Lifitikos 11:1-8

¹Iwe, ewe Samol mi Lapalap a kapas ngeni Moses me Aaron,

²“Oupwe üreni ekewe aramasen Israel, ‘Ikkei ir ekewe mönümanau oua tongeni ochoch me lein man meinisin won fanüfan:

³Oua tongeni ochoch ekewe man meinisin mi keang kün pachapacher o lülüsefäli ener.

⁴Nge ousap ochoch ekewe man mi chök lülüsefäli ener ika keang chök kün pachapacher: Ewe kamel epwe limengau ngenikemi, pun a lülüsefäli anan, nge esap keang kün pachapachan.

⁵Pwal ewe man itan pächer mi nom won achau epwe limengau ngenikemi, pun a lülüsefäli anan, nge esap keang kün pachapachan.

⁶Iwe, ewe üsangi epwe limengau ngenikemi, pun a lülüsefäli anan, nge esap keang kün pachapachan.

⁷Nge pik epwe pwal limengau ngenikemi, pun a keang kün pachapachan, nge esap lülüsefäli anan.

⁸Ousap fokun ochoch fituken ekei man, ousap pwal fokun atapa ekei man men mä, pun repwe limengau ngenikemi.