LEVITIKO 26:13-36

¹³Lau binai Iehova, emui Dirava: Aigupto tanona amo na hakaumui lasi, Aigupto taudia isiaidia basio lao heni nato; aiomui gadeadia na hamotudia, na haginimui maoromaoro.

¹⁴A basioma kamonai henigu; ini haheḡani iboudiai basioma badinadia;

¹⁵egu taravatu boma tata utu, bona laumamui ese egu hahemaoro herevadia bema dadaraidia; egu haheḡani iboudiai karadia basioma kara, bona emui gwau-hamata egu ai basioma hamomokania;

¹⁶lau be ini baina kara henimuitoma: gari lalomui ai baina havaraia; baina havaroda-varodamui. Taumui bae siahu, bona matamui bae valahu-valahu, bona laumamui bae daure. Emui uhe ba hado, to anidia basio ani; inaimui ese bae ani.

¹⁷Vairagu baina ha-aukaia emui ai. Inaimui ese bae hadareremui bona bae halohiamui. Ta ese basine havamui negana ai ba heau.

¹⁸Ini ḡau muridiai ma basioma kamonai henigu, lau ese emui kara dika davadia nega hahitu baine henimui.

¹⁹Emui goada heaḡina baina hahemaraia. Guba na auri ai baina halaoa emui ai; bona emui tanobada na auri laboralaborana ai baina halaoa.

²⁰Emui goada baine ore kava; emui uma anidia basie vara; emui imea audia basie huahua.

²¹Doene boma inai henigu bona boma gwau edeede henigu, lau ese baina hahisihisimui nega hahitu, emui kara dika daidiai.

²²Uda boromadia baina kahudia nege bogaragimui ai; idia ese natumui bae dadihaidia, bona emui seri bae habuadia tari, bona umui bae hagadoimui. Emui dala ai ava bae tubu.

²³A dounu basioma lou henigu, dounu egu amo boma raka oho,

²⁴lau ese umui emui amo baina raka oho, bona emui kara dika davadia nega hahitu ma baina henimui.

²⁵Dare na latamui ai baina siaia, taravatu itatautuna davana ihaḡuḡuruna totona. Emui hanua badadia ai ba hahebou negadia ai, lau ese dai-hanai goreredia baina siaidia bogaragimui ai, benainaimui imadia ai baina negemui.

²⁶Amui mauri anianina baina abia oho negana ai, hahine gwauta amu tamona ai flaoa bae gabua, amui bae hahetoho henimui; bavaniani, to bogamui basie kunu.

²⁷Unu ḡau muridiai do basioma kamonai henigu, a egu amo boma raka oho,

²⁸lau be umui emui amo baina raka oho mai badugu ida, bona emui kara dika davadia nega hahitu baina henimui, lau sibogu ese.

²⁹Bena natumui mamaruanedia bona natumui hahinedia hidiodia do bavani.

³⁰Lau ese emui helaḡa gabudia ororo doridia ai na baina habuadia tari, bona emui muramura patadia baina uhedia hebubu, bona emui kaivakuku tau-anidiamasedia latadiai umui tau-animui masedia baina tahodia kau; bena laumaguese baine dadaraimui.

³¹Emui hanua baina habuadia tari; emui dubu baina giḡidia rohoroho; emui muramura bonadia basina moalelai.

³²Emui tano baina havahua; inaimui bae noho henia, bena bae hoalaia.

³³Bena baina lulumui lasi, bese idau-idau bogaragidiai baina hakarohomui rohoroho. Egu dare baina veria lasi, ia ese baine havamui; emui tano bona emui hanua bae vahu.

³⁴Una negana ai tano ese ena laḡa-ani baine moalelaia, baine vahudinadia iboudiai, umui inaimui edia tano ai ba noho hedoa dinadia ai. Tano na baine laḡa ani, bona ena laḡa-ani baine moalelaia.

³⁵Ena vahudinadia iboudiai baine laḡa ani, laḡa-ani korikori, dia umui o noholaiavanegadia ai emui dina helaḡadia ai e laḡa aniva na heto.

³⁶A emui bese oredia na lalodia baina hadaradaradia, inaidia edia tano ai; au rauna lai ese e hohoamu reḡena ese baine hagaridia, bena bae heautania, dare bema heautania na heto; bena ta ese se hahavadia negana ai bae keto.