Lifitikos 14:3-38

³nge ewe souasor epwe feila lükün ewe leni ia aramas ra nonom ie. Iwe, ewe souasor epwe nenengenöchü ewe chon samau. Nge are ewe kilingau mi afeiengau a mola seni,

⁴ewe souasor epwe allük pwe repwe uwato fän iten ewe epwe limelim ruoman machang mi manau o limöch, mwüch seni ewe irä itan setar, ekam mangaku mi par pwal ülün ewe irä itan isop.

⁵Iwe, ewe souasor epwe allük pwe repwe niela eman me lein ekewe machang asen eu sepi mi för seni pwül, nge lon ewe sepi epwe wor koluk mi mürina.

⁶Mürin epwe angei ewe machang mi chüen manau fiti ewe mwüch seni ewe irä setar, ewe ekam mangaku mi par me ülün ewe irä isop, o atukurelong lon chan ewe machang a fen ninnila asen ewe koluk mi mürina.

⁷Iwe, epwe äsupu ewe cha fän fisu won ewe aramas, pwe epwe limöch seni an kilingau mi afeiengau. Mürin, ewe souasor epwe anomu ewe aramas lon tettelin chon limöch, epwe pwal ässala ewe machang mi chüen manau lemäl.

⁸Nge ewe aramas mi mochen limöch epwe sopuni üfan o räisöü ülöülan meinisin, epwe pwal tütü pwe epwe limöch. Mürin a tongeni tolong lon ewe leni ia aramas ra nonom ie, nge epwe chök nom lükün imwan lon ükükün fisu rän.

⁹Iwe, lon afisuen rän epwe räisöüla möküran meinisin pwal alüsan me fötün, epwe pwal räisöü ülöülan meinisin. Mürin epwe sopuni üfan o tütü. Iwe, epwe limöch.

¹⁰Nge lon awaluen rän epwe uwato ruoman ätemwänin lam me eman liefefinin lam eu ierir esap wor terir. Epwe pwal uwato limu paun pilawa mi amas o mürina a nofitfengen me apüra, pwal ina epwe ükükün esop kuoch noppuk.

¹¹Iwe, ewe souasor mi föri ewe angangen limelim epwe emwenato ewe aramas mi mochen limelim fiti an kewe asor mwen ewe Samol mi Lapalap leasamalapen ewe imw mangaku ia aramas ra churi Kot ie.

¹²Mürin, ewe souasor epwe angei eman me lein ekewe ätemwänin lam o eäni asor fän iten asoren pupungau fitifengen me ewe esop kuoch noppuk. Iwe, epwe assaweer fän mesen ewe Samol mi Lapalap pwe eu asoren assaw.

¹³Mürin epwe niela ewe lam lon ewe leni mi pin, ewe ia ra niela ie ewe mönün asoren tipis me ewe mönün asoren kek. Pun ewe asoren pupungau inetin ewe souasor usun chök ewe asoren tipis, a pwal unusen pin.

¹⁴Iwe, ewe souasor epwe angei ekis chan ewe mönün asoren pupungau o tofi ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen.

¹⁵Mürin, ewe souasor epwe angei ekis seni ewe esop kuoch noppuk o ninalong lon pelimöngün püsin pöün.

¹⁶Iwe, epwe atukalong aütün pelifichin pöün lon ewe noppuk o äsupu fän fisu ekis seni ewe noppuk fän mesen ewe Samol mi Lapalap.

¹⁷Nge ekis seni ewe noppuk mi chüen nom lepöün epwe tofi ngeni emin fän pelifichin selingen ätewe mi mochen limöch, pwal ngeni aütün pelifichin pöün me pechen. Nge epwe chök tofätä ewe noppuk won ewe ia a fen tofätä ie chan ewe mönün asoren pupungau.

¹⁸Iwe, lusun ewe noppuk mi chüen nom lepöün epwe epiti ngeni möküren ätewe mi mochen limöch. Ren ei ewe souasor epwe föri asoren amusamusen tipis fän iten ewe aramas fän mesen ewe Samol mi Lapalap.

¹⁹Mürin, ewe souasor epwe eäni ewe asoren tipis, pwe epwe föri asoren amusamusen tipis fän iten ätewe mi mochen limöch seni an limengau. Nge mürin epwe niela ewe mönün asoren kek.

²⁰Iwe, ewe souasor epwe keni ewe asoren kek me ewe asoren mongö won ewe rongen asor. Iei usun ewe souasor epwe föri asoren amusamusen tipis fän iten ewe aramas. Iwe, epwe limöch.

²¹Nge are ewe aramas a wöüngau pwe esap tufich ngeni an epwe uwato ei ükükün, epwe chök uwato eman ätemwänin lam fän iten asoren pupungau epwe assaw, pwe epwe fis asoren amusamusen tipis fän itan. Epwe pwal uwato ruu paun pilawa mi amas o mürina nofitfengen me apüra fän iten asoren mongö, pwal ina epwe ükükün esop kuoch noppuk.

²²Iwe, epwe pwal uwato ruoman lisom ika ruoman apansüsün lisom ükükün chök an tongeni, eman epwe fän iten asoren tipis, nge ewe eman epwe fän iten asoren kek.

²³Iwe, lon awaluen rän epwe uwato ekei mönün asor fän iten an limelim ren ewe souasor leasamalapen ewe imwenfel seni mangaku mwen ewe Samol mi Lapalap.

²⁴Mürin, ewe souasor epwe angei ewe lam me ewe esop kuoch noppuk fän iten asoren pupungau o assaweer fän mesen ewe Samol mi Lapalap, pwe eu asoren assaw.

²⁵Iwe, ewe souasor epwe niela ewe lam fän iten asoren pupungau. Mürin epwe angei ekis chan o tofi ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen.

²⁶Epwe pwal ninalong ekis ewe noppuk lon pelimöngün püsin pöün

²⁷o äsupu fän fisu ekis seni ewe noppuk ren aütün pelifichin pöün fän mesen ewe Samol mi Lapalap.

²⁸Mürin, ewe souasor epwe tofi ekis seni ewe noppuk mi chüen nom lepöün ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen. Nge epwe chök tofätä ewe noppuk won ewe ia a fen tofätä ie chan ewe mönün asoren pupungau.

²⁹Iwe, lusun ewe noppuk mi chüen nom lepöün ewe souasor epwe epiti ngeni möküren ätewe mi mochen limöch, pwe epwe föri asoren amusamusen tipis fän itan fän mesen ewe Samol mi Lapalap.

³⁰Mürin, epwe eäni asor ekewe ruoman lisom ika ekewe ruoman apansüsün lisom ükükün än ewe aramas tongeni.

³¹Epwe eäni asor eman fän iten asoren tipis, nge ewe eman fän iten asoren kek fitifengen me ewe asoren mongö. Iei usun ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi mochen limöch.

³²Iei ewe allük fän iten ewe aramas mi eäni ewe kilingau mi afeiengau esap tufich ngeni an epwe uwato ekewe sokun asor fän iten an limelim.”

³³Iwe, ewe Samol mi Lapalap a üreni Moses me Aaron,

³⁴“Lupwen oupwe tolong lon ewe fanü Kanaan üpwe ngenikemi pwe fanüemi, nge üpwe awora eu nuumw mi chöfetal lon eu imw won fanüemi,

³⁵ätewe imwan ewe epwe feito o asile ngeni ewe souasor, ‘Üa küna och me lon imwei mi usun chök nuumw.’

³⁶Mürin, ewe souasor epwe allük pwe chon ewe imw repwe towu seni fiti pisekir me mwen an epwe tolong pwe epwe nenengenöchü ewe nuumw, pwe esap wor och mettoch mi nom lon ewe imw epwe tolong lon tettelin limengau. Mürin, ewe souasor epwe tolong lon ewe imw

³⁷o nenengenöchü ewe nuumw. Nge are anüen ewe nuumw mi nom won etippen ewe imw a aroanüen fetil ika aroanüepar, are ewe nuumw a pwal ekis pwangenalong ewe etip,

³⁸ewe souasor epwe towu me lon asamalapen ewe imw o lokkenala lon ükükün fisu rän.