Lifitikos 19:16-37

¹⁶Ousap fetalfeil lein aramasemi o luapas, ousap pwal föri och mi afeiengau ngeni manauen chon arumi, pun ngang ewe Samol mi Lapalap.

¹⁷Kosap oput pwiüm lon lelukom, nge kopwe fönöü chon arum, pwe kosap tolong lon tipis pokitan.

¹⁸Kosap püsin ngeni ätewe mi tipis ngonuk chappen an föför, kosap pwal chou ngeni eman lein aramasom. Nge kopwe echeni chon arum usun püsin om echenuk, pun ngang ewe Samol mi Lapalap.

¹⁹Iwe, kopwe aleasochisi ai kewe allük: Kosap apwüpwülüafengeni sokopaten man, kosap amora ruu sokun föün irä lon eu chök tanipi, kosap pwal üföüf echö üf seni ruu sokun kireen mangaku.

²⁰Iwe, are eman mwän a lisowu ngeni eman amanau fefin mi fen kofot ngeni eman, nge neminewe esap mwo kamö, esap pwal mwo ngasala, epwe fokun fis kapwüng ngeniir, nge resap ninnila, pun neminewe esap mwo ngas.

²¹Ewe mwän epwe uwato eman ätemwänin sip leasamalapen ewe imw mangaku ia aramas ra churiei ie, pwe an asoren pupungau ngeniei ngang ewe Samol mi Lapalap.

²²Ren ei ätemwänin sip ewe souasor epwe föri asoren amusamusen tipis fän mesei ngang ewe Samol mi Lapalap fän iten än ewe mwän tipis. Iwe, ewe tipis ätewe a föri epwe mus seni.

²³Lupwen oupwe tolong lon ewe fanü Kanaan o fotuki sokopaten irän mongö, ousap eni uar lon ükükün ülüngat ier, pun ra pin ngenikemi.

²⁴Iwe, lon ewe arüanün ier uar meinisin repwe eu asoren kilisou mi pin fän itei ngang ewe Samol mi Lapalap.

²⁵Nge lon ewe alimuen ier oua tongeni eni uar. Ren ei uän fotämi irä repwe chomongola. Ngang ewe Samol mi Lapalap ämi we Kot.

²⁶Ousap ochoch och fituk a chüen wor cha lon. Ousap föri angangen pwee ika pöüt.

²⁷Ousap pwal fichi meten möküren asen selingemi ika amocha alüsemi.

²⁸Ousap nekelekei inisimi fän iten mönümä, ousap ichi sokopaten lios womi. Ngang ewe Samol mi Lapalap. x Lif 21.5; Tut 14.1

²⁹Kosap turunufasei noum fefin ren om mwüt ngeni pwe epwe amömö inisin fän iten lisowu, pwe ewe fanü esap wiliti fanüen chon lisowu, esap pwal uren föföringau.

³⁰Kopwe pinini ai ränin sapat o meniniti imwei mi pin. Ngang ewe Samol mi Lapalap.

³¹Kosap feila ren watawa ika ren sourong, kosap angei ar öüröür, pwe kosap limengau rer. Ngang ewe Samol mi Lapalap om we Kot.

³²Kopwe ütä me mwen eman mi pwech möküran o asamolu ekewe chinlap, kopwe meninitiei ngang ewe Samol mi Lapalap om we Kot.

³³Iwe, lupwen eman chon ekis a wasöla lon fanüemi, ousap kirikiringau ngeni.

³⁴Ewe chon ekis mi nom remi epwe usun chök eman re wilipos leimi. Kopwe echeni i usun püsin om echenuk, pun ämi oua fen piin wasöla lon ewe fanü Isip. Ngang ewe Samol mi Lapalap ämi we Kot.

³⁵Iwe, ousap eäni sokun aükük mi solä, lupwen oua aükük langatam, chou ika iteit.

³⁶Oupwe nöünöü kilo me föün kilo mi pwüngüöch, pwal eu aükük mi pwüngüöch. Ngang ewe Samol mi Lapalap ämi we Kot mi emwenikemiiwu seni ewe fanü Isip.

³⁷Iwe, oupwe aleasochisi ai kewe allük me pwüüng meinisin o apwönüretä: Ngang ewe Samol mi Lapalap.”