Lewitikus 23:19-43

¹⁹Ma akêŋ noniŋ kapoac teŋ êtu da êjô secŋa to domba ŋalatu kapoac luagêc, taŋ ŋajala tageŋ naŋ, êtu dawamaŋa teŋ.

²⁰Ma dabuŋwaga ênsuŋ gêŋ tonaŋ êwiŋ polom ŋamêc êtu da daiŋdaiŋ êndêŋ Apômtau êwiŋ domba ŋalatu luagêc. Gêŋ tau êtu Apômtaunê gêŋ ma dabuŋwaga êwê kaiŋ.

²¹Êndêŋ bêc tau amac akac taôm sa gebe êtu om dabuŋ ma anam kôm kapôêŋ atom. Tonaŋ êtu ŋagôliŋ ênêc endeŋ tôŋgeŋŋa teŋ êtu nêm wakucŋa êtôm amacnêm gamêŋ samob.

²²“Ma êndêŋ taŋ amac anac nêm kôm ŋanô sa naŋ, go anac sa e êndêŋ kôm ŋamadiŋ samucgeŋ atom, ma ajoŋ gêŋ ŋasaliŋ-saliŋ sa êtu ŋamu atom. Awi siŋ êndêŋ lau ŋalêlôm sawa to lau jaba gebe Apômtau, amacnêm Anôtô aê.”

²³Ma Apômtau kêsôm gêdêŋ Mose gebe

²⁴“Ôsôm êndêŋ lau Israel gebe ajôŋ êtu 7 ŋabêc ŋamataŋa êtu bêc lêwaŋŋa ŋanô teŋ êndêŋ amac. Akac sa ma alic om dabuŋ tau toôndugeŋ.

²⁵Anam kôm teŋ atom, mago akêŋ da keleŋ teŋ êndêŋ Apômtau.”

²⁶Ma Apômtau kêsôm gêdêŋ Mose gebe

²⁷“Ajôŋ êtu 7 tonaŋ ŋabêc 10 êtu bêc Omsêga Wamaŋa. Êtu bêc dabuŋ, taŋ amac akac taôm sa ma anam dabuŋ mo to akêŋ daja êndêŋ Apômtau naŋ.

²⁸Ma anam kôm êndêŋ bêc tonaŋ atom gebe bêc Omsêga Wamaŋa, ma sê wama amac êndêŋ Apômtau, amacnêm Anôtô.

²⁹Gebe teŋ embe ênam dabuŋ mo êndêŋ bêc tonaŋ atom, oc senseŋ eŋ su aŋga nê lau nêŋ.

³⁰Ma teŋ embe ênam kôm êndêŋ bêc tonaŋ, aê oc janseŋ eŋ su aŋga nê lau nêŋ amboac tonaŋgeŋ.

³¹Anam kôm teŋ atom. Tonaŋ êtu ŋagôliŋ ênêc endeŋ tôŋgeŋŋa teŋ êndêŋ amacnêm wakuc samob êtôm gamêŋgeŋ.

³²Bêc tonaŋ êtu bêc lêwaŋŋa ŋanô teŋ êndêŋ amac ma anam dabuŋ mo. Alic om tau anac m êndêŋ ajôŋ tonaŋ ŋabêc 9 ŋaêtulala, ma amansaŋ nêm sabat e naêndêŋ ŋabêc 10 ŋaêtulala.”

³³Ma Apômtau kêsôm gêdêŋ Mose gebe

³⁴“Ôsôm êndêŋ lau Israel gebe Êndêŋ ajôŋ tonaŋgeŋ ŋabêc 15 êtu Apômtaunê om sêsam gebe Om Bec. Alic om tonaŋ êtôm bêc 7.

³⁵Êndêŋ bêc ŋamataŋa akac taôm sa gebe alic om dabuŋ teŋ. Anam kôm teŋ atom.

³⁶Êndêŋ bêc 7 tonaŋ akêŋ daja êndêŋ Apômtau. Ma êndêŋ bêc êtu 8 amac akac taôm sa gebe alic om dabuŋ teŋ êtiam ma akêŋ daja teŋ êndêŋ Apômtau. Bêc tonaŋ êtu bêc dabuŋ akac saŋa, tec anam kôm teŋ atom.

³⁷“Apômtaunê om toê-toê tau tonaŋ, taŋ amac asôm lasê gebe akac sa ma anam sakiŋ Apômtau gebe akêŋ daja to da keleŋ ma da têkwi. Da samob tonaŋ akêŋ êndêŋ Apômtau êtôm ŋanoc solopgeŋ.

³⁸Alic om tonaŋ naêwiŋ Apômtaunê sabat to êwiŋ nêm gêŋ ŋagêdô, taŋ ajac mata ma akêŋ kêtu nêm ŋalêlôm kêkac amacŋa gebe akêŋ êndêŋ Apômtau naŋ.”

³⁹“Êndêŋ ajôŋ 7 ŋabêc 15 embe anac nêm kôm ŋanô samob sa êmbacnê naŋ, alic Apômtaunê om êtôm bêc 7. Bêc ŋamataŋa êtu bêc lêwaŋŋa ŋanô teŋ ma bêc êtu 8 amboac tonaŋgeŋ.

⁴⁰Êndêŋ bêc ŋamataŋa amac ajoŋ ka ŋanô ŋajam-ŋajam to tômtôm ŋalauŋ ma lêsô ma atu samuc amoa Apômtau, amacnêm Anôtô, laŋônêm êtôm bêc 7.

⁴¹Alic Apômtaunê om êtôm bêc 7 êtôm jalageŋ. Tonaŋ êtu ŋagôliŋ ênêc endeŋ tôŋgeŋŋa teŋ êndêŋ nêm wakuc samob. Alic om tau êndêŋ ajôŋ êtu 7ŋa.

⁴²Aŋgôŋ bec êtôm bêc 7 tonaŋ. Lau Israel ŋanô samob sêŋgôŋ becgeŋ.

⁴³Gebe nêm wakuc to nêŋ wakuc sêjala gebe aê kakêŋ lau Israel sêŋgôŋ bec gêdêŋ taŋ aê kakôc êsêac sêsa aŋga gamêŋ Aiguptuŋa sêmêŋ naŋ. Apômtau, amacnêm Anôtô aê.”