Lifitikos 13:4-27

⁴Nge are ewe kilingau a pwechepwech won, nge esap enalong silin, are ülöülan resap pwal pwechela, ewe souasor epwe aimwüela ewe aramas lon ükükün fisu rän.

⁵Iwe, lon ewe afisuen rän ewe souasor epwe nenengenöchüsefäli ewe aramas. Nge are a küna pwe ewe kil esap lapala, esap pwal töfetal won silin, ewe souasor epwe aimwüela ewe aramas pwal lon ükükün fisu rän.

⁶Iwe, lon afisuen rän ewe souasor epwe nenengenöchüsefäli ewe aramas. Nge are ewe kil a aromomo, esap pwal töfetal won silin, ewe souasor epwe anomu lon tettelin chon limöch. Ewe kil och tir echök. Ewe aramas epwe sopuni üfan, mürin epwe limöch.

⁷Nge are ewe tir a töfetal won silin ewe aramas mürin an pwäri ngeni ewe souasor inisin o nom lon tettelin chon limöch, ewe aramas epwe liwinsefälila ren ewe souasor.

⁸Iwe, ewe souasor epwe nenengenöchüsefäli ewe aramas. Nge are ewe tir a töfetal won silin, ewe souasor epwe anomu ewe aramas lon tettelin chon limengau, pun a eäni och kilingau mi afeiengau.

⁹Iwe, are eman aramas a eäni och kilingau mi afeiengau, repwe emwenala ewe aramas ren ewe souasor,

¹⁰pwe epwe nenengenöchü. Nge are a wor eu pwo mi pwechepwech o ülöülen ewe ia a pwo ie ra pwechela, are a pwal parapar fituken lon ewe pwo,

¹¹iei eu kilingau mi afeiengau won inisin ewe aramas mi nom seni chök me lom. Iwe, ewe souasor epwe anomu i lon tettelin chon limengau. Esap chüen aimwüela ewe aramas ren an epwe nenengenisefäli, pun a fen limengau.

¹²Nge are ewe souasor a küna pwe ewe kilingau a rangewu won inisin ewe aramas o chöüla won inisin seni won möküran tori pechen,

¹³ewe souasor epwe nenengenöchü ewe aramas. Are ewe kilingau mi afeiengau a pwölüela unusen inisin, ewe souasor epwe anomu ewe aramas lon tettelin chon limöch. Iwe, pokiten unusen inisin a pwechela, a limöch.

¹⁴Nge are a pwä fituk mi parapar won inisin ewe aramas, epwe limengau.

¹⁵Iwe, ewe souasor epwe nenengenöchü ewe fituk mi parapar o anomu ewe aramas lon tettelin chon limengau. Fituk mi parapar a limengau, pun iei eu kilingau mi afeiengau.

¹⁶Nge are ewe fituk mi parapar won ewe aramas a siwil ngeni fituk mi pwechepwech, epwe feito ren ewe souasor.

¹⁷Iwe, ewe souasor epwe nenengenöchü ewe aramas. Nge are ewe kil a pwechela, ewe souasor epwe anomu ewe chon samau lon tettelin chon limöch, pun a limöch.

¹⁸Are a wor eu mach mi fen mo won inisin eman aramas,

¹⁹nge mürin a pwüküwu eu pwo mi pwech lerasen ewe mach ika eu pwo mi tikeparepwech, ewe aramas epwe aküna ngeni ewe souasor inisin.

²⁰Iwe, ewe souasor epwe nenengenöchü machen ewe aramas. Pun ika a pwä pwe ewe kil lon ewe mach a enalong silin o ülöülan ra pwechela, ewe souasor epwe anomu ewe aramas lon tettelin chon limengau. Iei eu kilingau mi afeiengau a pwüküwu me lon ewe mach.

²¹Are ewe souasor a nenengenöchü ewe mach o küna pwe ülöülen won resap pwechela, are ewe kil lon esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän.

²²Nge are ewe kil a töfetal won inisin ewe aramas, ewe souasor epwe anomu lon tettelin chon limengau, pun iei eu kilingau mi afeiengau.

²³Nge ika ewe kil esap lapala, esap pwal töfetal, a chök eu lemomon mach. Iwe, ewe souasor epwe anomu ewe aramas lon tettelin chon limöch.

²⁴Are eman a kar, nge mürin ewe kar a wiliti eu kil mi tikeparepwech ika pwech,

²⁵ewe souasor epwe nenengenöchü ewe kar. Nge are ülöülen ewe ia a kar ie a pwechela, are ewe kil a pwal enalong silin, iei eu kilingau mi afeiengau. Iwe, ewe souasor epwe anomu ewe aramas lon tettelin chon limengau, pun a samaun rupun pwötür.

²⁶Are ewe souasor a nenengenöchü ewe kar o küna pwe ülöülen won resap pwechela, are ewe kil esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän.

²⁷Iwe, lon afisuen rän ewe souasor epwe nenengenisefäli ewe aramas. Nge are ewe kil a töfetal won inisin, ewe souasor epwe anomu ewe aramas lon tettelin chon limengau, pun iei eu kilingau mi afeiengau.