LEVITIKO 8:3-22

³Unai neganai Israela taudia ibounai be unai gabu dekenai do oi boiria idia haboua.”

⁴Mose ese Lohiabada ena oda ia karaia, ia ese taunimanima ibounai Palai Dubu ena iduara kahirakahira ia haboudia.

⁵Idia dekenai Mose ia hereva, ia gwau, “Lohiabada ese lau dekenai ia oda henia gauna be inai.”

⁶Vadaeni Mose ese Arona bona iena natuna tau taudia ia abia mai, ranu dekena amo ia hadigudia.

⁷Mose ese Arona dekenai sioti bona dabua latana ia atoa, bona gaba gauna Arona dekenai ia kwatua. Ma epodi danu Arona dekenai ia kwatua, epodi ena gaba gauna, idia hatua namonamo gauna dekena amo.

⁸Mose ese danu kemena dabua Arona dekenai ia atoa, bona Urima bona Tumima be kemena dabua lalonai ia udaia.

⁹Unai murinai Mose ese kwara kumia gauna be Arona ena kwarana dekenai ia atoa, bona inai kwara gauna ena vairanai be medolo namo herea, helaga momokani ena toana gauna ia kwatua kau, Lohiabada ese Mose ia hamaoroa hegeregerena.

¹⁰Vadaeni Mose ese dehoro helagana ia abia, Lohiabada ena Palai Dubu, bona Dubu lalonai noho gaudia ibounai dekenai ia atoa, ia hahelagaia.

¹¹Boubou patana, bona iena kohu ibounai, bona digu totona ranu ena disi, disi ena patana danu be nega 7 unai dehoro dekenai ia dahua, do idia helaga totona.

¹²Arona ena kwarana dekenai danu be dehoro helagana ia bubua, ia hahelagaia.

¹³Unai murinai Mose ese Arona ena natuna tau ia hakaudia mai, sioti bona gaba gaudia bona kwara gaudia danu idia dekenai ia atoa, Lohiabada ese ia oda henia hegeregerena.

¹⁴Vadaeni Mose ese boromakau tau ia mailaia, kara dika gwauatao boubouna totona gauna. Arona bona iena natuna tau danu ese edia imadia be boromakau ena kwarana dekenai idia atoa.

¹⁵Vadaeni Mose ese boromakau ia alaia mase, boromakau ena rarana haida ia abia, bona iena imana kwakikwakina dekena amo boubou patana ena doa 4 be rara dekenai ia dahua, vadaeni boubou patana ena miro ia hagoevaia. Bona boromakau ena rara orena, be boubou patana ena badinai ia bubua. Inai kara dekenai Mose ese boubou patana ia hahelagaia.

¹⁶Unai murinai Mose ese boromakau ena bogana ena digara ibounai, bona asena ena kahana badana, bona nadinadi ruaosi, mai edia digara danu ia abia, bona boubou patana dekenai ia gabudia ore.

¹⁷Boromakau ena tauanina, ena kopina, ena hidiona, bona ena bogarau mai kukuri danu be Mose ese kamepa ena murimurinai ia gabua ore, Lohiabada ese ia oda henia hegeregerena.

¹⁸Ma inai murinai Mose ese mamoe tau, gabua ore boubouna totona gauna, ia hakaua mai. Arona bona iena natuna tau ese edia imadia be mamoe ena kwarana dekenai idia atoa.

¹⁹Vadaeni Mose ese mamoe ia alaia mase, bona mamoe ena rarana be boubou patana ena kahana 4 dekenai ia negea.

²⁰Mose ese mamoe ia ivaia parara, mamoe ena kwarana bona tauanina bona digarana be boubou patana ena latanai ia gabua ore.

²¹Ma mamoe ena bogana bona bogarauna bona imana bona aena be ranu dekenai ia huria guna, vadaeni mamoe ena kahana ibounai be Mose ese boubou patana dekenai ia gabua ore. Inai lahi dekenai ia gabua ore boubouna, Lohiabada ena, be mai bonana namo herea Lohiabada dekenai. Mose ese Lohiabada ena hadibaia hereva hegeregerena ia karaia.

²²Unai murinai Mose ese mamoe tau iharuana, hahelagaia taudia hahelagaia totona gauna, ia hakaua mai. Vadaeni Arona mai ena natuna tau ese edia imadia be mamoe ena kwarana dekenai idia atoa.