ekewe chon ekis mi wasöla lon Israel a uwato an asor ngeni ewe Samol mi Lapalap, ese lifilifil ika mön eu pwon ika eu asor seni püsin letipan pwe eu asoren kek,

¹⁹epwe chök uwato eman ätemwänin kow ika sip ika kuuch esap wor terin, pwe Kot epwe etiwa.

²⁰Iwe, ousap eäni asor eman man a wor terin, pun Kot esap etiwa ei sokun asor senikemi.

²¹Nge are eman a eäni asor eu asoren kinamwe ngeni ewe Samol mi Lapalap, pwe epwe apwönüetä an pwon ika epwe chök asor seni püsin letipan, epwe uwato seni lein nöün kow ika sip eman man mi mürina, esap fokun wor terin, pwe Kot epwe etiwa.

²²Iwe, ousap eäni asor ngeni ewe Samol mi Lapalap eman man mi chun ika ter ika pök, ousap pwal uwato eman mi pu seni och chönü ika kilingau ika fas. Ousap eäniir le asor won ewe rongen asor ngeni ewe Samol mi Lapalap.

²³Iwe, eman kow ika eman sip mi wor efoch pechen a kon langatam ika mochomoch oua tongeni uwato fän iten asor seni püsin letipemi. Nge ei sokun man esap tufich ngeni asoren pwon.

²⁴Ousap eäni asor ngeni ewe Samol mi Lapalap eman man mi mwochol föün ochoun ika pachach ika pök ika kinas. Ousap fokun föri ei sokun lapalap lon fanüemi.

²⁵Ousap pwal eäni asor ei sokun man oua angei me ren eman chon ekis pwe asoren mongö ngeni ämi Kot. Iwe, a wor terir, iei mine Kot esap etiwa ewe asor senikemi.

²⁶Iwe, ewe Samol mi Lapalap a ngeni Moses ekei allük:

²⁷Are a uputiu eman apanen kow ika sip ika kuuch, ewe apanan epwe nom ren inelapan lon ükükün fisu rän. Nge seni ewe awaluen rän oua tufichin eäni asor ngeni ewe Samol mi Lapalap.

²⁸Iwe, ese lifilifil ika ewe inelap eman kow ika eman sip, ousap nipökü ewe inelap me apanan lon eu chök rän.

²⁹Are oua eäni asor eu asoren kilisou ngeni ewe Samol mi Lapalap, oupwe asor lon pwüngüöchün ewe angang, pwe Kot epwe etiwakemi.

³⁰Oupwe ochoch ewe mönün asor lon ewe chök rän oua eäni asor, nge ousap likiti och tori lesosor.

³¹Iei alon ewe Samol mi Lapalap, “Oupwe aleasochisi ai kewe allük o föriir. Ngang ewe Samol mi Lapalap.

³²Ousap aitengaua itei mi pin, pun ngang üpwe pin me ren ekewe aramasen Israel. Ngang ewe Samol mi Lapalap mi apinikemi.

³³Üa emwenikemiiwu seni ewe fanü Isip pwe üpwe ämi Kot: Ngang ewe Samol mi Lapalap.”