Levitikus 14:8-32

⁸Ma facha’ ni yibe be’echnag e nge luknag e mad rok, me puy piyan lolgen ni urngin, me maluk; ma aram e ke be’ech. Ma aram e rayag ni nge sul nga langgin e gin yibe par riy, machane thingari par u wuru’ e tent rok ni medlip e rran.

⁹Ma rofen nra gaman e medlip fen ngay e ngki puy piyan lolgen nge m’ay, nge roben, nge wuthungin, nge urngin e piy u downgin; me luknag e mad rok miki maluk, ma aram e ke be’ech.

¹⁰Ma rofen ni meruk fen ngay e nge fek dalip i fak e saf ni l’agruw e pumo’on ma ta’reb e bpin ni ta’reb e duw rorad, ma dariy bochiyang u dowrad nib kireb, nge lal e pawn e flour ni kan athkuy e gapgep ni olive ngay, nge nap’an balay e pint e gapgep ni olive.

¹¹Me fek fare prist facha’ nge pi maligach nem nga langan e mab ko fare Tent u p’eowchen SOMOL.

¹²Me fek fare prist reb ko fapi fak e saf nge uneg baley e pint ko fare gapgep ni olive ngay nge pi’ nib maligach ni mthang malfith. Thingari pi’ e pin’ey ngak SOMOL nib tow’ath nib mal’eag.

¹³Thingari li’ fare fak e saf u lan fare gin’en nib thothup ni yima li’ nge yim’ e gamanman riy ni maligach ni fan ko denen nge maligach ni mo’oruf. Thangri rin’ ni aray rogon ni bochan e fare maligach ni mthang malfith, ni bod fare maligach ni fan ko denen, e go’ bmilfan ngak fare prist, ma rib tabgul.

¹⁴Me fek fare prist boch u racha’en fare fak e saf, nge thiy nga ba’ ni mat’aw i yuwantel, nge ba’ ni mat’aw i bugul ni ga’ u pa’, nge ba’ ni mat’aw i bugul ni ga’ u ay facha’ ni ngan duwgiliy nike be’ech.

¹⁵Me fek fare prist boch ko fare gapgep ni olive nge pu’og nga ba’ ni gilay’ i lan pa’,

¹⁶me yip buguli pa’ ko ba’ ni mat’aw nga fithik’ me atngiy ni medlip yay u rom u p’eowchen SOMOL.

¹⁷Me fek boch ko fapi gapgep ni bay u lan pa’ nge boch u rachaen fare fak e saf nge achey nga ba’ ni mat’aw i yuwantel, nge nga ba’ ni mat’aw i bugul ni ga’ i pa’, nge nga ba’ ni mat’aw’ i bugul ni ga’ u ay facha’ ni ir e ngan duwgiliy nike be’ech.

¹⁸Me thiy e tin kabay ko fapi gapgep ni bay u lan pa’ nga daken lolgen facha’. Irera’ rogon ni nge bangbengnag be’ ni nge be’ech.

¹⁹Ma aram e fare prist e thingari pi’ e maligach ni fan ko denen me bangbengnag be’ ni nge be’ech. Ma tomuren e nge li’ nge yim’ fare gamanman ni maligach ni mo’oruf

²⁰nge pi’ u daken e altar nib mu’un fare maligach ni grain ngay. Irera’ rogon nra bangbengnag fare prist be’, ma aram e ke be’ech.

²¹Fa’anra ba gafgow facha’ ndabiyag puluwon e pin’em rok, ma nge fek i yib ta’reb e fak e saf ni pumo’on ni maligach nib mthang malfith nge pi’ ngak SOMOL nib tow’ath nib me’leag. Me fek e flour i yib ni kemus nri l’agruw e pawn ni kan athkuy e gapgep ngay ni fan ko maligach ni grain nge baley e pint e gapgep ni olive.

²²Nge l’agruw i arche’ ni dove ara l’agruw e blogol, reb e ba maligach ni fan ko denen, ma reb e ba maligach ni mo’oruf.

²³Rofen nra gaman e meruk e rran ngay ni kan be’echnag facha’ e aram e ra fek fa pin’em i yib ngak fare prist nga langan e mab ko fare Tent.

²⁴Me fek fare prist fare fak e saf ni pumo’on nge fare gapgep ni olive nge pi’ ngak SOMOL nib tow’ath nib me’leag.

²⁵Me li’ fare fak e saf ni pumo’on me fek boch e racha’ riy nge thiy nga ba’ ni mat’aw i yuwantel, nge ba’ ni mat’aw i bugul ni ga’ u pa’, nge ba’ ni mat’aw i bugul ni ga’ u ay facha’.

²⁶Me pu’og fare prist boch ko fare gapgep ngalan e ba’ ni gilay’ i pa’,

²⁷me lithag bbugul u ba’ ni mat’aw i pa’ nga fithik’ nge atngiy ni medlip yay u rom u p’eowchen SOMOL.

²⁸Ma ku arrogon fare gapgep ni ku ra achey boch ko fa yungi n’en u dow facha’ nike thiy e racha’ ngay: u ba’ ni mat’aw i yuwantel, nge ba’ ni mat’aw i bugul ni ga’ u pa’, nge ba’ ni mat’aw i bugul ni ga’ u ay.

²⁹Ma tin ke magey ko fapi gapgep u lan pa’ fare prist e nge tay nga daken lolgen facha’, ya irera’ rogon nike bangbengnag ni nge be’ech.

³⁰Me pi’ reb fa gali arche’ ni dove ara blogol

³¹ni maligach ni fan ko denen ma bin nra magey e nge pi’ ni maligach ni mo’oruf ni nge dachug ko fare maligach ni grain. Ya irera’ rogon ni nge bangbengnag fare prist facha’ ni nge be’ech.

³²Irera’ e gafal ni fan ngak be’ nib e m’ar ko dowef nib ubchiya’, ma dabiyag puluwon ba maligach ni gamanman rok ko ngiyal’ ni ngan be’echnag.