Lifitikos 13:18-36

¹⁸Are a wor eu mach mi fen mo won inisin eman aramas,

¹⁹nge mürin a pwüküwu eu pwo mi pwech lerasen ewe mach ika eu pwo mi tikeparepwech, ewe aramas epwe aküna ngeni ewe souasor inisin.

²⁰Iwe, ewe souasor epwe nenengenöchü machen ewe aramas. Pun ika a pwä pwe ewe kil lon ewe mach a enalong silin o ülöülan ra pwechela, ewe souasor epwe anomu ewe aramas lon tettelin chon limengau. Iei eu kilingau mi afeiengau a pwüküwu me lon ewe mach.

²¹Are ewe souasor a nenengenöchü ewe mach o küna pwe ülöülen won resap pwechela, are ewe kil lon esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän.

²²Nge are ewe kil a töfetal won inisin ewe aramas, ewe souasor epwe anomu lon tettelin chon limengau, pun iei eu kilingau mi afeiengau.

²³Nge ika ewe kil esap lapala, esap pwal töfetal, a chök eu lemomon mach. Iwe, ewe souasor epwe anomu ewe aramas lon tettelin chon limöch.

²⁴Are eman a kar, nge mürin ewe kar a wiliti eu kil mi tikeparepwech ika pwech,

²⁵ewe souasor epwe nenengenöchü ewe kar. Nge are ülöülen ewe ia a kar ie a pwechela, are ewe kil a pwal enalong silin, iei eu kilingau mi afeiengau. Iwe, ewe souasor epwe anomu ewe aramas lon tettelin chon limengau, pun a samaun rupun pwötür.

²⁶Are ewe souasor a nenengenöchü ewe kar o küna pwe ülöülen won resap pwechela, are ewe kil esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän.

²⁷Iwe, lon afisuen rän ewe souasor epwe nenengenisefäli ewe aramas. Nge are ewe kil a töfetal won inisin, ewe souasor epwe anomu ewe aramas lon tettelin chon limengau, pun iei eu kilingau mi afeiengau.

²⁸Nge are ewe kil esap lapala, esap pwal töfetal won silin pwe a aromomo, a chök eu pwo seni ewe kar. Iwe, ewe souasor epwe anomu ewe aramas lon tettelin chon limöch, pun iei eu lemomon kar.

²⁹Are eman mwän ika eman fefin a kilingau won möküran ika won ngächin,

³⁰ewe souasor epwe nenengenöchü ewe kilingau. Nge are ewe kilingau a enalong silin, are ülöülen won ra pwal oleol o ülöngau, ewe souasor epwe anomu ewe aramas lon tettelin chon limengau. Iei eu kil mi pwerik, eu kilingau mi afeiengau won möküran ika won ngächin.

³¹Nge are ewe souasor a nenengenöchü ewe kilingau mi pwerik o küna pwe esap enalong silin, esap pwal wor ülöülan mi chol won, ewe souasor epwe aimwüela ewe aramas mi üri kilingau mi pwerik lon ükükün fisu rän.

³²Iwe, lon afisuen rän ewe souasor epwe nenengenöchüsefäli kilingauen ewe aramas. Nge are ewe kil mi pwerik esap lapala, are esap wor ülöülen won mi oleol, esap pwal enalong silin,

³³ewe aramas epwe räisöü, nge esap räisöü won ewe kil mi pwerik. Mürin, ewe souasor epwe aimwüela ewe aramas pwal lon ükükün fisu rän.

³⁴Iwe, lon afisuen rän ewe souasor epwe nenengenöchüsefäli kilingauen ewe aramas. Nge are ewe kil mi pwerik esap lapala, esap pwal enalong silin, ewe souasor epwe anomu ewe aramas lon tettelin chon limöch. Iwe, epwe sopuni üfan, mürin epwe limöch.

³⁵Nge are ewe kil mi pwerik a töfetal won inisin mürin an nom lon tettelin chon limöch,

³⁶ewe souasor epwe nenengenöchüsefäli ewe aramas. Pun ika ewe kil mi pwerik a töfetal won inisin, ewe souasor esap chüen ekiekin kütta ewe ülöül mi oleol, pun ewe aramas a limengau.