Lifitikos 11:27-37

²⁷Iwe, ekewe man mi fetal won pöür me pecher, nge a chök wor kün aütür, repwe limengau ngenikemi. Eman mi atapa ekei man men mä epwe limengau.

²⁸Nge eman mi uwei ekei man men mä epwe sopuni üfan o limengau tori lekuniol. Ekei man repwe limengau ngenikemi.

²⁹Iwe, ikkei ir ekewe mantötö mi tö won pwül repwe limengau ngenikemi: eman man itan wisel, nakich, sokopaten koluf,

³⁰litopach, niparoch, kuel, sokun kuel mi nom leppi me niküch.

³¹Ekei man me lein ekewe mantötö repwe limengau ngenikemi. Eman mi atapa inisir men mä epwe limengau tori lekuniol.

³²Nge ika eman lein ekei man a mäla o turutiu won och mettoch, ewe mettoch epwe limengau, ese lifilifil ika a för seni mwüch, ika echö üf, ika silin man, ika eu tuk, ika sokopaten sepi aramas ra aea. Iwe, ewe mettoch epwe soso lon koluk, epwe pwal limengau tori lekuniol, nge mürin epwe limöch.

³³Iwe, are eman me lein ekewe man men mä epwe turulong lon eu sepi mi för seni pwül, meinisin mine a nom lon epwe limengau, kopwe pwal amökkü ewe sepi.

³⁴Nge are chichin ewe sokun sepi mi limengau a niti och mongö, ewe mongö epwe limengau, pwal kolukun ün mi nom lon epwe limengau.

³⁵Iwe, are eman lein ekewe kükün man men mä a torii och mettoch, epwe limengau, ese lifilifil ika eu lenien um ika eu sitof, repwe chök katala. Iwe, ekei mettoch ra limengau, repwe pwal limengau ngenikemi.

³⁶Nge ika ewe man epwe turulong lon kolukun eu miich ika eu chönüttu, epwe chök limöch. Iwe, nge mine a torii ekewe kükün man men mä epwe limengau.

³⁷Are eman lein ekewe kükün man men mä a turutiu won föün irä fän iten fofot, ekewe föün irä repwe chök limöch.