Levitikus 13:11-48

¹¹ma aram bm’ar ko dowef ni dabki chuw. Ma fare prist e nge yog ni fa’anem e ke ta’ay; ni dakriy fan ni ngan ki’eg ko girdi’ nga orel, ni bochan e ke par nib ta’ay.

¹²Ma fa’anra fare m’ar ko dowef e ke polo’ u ga’ngin yang i dow ni fanagmus u lolgen nge yan i thang ko rifrif u ay,

¹³ma fare prist e thingari guy bayay. Ma fa’anra pir’eg ni fare m’ar e kenad u ga’ngin yang u dow, ma nge yog ni fa’anem e daki ta’ay. Ni fa’anra ke polo’ i wech ga’ngin yang rok, ma daki ta’ay.

¹⁴Machane yug nap’an e ra malad bang u dow, ma ke ta’ay facha’.

¹⁵Ma fare prist e nge guy facha’ bayay, ma fa’anra guy fare malad u downgin, ma nge yog nike ta’ay facha’. Ya malad e ba m’ar ko dowef ni ubchiya’, ma facha’ e ke ta’ay.

¹⁶Machane fa’anra fos fagi malad nge sul nge wech ra’en bayay, ma nge yan i guy fare prist,

¹⁷ya ir e nge guy bayay. Ma fa’anra fare malad e ke thil ke wech ra’en, ma fa’anem e daki ta’ay, ma fare prist e nge yog ni daki ta’ay facha’.

¹⁸Ma fa’anra be’ nike fos e lot rok

¹⁹me tomuren ma ke wech fa ba dake row i wech lanmit fa gin ni immoy e lot riy, ma aram e facha’ e nge yan i guy e prist.

²⁰Ma fare prist e nge guy fa’anem, ma fa’anra ke chur lanmit nga’ar ma ke thil ra’en e piy u lanmit ke wech, ma fare prist e nge yog ni fa’anem e ke ta’ay. Aram e ba m’ar ko dowef ni ubchiya’ ni sum u luwan fare lot.

²¹Machane fa’anra guy e prist ma der thil ra’en e piy u lanmit nge wech ma de chur lanmit nga’ar, machane ke ol ra’en, ma fare prist e nge ki’eg fa’anem ko girdi’ nga orel ni medlip fen.

²²Ma fa’anra ra be ga’ e fath riy i yan, ma nge yog e prist ni fa’anem e ke ta’ay; ya ke m’ar.

²³Machane fa’anra kaygurgon fagi malad ni der ga’ i yan, ma aram e kemus ni fathan e lot, ma fare prist e nge yog ni fa’anem e daki ta’ay.

²⁴Ma rogon be’ ni yik, e fa’anra fa gin’en ke gak’ e ke wech ra’en fa ke dake row,

²⁵ma fare prist e nge guy facha’. Ma fa’anra ke thil ra’en e piy u mit fa gin’en ke wech ma ke chur nga’ar, ma aram e ba m’ar ko dowef ni ubchiya’ ni sum ko fare myik’ ni tay, ma fare prist e nge yog ni fa’anem e daki ta’ay.

²⁶Ma fa’anra piy u lanmit e de thil nge wech ma de chur lanmit nga’ar, ma ke samathmath ra’en, ma fare prist e nge ki’eg fa’anem rok e girdi’ nga orel ni medlip fen.

²⁷Fare prist e nge guy fa’anem bayay ko rofen ni gaman e medlip fen ngay, ma fa’anra ke ga’ fathan, ma aram e m’ar ko dowef ni ubchiya’, ma fare prist e nge yog ni fa’anem e ke ta’ay.

²⁸Ma fa’anra kay gi par fathan ni kargon ni der ga’ i yan ma ke ol ra’en, ma aram e gathi m’ar ko dowef ni ubchiya’. Ma fare prist e nge yog ni fa’anem e daki ta’ay, ya kemus ni fathan e nifiy.

²⁹Nap’an e ra yib ba malad nga lolgen fa wachar’en be’ ni pumo’on fa be’ ni bpin,

³⁰ma fare prist e nge guy fa gin’en, ma fa’anra ya’an e nge chur lanmit nga’ar ma piy u lanmit e ke magchol nike achichig gaf, ma aram e m’ar ko dowef ni ubchiya’, ma nge yog fare prist ni facha’ e ke ta’ay.

³¹Ma fa’anra guy fare prist facha’, ma fare malad e ya’an e dabi chur lanmit nga’ar, ma dariy bagaf e piy u lanmit ni kesul nga rogon, ma nge ki’eg fa’anem rok e girdi’ nga orel ni ku medlip e rran.

³²Ma fare prist e nge guy bayay fagi malad ko bin medlip e rran, ma fa’anra dawor i garar ma dowri magchol e piy u lanmit ma de ya’an e nge chur lanmit nga’ar,

³³ma facha’ e nge puy e piy u lolgen ma dabi puy u mirichlen fare malad. Ma fare prist e nge ki’eg facha’ nga orel ko girdi ni medlip fen.

³⁴Ma rofen nra gaman e medlip fen ngay miki guy fare prist fagi malad, ma fa’anra dawori ga’ ara chur lanmit nga’ar, ma fare prist nge yog ni facha’ e daki ta’ay; me luknag facha’ e mad rok, ma aram e daki ta’ay.

³⁵Ma fa’anra ga’ fare malad i yan u tomuren ni kanog ni daki ta’ay,

³⁶ma fare prist e nge guy facha’ bayay. Ma fa’anra ke ga’ fare malad, ma dakriy rogon ni ngki guy ko ke magchol e piy u lanmit fa dangay; ya fa’anem e ke gagyel nib ta’ay.

³⁷Ma fa’anra be leamnag fare prist ni fare malad e da kir ga’ i yan ma ke sum e piy nga lanmit, ma fare malad e ke fos, ma aram e fare prist e nge yog ni fa’anem e daki ta’ay.

³⁸Nap’an nra aw yungi ban’en nib wech nga downgin be’ ni pumo’on fa be’ ni bpin,

³⁹ma fare prist e nge guy facha’, ma fa’anra fa pin’en u dow e ba yam’ ra’en e wech riy; ma kemus ni bogi n’en nike for u dow; ma facha’ e dawori ta’ay.

⁴⁰Fa’anra be’ ni pumo’on nike mulmul e piy u lolgen ke modro’, ma dabi ta’ay.

⁴¹Ma fa’anra be’ ni pumo’on nike mul e piy u peri’ ke modro’, ma dawori ta’ay.

⁴²Machane fa’anra keyibi gagyel ba malad nib dake row i wech u daken e madro’ rok, ma aram e m’ar ko dowef ni ubchiya’.

⁴³Fare prist e nge guy facha’, ma fa’anra aramrogon ni fare gi malad e ba dake row i wech,

⁴⁴ma fare prist e nge yog ni facha’ e ke ta’ay, ni bochan fare m’ar ko dowef ni ubchiya’ ni bay u daken lolgen.

⁴⁵Be’ ni bay e m’ar ko dowef ni ubchiya’ rok e thangari chuw nga mad nib mogmogchod, me pag ni dabki roway piyan lolgen, me upnguy e ley ni but’ i owchen, me tolulnag e “ta’ay, ta’ay!”

⁴⁶Me par nib ta’ay u n’umngin nap’an ni bay fare m’ar rok, ma thingri par u wuru’ e gin ma par e girdi’ riy, nib orel rok e girdi’.

⁴⁷Nap’an ra tugil e pthethaw ko mad, ni demtrug ko mad ni bunuen e gamanman ara mad ni wech,

⁴⁸ara yug demturug bang e mad ni wech ara yug bang e mad ni bunu’en e saf ara keru’ e gamanman ara ban’en nni ngongliy u keru’ e gamanman,