Lewitikus 19:12-35

¹²Atôc lemem ansau anam aê laŋôc ma aŋgôm amacnêm Anôtônê ŋaê êtu sec ŋa lêŋ amboac tonaŋ atom gebe Apômtau aê.

¹³“Akôniŋ nêm lau wacbaŋ amacŋa ma ajaŋgo nêŋ gêŋ su atom. Aŋgamiŋ nêm sakiŋwaga nê ŋaôli kômŋa e êndêŋ ŋaeleŋ atom.

¹⁴Apuc boa ŋac taŋasuŋbic to akêŋ gêŋ teŋ êmbôc ŋac matapec nê intêna auc atom. Atêc nêm Anôtô, gebe Apômtau aê.

¹⁵“Amêtôc biŋ eso atom. Ma ambu lau ŋalêlôm sawa ma atoc lau tolêlôm sa êlêlêc atom, mago amêtôc nêm lau wacbaŋ amac ŋa biŋgêdêŋgeŋ.

¹⁶Ôŋga biŋ êpi nêm lau atom. Ma embe ôkô mêtôcwaga laŋônêm naŋ ôkic nêm ŋac wacbaŋ aôm nê biŋ ôwiŋ atom gebe Apômtau aê.

¹⁷“Têmtac endec lasitêwa atom, awa biŋ sa êndêŋ ŋac wacbaŋ amac gebe awê kaiŋ sec êtu eŋŋa atom.

¹⁸Ôkêŋ ŋagêjô ma ôê têmtac ŋandaŋ êndêŋ taômnêm lau teŋ tôŋ atom, mago têmtac êwiŋ lau wacbaŋ aôm amboac têmtac gêwiŋ taôm, gebe Apômtau aê.

¹⁹“Ajop aêŋoc ŋagôliŋ tonec gebe akêŋ bôc kaiŋ luagêc sêŋgêli tauŋ atom. Ma apalip ŋawê kaiŋ luagêc êsêp kôm tageŋ atom, ma asô ŋakwê, taŋ sêwa ŋa gam kaiŋ luagêc kêsêp taulêlôm naŋ atom.

²⁰“Embe ŋac teŋ ênêc êwiŋ awê teŋ, taŋ sê eŋ gêdêŋ ŋac teŋ gebe ênam ôli êtu ênê gêŋômao, mago gêjam ôli su me sêwi eŋ siŋ su atom tageŋ naŋ, go akêŋ ŋagêjô, mago êsêagêc sêmac êndu lulugeŋ atom, gebe sêwi awê siŋ kêtu taunê ŋatauo su atom tageŋ.

²¹Mago ŋac tau êkôc domba kapoac teŋ êna becobo ŋakatam gebe êkêŋ êtu datôp êndêŋ Apômtau êtu eŋ tauŋa.

²²Ma dabuŋwaga ê wama ŋac tau ŋa domba kapoac datôpŋa tonaŋ êkô Apômtau laŋônêm êtu sec, taŋ eŋ gêgôm naŋŋa. Ma Anôtô oc êsuc sec, taŋ ŋac tau gêgôm naŋ, ôkwi.

²³“Êndêŋ taŋ asô gamêŋ tau ma asê ka ŋanô aniŋŋa tokaiŋ-tokaiŋ naŋ, go alic ŋanô tau amboac gêŋ selec êtôm aniŋŋa atom e jala têlêac êmbacnê acgom.

²⁴Ma êndêŋ jala êtu aclê ŋanô samob êtu gêŋ dabuŋ ma êtu da lambiŋŋa êndêŋ Apômtau.

²⁵Mago êndêŋ jala êtu lemeŋteŋ aniŋ kaŋanô tau gebe ênam ŋanô taêsam êndêŋ jala samob, taŋ êndaŋguc naŋ. Apômtau, amacnêm Anôtô aê.

²⁶“Aniŋ gêŋ todec teŋ atomanô. Aoc biŋ lasê to aŋgôm mectomaŋ atom.

²⁷Akapiŋ nêm môkêmlauŋ su aŋga môkêmapac atom ma êm ŋasaô êtu dambê atom.

²⁸Asa nêm ôlim êtu ŋacmatêŋa me anac bô teŋ êpi taôm ôlim atom gebe Apômtau aê.

²⁹“Ôkêŋ latômo êtu awê mockaiŋo gebe mockaiŋ ênam gamêŋ auc e sec ênam sêga aŋga gamêŋ tau atom.

³⁰Taêm ênam ŋoc om gebe dabuŋ ma ômansaŋ ŋapep ma otoc ŋoc andu dabuŋ sa gebe Apômtau aê.

³¹“Naandêŋ lau, taŋ sêkalem lau katuŋ naŋ, to lau mectomaŋŋa ana atom. Embe aŋgôm oc aŋgôm amac selec ŋapaliŋ gebe Apômtau, amacnêm Anôtô aê.

³²“Ôndi sa êtu ŋac tomôdêŋa to otoc ŋamalacanô sa ma ôtêc aômnêm Anôtô gebe Apômtau aê.

³³“Embe ŋac jaba teŋ êmoa êwiŋ aôm aŋga nêm gamêŋ, go ôtu kasec eŋ atom.

³⁴Ŋac jaba êmoa êwiŋ aôm êtôm nêm lasitêwa teŋ ma aôm têmtac êwiŋ eŋ amboac têmtac gêwiŋ taôm, gebe amac taôm atu lau jaba gêmuŋŋa aŋga gamêŋ Aiguptu, gebe Apômtau, amacnêm Anôtô aê.

³⁵“Amêtôc lau eso atom. Anam dôŋ gêŋ baliŋ to ŋawapac ma taêsamŋa ôkwi gebe ansau lau atom.