LEVITIKO 25:4-20

⁴A laḡani ihahituna na tano ena laḡa-ani negana, laḡani helaḡana Iehova ena: uhe basio hado emutano ai, bona emu vine audia rigidia basio kwamadia heini.

⁵Sibona baine tubu ḡauna na basio utua, bona vine huahuadia bae dobi na basio habou; tano ena laḡa-ani helaḡana bunai.

⁶Tano ena laḡa-ani amo amui ba davaria:oi bona emu hesiai tauna bona emu hesiai hahinena bona dekemu ai e ḡaukaramu tauna bona dekemu ai e noho hedoamu tauna,

⁷bona emu boromakau bona emu seri iboudiai emu tano lalonai. Tano anina idoinai na amui.

⁸Laḡani helaḡadia hitu ba duahidia, laḡani kavakavadia hitu hitu amo: unu laḡani iboudiai bae hari-ahui taurahani-ta.

⁹Bena hua ihahituna dinanaihagwautana ai kibi ba hiriria badabada; herohemaino dinana ai kibi bae hiriri emui tano idoinai.

¹⁰Laḡani iha-imahuina ba hahelaḡaia, bainehelaḡa herea. Una laḡani lalonai iḡui taudia iboudiai bae ruhadia nege. Ia ladana be Iubile: ia lalonai taunimanima iboudiai edia tano korikori bona edia iduhu korikori bae lou henidia.

¹¹Laḡani iha-imahuina na emui Iubile: ia Ialonai uhe basio hado, bona sibona baine tubu ḡauna basio utua; emui vine danu rigidia basio kwamadia heini, bona huahuadia basio habou.

¹²Badina be Iubile laḡanina na helaḡa emui ai: tano anina na bavania, vadaeni.

¹³Iubile laḡanina ai umui ta ta ena tano ena tano bavabi lou.

¹⁴Dekemu tauna enai ba hoihoi, basio koia, ia danu basine koimu.

¹⁵Dekemu tauna ena tano ba hoia negana ai, ba laloa, Iubile murinai laḡani hida vada e lao bubuni; ia danu baine laloa, taboro hida do mimia.

¹⁶Bema laḡani momo mimia, davana na baine bada, a bema laḡani gadoi mo mimia, davana na baine maraḡi, badina e hoimu ḡauna be taboro e hoimu.

¹⁷Raruosi basio hekoi heheni, a emui Dirava garina be gari, badina be lau be Iehova, emui Dirava.

¹⁸Taunabunai, egu taravatu bona egu haheḡani ba badinadia bona karadia ba kara; unu amo ba noho namonamo emui tano ai.

¹⁹Tano ese anina baine henimui: bavaniani, ba boga kunu, ba noho namonamo.

²⁰Ba henanadai reana, baoto “Laḡani ihahituna ai dahaka baia ania, basia hadohado bona basia taboro negana ai?”