Levitikus 25:1-25

¹I yog SOMOL ngak Moses u daken e Burey nu Sinai,

²ni nge yog ko girdi’ nu Israel e pi gam’ing ni ba’aray. Nap’an ni gimed ra thap ko fare binaw ni nge pi’ SOMOL ngomed, ma thingar mu liyorgad ngak SOMOL ni dab mu gi’ed e but’ riy ni ngam milay’ niged ko gubin e medlip e duw.

³Gimed ra yung e yungi milay’ romed, mi gimed tamilangnag owchen e pi woldug romed ni grape, mi gimed kunuy wom’ngin e woldug romed u lan nel’ e duw.

⁴Machane duw ni medlip e aram yaran e toffan ko but’, ba duw ni kan pi’ ngak SOMOL. Dab mu yunged e yungi milay’ romed ara mu tamilang niged owchen e yungi woldug romed ni grape.

⁵Mus ko pi grain ni i tugul rok nda un yung ma ku dab mu t’ared wom’ngin, ma ku dab mu kunuyed wom’ngin e woldug romed ni grape nda um tamilang niged owchen; ya re duw nem e nge toffan e but’ riy.

⁶Yug aram rogon ni da ni wolduguy e but’ ko re duw nem, ma ra pi’ e ggan ni fan ngomed, nge pi sib romed, nge pi’in yad be maruwel romed, nge pi girdi’ nu boch e nam ni yad be par romed,

⁷nge pi gamanman ni gimed ma chugliy, nge pi gamanman ni malboch u daken e yungi flang. Gubin ban’en nra pi’ e but’ ko ngiyal’nem ma yira kay.

⁸Mu the’eged medlip yay e medlip e duw, ma urngin u gubin e aningeg i ragag nge mereb e duw.

⁹Ma bin ragag e rran ko bin medlip e pul e Yaran e Bayul, ma ga l’oeg be’ nge thoy e rappa u lan e binaw ni ga’ngin.

¹⁰Ma ku aray rogon ni gimed ra tay e re duw nra gaman e wugem ngay, ni aram e ngam weliyed murung’agen mat’wun urngin e pi’in yad ma par u lan fare binaw. Re duw ney e aram e gubin yang e pi binaw ni kan pi’ nchuway’ e yira fulweg ngak e en tafen are pi’in ni owchen, ma en ni kan pi’ nchuway’ ni nge mang sib e yira fulweg nga tabnaw rok.

¹¹Dab mu yunged e yungi milay’ romed, fa mu t’ared wom’ngin e woldug romed ni i tugul rok, ara mu kunuyed wom’ngin e woldug ni grape u daken e yungi milay’ romed ni grape nda um tamilang niged owchen.

¹²Re duw ney ni ga’ngin e ngam ted fan; kemus ni wom’ngin e galwog u lan e flang nda mu yunged e gimed ra kay.

¹³Gubin e pin’en ni kan pi’ nchuway’ e go’ yira sulweg ngak e en nri fen u lan e re duw ney.

¹⁴Ere nap’an ni gimed ra pi’ e binaw nchuway’ ngak reb e girdi’ nu Israel, ara muchuw’iyed e binaw rok, ma dab mu sasalpiyyed rogon.

¹⁵Pulwon ni ngam duwgiliyed e nge pluw nga urngin e duw nrayag ni nge pi’ fare gi but’ wom’ngin e woldug u m’on ni nge taw ko fare Duwan e Felfelan’.

¹⁶Fa’anra kab yo’or e duw, ma aram e ba tolang puluwon fare gi but’, machane fa’anra da ki yo’or e duw, ma nge sobut’ puluwon, ni bochan e n’en ni yibe pi’ nchuway e urngin wom’ngin e woldug ni be pi’ fare gi but’.

¹⁷Dab mu sasalap ngak be’ nu Israel, machane ngam fol rok SOMOL ni Got rom.

¹⁸Mu folgad u gubin e pi motochiyel rok SOMOL nge pin’en nike yog ni ngan rin’, ya nge yag ni mu pired ndariy ban’en nra buch romed u lan fare binaw.

¹⁹Re gi but’ nem e bayib wom’ngin, ma bayi yag gubin e tin gimed ba’adag ni ngam koyed mi gimed par ndariy ban’en nra buch romed.

²⁰Dabi magafan’med ko mang e ngam ked u nap’an e duw ni medlip ni dab mu yunged e woldug fa mu kuniyed wom’ngin e woldug.

²¹I SOMOL e bayi tow’athnag e but’ ko duw nnel’ ni bochan e nge pi’ wom’ngin e woldug ni yira gaman riy u lan l’agruw e duw.

²²Nap’an ni gimed ra yung e yungi milay’ romed ko duw ni meruk, miki gimed be kay e tin mu tired wom’ngin ngam ted nga naun u lan e duw nnel’, ma tin kabay e kigimed ra gaman riy nge mada’ ko ngiyal’ ni kam t’ared wom’ngin e tin kam yunged ko duw ni meruk.

²³Binaw romed e ri dab ni pi’ nchuway’ ni dab kisul bi’id ko en tafen, ni bochan e de milfan ngomed; ya ba milfan ngak Got, ma gimed bod e milekag nike pagmed kam pired riy.

²⁴Yira pi’ e binaw nchuway’, ma en nri tafen e bay mat’wun nra chuw’iy ni nge sul ngak.

²⁵Fa’anra gafgow be’ nu Israel nike math e liyeb ngak me pi’ e binaw rok nchuway’, ma en nth’abi chugur ngak u pi girdi’en e ra chuw’iy fare gi binaw nge sulweg.