Levitikus 25:36-50

³⁶Dab mun’ e win rom ko salpiy nra fek facha’ rom ya ngam fol rok Got ngam pag facha’ ni ku reb e girdi’ nu Israel ngi i par ni ba chugur ngom.

³⁷Dab mu pag nge pi’ e win ngom ko salpiy ni mu pi’ ngak, ma dab mu guy rogon nge yo’or ban’en ni yag ngom ko ggan ni ga be pi’ ngak nchuway’.

³⁸Irera’ e n’en nike yog SOMOL ni Got romed, ni ir e fekmed nga wuru’ yu Egypt ni fan e nge pi’ fare nam nu Kanaan ngomed me mang Got romed.

³⁹Fa’anra be par be’ ni ku reb e girdi’ nu Israel ni ba chugur ngom nike gafgow me pi’ ir ngom ni ngam chuw’iy nge mang sib rom, ma dab mu pag nge rin’ e maruwel ko sib.

⁴⁰Ra par rom ni bod be’ ni ga be pi’ puluwon ngi i maruwel rom nge taw ko fare Duwan e Felfelan’.

⁴¹Ma aram e ngiyal’ i n’en nra pagem facha’ nge pifak ngar sulod nga taferad ko binaw rok e pi ga’ rorad kakrom.

⁴²Ya girdi’ nu Israel e tapigpig rok SOMOL ma ir e fekrad nga wuru’ yu Egypt; ere thingar dabkun pi’rad nchuway’ ngar manged sib.

⁴³Dab mu gafgow niged yad, mu folgad rok e Got romed.

⁴⁴Fa’anra btuf ni nge yag e sib ngomed, ma ngam chuw’iyed e sib ko pi nam u to’obmed i yan.

⁴⁵Ma ku rayag ni ngam chuw’iyed pifak e girdi’ u reb e nam ni yad ma par u fithik’med. Pi bitir nem nni gargelegrad u daken e nam romed e rayag ni nge milfarad ngomed,

⁴⁶ma gimed ra tayrad ngki milfarad ngak e pi pumo’on ni pifakmed, ni yad ra pigpig ngorad nnap’an e yafos rorad. Machane dab mu kireb niged pa’med ngak reb e girdi’ nu Israel fa um m’angachgad ngak.

⁴⁷Ra chey ni bay be’ nu reb e nam nma par u fithik’med nike fel’ rogon ke yo’or bogi ban’en rok, ma bay be’ nu Israel nike gafgow me pi’ ir nchuway’ ngak facha’ ni nge mang sib rok, ara pi’ ir ngak reb i chon e tabinaw rok facha’ ni be’ nu reb e nam.

⁴⁸Ma nga tomuren nni chuw’iyrad, ma kabay mat’awunrad niki yira chuw’iyrad bayay. Reb e pumo’on ni walagen

⁴⁹fa reb e pumo’on ni walagen e chitamngin are chitiningin, fa reb e bitir rok be’ ni walagen e chitamngin ara chitiningin, ara yug reb i girdi’en nib chugur ngak e rayag ni chuw’iy facha’ bayay nge sul’. Fa’anra ir rok e ke gaman e salpiy nike maruwliy, ma rayag ni nge chuw’iy’ mat’wun bayay.

⁵⁰Fa en ni nge pi’ ir nchuway’ nge en ni nge chuw’iy e thingar ra weliyew, ma thingar ra the’egew urngin e duw ni nge tabab ko ngiyal’ nike pi’ ir nchuway’ nge mada’ ko fare Duwan e Felfelan’ nra be’ ma nge sul e tirok ngak ma thangri ta’areban’ row nga puluwon fa’anem ko ngiyal’ ni ngan pag nge yan ni bod rogon puluwon reb e girdi’en e maruwel.