Lifitikos 19:4-21

⁴Ousap kul seniei o fel ngeni uluulun anümwäl, ousap pwal föri fän itemi uluulun kot seni mächä, pun ngang ewe Samol mi Lapalap ämi we Kot.

⁵Lupwen oupwe eäni asoren kinamwe ngeniei ngang ewe Samol mi Lapalap, oupwe föri pwüngün ewe asor, pwe ngang üpwe etiwa.

⁶Oupwe ochoch ewe mönün asor oua eäni lon ewe chök rän ika sorotän ewe rän. Nge mine a lusun tori aülüngatin rän oupwe kenala.

⁷Iwe, are oupwe ochoch och seni ewe mönün asor lon aülüngatin rän, epwe eu föför mi anioput, ngang üsap etiwa ewe asor.

⁸Iteiten eman mi ochoch ei sokun asor epwe püsin angei chappen an föför pokiten an apiningaua eu mettoch mi pin me ren ewe Samol mi Lapalap. Iwe, ewe aramas epwe käriwu me lein aramasan.

⁹Iwe, lupwen oupwe kini resin fanüemi, ousap kiniela uän tanipimi tori kiännin, ousap pwal rusifengeni mine a turutiu seni kiniemi wiich.

¹⁰Ousap kiniela uän fotämi irän wain meinisin, ousap pwal rusi ekewe uän irän wain mi morotiu lon tanipimi. Oupwe likitirela fän iten ekewe chon wöüngau me ekewe chon ekis, pun ngang ewe Samol mi Lapalap ämi we Kot.

¹¹Ousap solä, ousap pwal atuputup ika chofana ngeni chon arumi.

¹²Ousap akapelmwäli itei, pwe ousap apiningaua itei ren. Ngang ewe Samol mi Lapalap ämi we Kot.

¹³Ousap ariaföüü chon arumi, ousap pwal angei och seni fän pöchökül. Ousap mwo nge amwöchü liwinin eman chon angang lon unusen eu pwin tori lesosor.

¹⁴Ousap turunufasei eman mi selingepüng, ousap pwal likatupu eman mi mesechun. Nge oupwe meninitiei, pun ngang ewe Samol mi Lapalap ämi we Kot.

¹⁵Ousap sorei mine a pwüng lon ämi kapwüng. Ousap peni eman mi wöüngau ika awina eman mi lap, nge oupwe eäni kapwüng ngeni chon arumi fän pwüng.

¹⁶Ousap fetalfeil lein aramasemi o luapas, ousap pwal föri och mi afeiengau ngeni manauen chon arumi, pun ngang ewe Samol mi Lapalap.

¹⁷Kosap oput pwiüm lon lelukom, nge kopwe fönöü chon arum, pwe kosap tolong lon tipis pokitan.

¹⁸Kosap püsin ngeni ätewe mi tipis ngonuk chappen an föför, kosap pwal chou ngeni eman lein aramasom. Nge kopwe echeni chon arum usun püsin om echenuk, pun ngang ewe Samol mi Lapalap.

¹⁹Iwe, kopwe aleasochisi ai kewe allük: Kosap apwüpwülüafengeni sokopaten man, kosap amora ruu sokun föün irä lon eu chök tanipi, kosap pwal üföüf echö üf seni ruu sokun kireen mangaku.

²⁰Iwe, are eman mwän a lisowu ngeni eman amanau fefin mi fen kofot ngeni eman, nge neminewe esap mwo kamö, esap pwal mwo ngasala, epwe fokun fis kapwüng ngeniir, nge resap ninnila, pun neminewe esap mwo ngas.

²¹Ewe mwän epwe uwato eman ätemwänin sip leasamalapen ewe imw mangaku ia aramas ra churiei ie, pwe an asoren pupungau ngeniei ngang ewe Samol mi Lapalap.