LEVITIKO 8:1-22

¹Iehova ese Mose e haduaia, eto,

²Aaron mai natuna ida bavabidia, dabua helaḡadia bona dehoro helaḡana bona kara-rea boromakauna bona mamoe mamaruanedia ruaosi bona asie hatubua flaoana boseana danu bavabi.

³Bena taunimanima iboudiai na hebou kalagana iduarana badinai bae hebou.

⁴Bena Mose na Iehova ena hahedua heḡereḡerena e karaia, bona taunimanima iboudiai na hebou kalagana iduarana ai e hebou.

⁵Mose ese hebou taudia e hamaorodia, eto, Iehova ese ini vada e hahedua toma.

⁶Bena Mose ese Aaron mai natuna ida e abidia, ranu ai e hadigudia.

⁷Bena ia ese hahedoki badana bona gaba ḡauna e hakaralai, bona muri hahedokina bona hahedoki helaḡana e hadokilai, bona gaba ḡauna, e hatua ḡauna, gabana ai e ḡeḡea.

⁸Bena hahemaoro vainana e ha-inulaia; vaina lalonai Urim bona Tumim e uda.

⁹Kwara iḡeḡelaina dabuana danu kwarana ai e ḡeḡea, bona bagunai gold koronana helaḡana e atoa, Iehova ese Mose e haduaia heḡereḡerena.

¹⁰Bena Mose ese dehoro helaḡana e abia, dubu bona dubu lalonai e miava ḡaudia iboudiai e horolaidia, e hahelaḡadia.

¹¹Ihaboulaina patana mai kohuna idoinai, bona digu ranuna dihuna mai ihahelai-kauna ḡauna ida, nanega hahitu e horodia, ihahelaḡadia totona.

¹²Aaron kwarana danu dehoro amo e horoa, e hahelaḡaia.

¹³Una murinai Mose ese Aaron natuna e abidia, hahedoki badadia bona gaba ḡaudia bona kwara ḡaudia e hakaralaidia, Iehova ese e haduaia heḡereḡerena.

¹⁴Bena ia ese kara-rea boromakauna e abia. Aaron mai natuna ida ese imadia na boromakau kwarana ai e ato kau;

¹⁵bena Mose ese e alaia mase, rarana e abia, imana kwakikwakina amo ihaboulaina patana ai doa e dahulai, ihaboulaina patana e hahelaḡaia. Bena rara orena na ihaboulaina patana badinai e bubua nege, unu amo e hahelaḡaia bona e haḡoevaia.

¹⁶Bena boga bona bogarau urubina bona ase digarana bona nadinadi ruaosi mai digaradia ida e abi, ihaboulaina patana ai e haḡole oho, hari Mose ese.

¹⁷A boromakau tau-anina, mai kopina bona hidiona bona taḡena ida, taruha murimurinai e haḡolea oho, Iehova ese Mose e haduaia heḡereḡerena.

¹⁸Una murinai ia ese mamoe maruanena, ḡole-oho boubouna ḡauna, e hakaua lasi. Aaron mai natuna ida ese imadia na ia kwarana ai e ato kau;

¹⁹bena Mose ese e alaia mase, rarana na ihaboulaina patana latanai bona badinai e nevaria heḡeḡe.

²⁰Bena e ivaia parara, kwarana bona tau-anina bona digarana be ihaboulaina patana latanai e haḡole oho, hari Mose ese.

²¹A bogana bona bogarauna bona imana bona aena na ranu ai e huridia guna; bena mamoe idoinai na Mose ese e gabua, ihaboulaina patana latanai, lahi ese e ḡolea oho, bonana namo ḡauna, ḡole-oho boubouna, Iehova ena, Iehova ese Mose e haḡania heḡereḡerena.

²²Bena ia ese mamoe maruanena iharuana, idia ihahelaḡadia ḡauna, e hakaua lasi. Bena Aaron mai natuna ida ese imadia na mamoe kwarana ai e ato kau.