Lewitikus 19:5-22

⁵“Embe akêŋ da daŋge êndêŋ Apômtau, go akêŋ ŋalêŋ gebe ênac Apômtau mataanô ŋajamgeŋ.

⁶Êndêŋ bêc, taŋ akêŋ da tau naŋ, to bêc, taŋ êndaŋguc naŋ, aniŋ da tau e êmbacnê. Gêŋ ŋagêdô-gêdô, taŋ ênêc e êndêŋ bêc êtu têlêac naŋ, ja êniŋ su.

⁷Ma embe aniŋ êndêŋ bêc êtu têlêac, naŋ oc êtu gêŋ geŋeŋ ma oc ênac aê matocanô ŋajam atom.

⁸Ma teŋ embe êniŋ, oc êtu tôp êndêŋ eŋ gebe eŋ gêgôm Apômtaunê gêŋ dabuŋ teŋ kêtu sec, ma senseŋ eŋ su aŋga nê lau nêŋ.

⁹“Ma êndêŋ taŋ amacnêm gamêŋ ŋakôm ŋanô êsa naŋ, go anac sa e êndêŋ kôm ŋamadiŋ samucgeŋ atom, ma ajoŋ gêŋ ŋasaliŋ-saliŋ sa êtu ŋamu atom.

¹⁰Aŋga nêm kôm wainŋa amboac tonaŋgeŋ ajoŋ gêŋ ŋasaliŋsaliŋ ma akôc ŋanô, taŋ kêsêlô kêsêp nom naŋ, sa atom. Awi siŋ êndêŋ lau ŋalêlôm sawa to lau jaba gebe Apômtau, amacnêm Anôtô aê.

¹¹“Anam geŋgeŋ atom, ma anam launêŋ bôlêŋ auc atom to ansau auc lau atom.

¹²Atôc lemem ansau anam aê laŋôc ma aŋgôm amacnêm Anôtônê ŋaê êtu sec ŋa lêŋ amboac tonaŋ atom gebe Apômtau aê.

¹³“Akôniŋ nêm lau wacbaŋ amacŋa ma ajaŋgo nêŋ gêŋ su atom. Aŋgamiŋ nêm sakiŋwaga nê ŋaôli kômŋa e êndêŋ ŋaeleŋ atom.

¹⁴Apuc boa ŋac taŋasuŋbic to akêŋ gêŋ teŋ êmbôc ŋac matapec nê intêna auc atom. Atêc nêm Anôtô, gebe Apômtau aê.

¹⁵“Amêtôc biŋ eso atom. Ma ambu lau ŋalêlôm sawa ma atoc lau tolêlôm sa êlêlêc atom, mago amêtôc nêm lau wacbaŋ amac ŋa biŋgêdêŋgeŋ.

¹⁶Ôŋga biŋ êpi nêm lau atom. Ma embe ôkô mêtôcwaga laŋônêm naŋ ôkic nêm ŋac wacbaŋ aôm nê biŋ ôwiŋ atom gebe Apômtau aê.

¹⁷“Têmtac endec lasitêwa atom, awa biŋ sa êndêŋ ŋac wacbaŋ amac gebe awê kaiŋ sec êtu eŋŋa atom.

¹⁸Ôkêŋ ŋagêjô ma ôê têmtac ŋandaŋ êndêŋ taômnêm lau teŋ tôŋ atom, mago têmtac êwiŋ lau wacbaŋ aôm amboac têmtac gêwiŋ taôm, gebe Apômtau aê.

¹⁹“Ajop aêŋoc ŋagôliŋ tonec gebe akêŋ bôc kaiŋ luagêc sêŋgêli tauŋ atom. Ma apalip ŋawê kaiŋ luagêc êsêp kôm tageŋ atom, ma asô ŋakwê, taŋ sêwa ŋa gam kaiŋ luagêc kêsêp taulêlôm naŋ atom.

²⁰“Embe ŋac teŋ ênêc êwiŋ awê teŋ, taŋ sê eŋ gêdêŋ ŋac teŋ gebe ênam ôli êtu ênê gêŋômao, mago gêjam ôli su me sêwi eŋ siŋ su atom tageŋ naŋ, go akêŋ ŋagêjô, mago êsêagêc sêmac êndu lulugeŋ atom, gebe sêwi awê siŋ kêtu taunê ŋatauo su atom tageŋ.

²¹Mago ŋac tau êkôc domba kapoac teŋ êna becobo ŋakatam gebe êkêŋ êtu datôp êndêŋ Apômtau êtu eŋ tauŋa.

²²Ma dabuŋwaga ê wama ŋac tau ŋa domba kapoac datôpŋa tonaŋ êkô Apômtau laŋônêm êtu sec, taŋ eŋ gêgôm naŋŋa. Ma Anôtô oc êsuc sec, taŋ ŋac tau gêgôm naŋ, ôkwi.