Lewitikus 23:4-16

⁴Bêc tonec kêtu Apômtaunê om toê-toê, taŋ eŋ kêkêŋ naŋ. Akalem lau sa êndêŋ ŋanoc gebe akac taôm sa ma alic om dabuŋ tau.

⁵“Êndêŋ ajôŋ ŋamataŋa ŋabêc 14 ŋaêtulala naŋ alic Apômtaunê Om Pasa.

⁶Ma êndêŋ ajôŋ tonaŋgeŋ ŋabêc 15 alic Apômtaunê om Polom Ŋalucŋa. Êndêŋ bêc 7 aniŋ polom ŋaluc.

⁷Êndêŋ bêc ŋamataŋa tonaŋ akac sa to alic om dabuŋ. Anam kôm teŋ atom.

⁸Mago akêŋ daja êndêŋ Apômtau êtôm bêc 7 tonaŋ ma êndêŋ bêc êtu 7 oc alic om dabuŋ teŋ êtiam ma anam kôm atom.”

⁹Ma Apômtau kêsôm gêdêŋ Mose gebe

¹⁰“Ôsôm êndêŋ lau Israel gebe êndêŋ taŋ aô lasê gamêŋ tau, taŋ aê jakêŋ êndêŋ amac ma aniŋ gêŋ lasê naŋ, go amac akêŋ kôm ŋanô ŋamêc êndêŋ dabuŋwaga

¹¹ma eŋ ênsuŋ nêm gêŋ tonaŋ êndêŋ Apômtau êna gebe eŋ êlic amac ŋajam. Sabat su ma ŋaeleŋ dabuŋwaga êŋgôm gêŋ tau.

¹²Ma êndêŋ bêc, taŋ ansuŋ nêm gêŋ tonaŋ naŋ, akêŋ domba ŋalatu kapoac ŋajam teŋ ŋajala tageŋŋa êtu daja êndêŋ Apômtau êwiŋ.

¹³Ma akêŋ da keleŋ tonec êwiŋ gebe polom matac êtôm gêŋ 10 ŋaluagêc sêŋgaluŋ êwiŋ katêkwi êtu daja êndêŋ Apômtau gebe êŋu ŋamalu ŋajam ma akêŋ wain ŋatêkwi kekec teŋ êwiŋ êtu da.

¹⁴Aniŋ polom matac ma sigob me kêsôcŋa teŋ aŋga kôm wakuc atomanô e êndêŋ bêc, taŋ amac akêŋ nêm da êndêŋ nêm Anôtô su acgom. Biŋ tonaŋ êtu ŋagôliŋ ênêc endeŋ tôŋgeŋŋa teŋ êndêŋ gôlôac to gôlôac êtôm nêm gamêŋgeŋ.”

¹⁵“Sabat, taŋ amac akêŋ da onaŋ su naŋ, ŋaeleŋ go asa woke sa e êtôm woke samuc 7.

¹⁶Asa bêc 50 sa e êtap bêc, taŋ êndaŋguc Sabat êtu 7 naŋ sa, go akêŋ da polom wakucŋa teŋ êndêŋ Apômtau.