LEVITIKO 27:18-28

¹⁸A Iubile laḡanina murinai bema hahelaḡaia, hahelaḡa tauna ese baine haeroa, laḡani hida do mimia ela bona Iubile ta baine kau, bena unu laḡani hidaosi ihaheḡereḡeredia ai davana baine hamaraḡia.

¹⁹Tano biaguna baine ura ena tano baine bodohilaia, ia ese dava baine heni mai atokauna ida. Atokauna na dava idoinai baine karoaia, karoa ima, bena karoa ta heḡereḡerena ma baine atoa kau. Bena tano na iena.

²⁰A ibodohilaina basine ura, eiava tau ta ese baine hoia, ia na basine abia lou diba.

²¹A Iubile baine kau ai, una tano na baine helaḡa Iehova ena, badina be ia na gwau-hamata ḡauna: hahelaḡa tauna ese baine abia, iena.

²²Tau ta ese ena tano ta, dia senena edia amo e abia to moni amo e hoia ḡauna, bema hahelaḡaia Iehova ena,

²³hahelaḡa tauna ese ibodohilaina davana laḡani hidaosi lalodiai ela bona Iubile laḡanina baine gwauraia; bena una dina ai hari tau ese dava baine heni, Iehova ena helaḡa ḡauna.

²⁴A Iubile laḡanina ai una tano biaguna korikori, senena amo e abia tauna, ese baine abia lou.

²⁵Dava iboudiai be gabu helaḡana ena sekele ai ba gwauraia: una sekele lalonai gera be ruahui.

²⁶Mauri ḡaudia natudia roboadia be Iehova ena; taunabunai tau ta ese roboa maruanena ta basine hahelaḡaia diba: boromakau natuna roboana eiava mamoe natuna roboana na Iehova ena.

²⁷A mauri ḡauna mirona natuna roboana na biaguna ese moni amo baine bodohilaia, dava baine heni, oi ese ba gwauraia heḡereḡerena, bona atokauna danu baine heni. Atokauna na dava idoinai baine karoaia, karoa ima, bena karoa ta heḡereḡerena ma baine atoa kau. A basinema bodohilaia, vada ba hoia, moni davana, dava na o gwauraia heḡereḡerena.

²⁸Tau ta ese taunimanima ta eiava mauri ḡauna ta eiava tano ta Iehova baine henia vaitani, una na basine hoia diba bona basine bodohilaia diba: unuhetomadia na vada e helaḡa vaitani, Iehova ena.