LEVITIKO 23:6-39

⁶Dina namba 15 neganai Hatubua Lasi Paraoa ena aria, Lohiabada ena, do umui karaia. Dina 7 lalonai mai hatubua gauna lasi paraoa sibona do umui ania.

⁷Inai dina 7 ena dina ginigunana be do umui hebou guriguri totona, bona emui gaukara ta do umui karaia lasi.

⁸Unai dina 7 lalonai boubou gaudia hegeregere aniani bona vamu be lau Lohiabada dekenai do umui henia. Dina namba 7 dekenai do umui hebou lou guriguri totona, bona unai dina lalonai emui gaukara ta do umui karaia lasi.”

⁹Lohiabada ese Mose ma ia hereva henia, ia gwau,

¹⁰“Israela taudia do oi hamaoroa, do oi gwau: Umui dekenai do lau henia tano dekenai do umui ginidae neganai, umui emui uma edia koni anina umui utua neganai, emui koni guia gauna ginigunana be hahelagaia tauna dekenai do umui henia.

¹¹Vadaeni ia ese unai aniani gauna do ia abia, bona Lohiabada ena vairanai do ia davea, Lohiabada ese umui do ia hanamoa totona. Sabati Dina ena murinai dinana dekenai hahelagaia tauna ese unai guia gauna do ia davea.

¹²Bona unai aniani davea dinana dekenai mamoe natuna tau, dika ta lasi gauna, lagani tamona gauna, do umui henia, gabua ore boubouna totona.

¹³Paraoa boubouna danu unai mamoe danu do umui henia, paraoa namo herea ena metau kilogaram rua be olive dehoro danu do umui mikisi. Inai boubou be lahi dekenai do umui gabua, bona ena bonana be do ia namo herea Lohiabada ena vairanai. Bona inai boubou danu be inuinu boubouna do umui henia, uaina, ena bada be lita ta.

¹⁴Unai aniani matamata, koni, o uiti, ia kaukau gauna, o beredi matamatana, do umui ania lasi, ela bona emui boubou gauna be Dirava dekenai umui henia haorea. Inai taravatu do ia noho hanaihanai umui dekenai, bona emui tubudia dekenai, emui noho gabudia ibounai dekenai.”

¹⁵Ma Lohiabada ia hereva, ia gwau, “Unai dina dekena amo, unai Sabati murinai dinana, emui uma anina ginigunana hahelagaia tauna dekenai umui henia dinana, be pura 7 do umui duahia.

¹⁶Inai Sabati 7 murinai dinana be dina namba 50. Unai dina namba 50 dekenai paraoa matamata ena boubou be lau Lohiabada dekenai do umui henia.

¹⁷Famili ta ta ibounai ese beredi rua do umui mailaia, bona lau Lohiabada dekenai do umui henia, emui harihari gauna idauna ta. Beredi ta ta be paraoa kilogaram rua dekena amo idia karaia gaudia. Mai hatubua gauna danu do umui gabua, bona Lohiabada dekenai do umui henia, ia be koni matamata ena boubou gauna.

¹⁸Bona inai beredi danu, gau haida ma danu do umui henia: Mamoe natuna 7, lagani tamona gaudia, bona boromakau natuna tau ta, bona nani rua do umui henia. Idia ibounai be dika ta lasi gaudia. Idia ibounai be idia gabua ore boubouna lau Lohiabada dekenai do umui henia. Beredi boubouna bona uaina boubouna danu be inai idia gabua ore boubouna danu nega tamona do umui henia. Inai ibounai be bonana namona boubouna lau Lohiabada egu vairana dekenai.

¹⁹Bona umui ese nani tau ta boubouna do umui henia, kara dika kokia totona, ma mamoe tau rua boubouna, lagani tamona gaudia do umui henia. Idia be maino karaia boubouna totona.

²⁰Hahelagaia tauna ese beredi bona mamoe natuna rua be iena imana dekenai do ia davea, idia be lau Lohiabada dekenai boubou gauna. Idia be lau Lohiabada egu gau helagadia, hahelagaia taudia edia aniani gaudia.

²¹Unai dina dekenai danu taunimanima do oi boiria, vadaeni hebou helagana do umui karaia. Unai dina lalonai emui gaukara ta do umui karaia lasi. Emui tubuna ibounai ese inai taravatu be lagani ibounai hanaihanai do idia badinaia, edia noho gabudia ibounai lalonai.

²²“Umui emui uma ena anina umui utua neganai, do umui utua lao lasi ela bona uma ena hetoa korikori dekenai. Bona tano dekenai idia moru kava uma anina gaudia do umui gogoa lasi. Umui rakatanidia, badina idia be ogogami taudia bona idau bese taudia edia. Lau inai Lohiabada, emui Dirava.”

²³Lohiabada ese Mose dekenai ma ia hereva, ia gwau,

²⁴“Israela taudia do oi hamaoroa, oi gwau: Hua namba 7 ena dina ginigunana be laga-ani dinana helagana ta umui dekenai. Inai dina be laloatao dinana, bona umui ese kibi do umui hiriria, unai dina ena hebou helagana dekenai do umui haboua mai totona.

²⁵Unai dina lalonai emui gaukara ta do umui karaia lasi, to aniani idia gabua bouboudia lau Lohiabada dekenai do umui henia.”

²⁶Lohiabada ese Mose ia hamaoroa, ia gwau,

²⁷“Hua namba 7 ena dina namba 10 dekenai be taunimanima edia Kara Dika ena Davana Karaia Dinana. Inai dina dekenai hebou helagana do umui karaia. Umui ese emui lalona do umui giroa, bona aniani idia gabua bouboudia Lohiabada dekenai do umui henia.

²⁸Unai dina dekenai gaukara ta do umui karaia lasi, badina ia be boubou karaia dinana, kara dika ena davana kokia totona.

²⁹Tau ta bema aniani ia ania unai dina dekenai, ia be Dirava ena bese dekena amo do lau negea.

³⁰Bona bema tau ta ese unai dina dekenai do ia gaukara neganai, lau Lohiabada sibona ese do lau alaia mase.

³¹Kamonai! Gaukara ta do umui karaia lasi unai dina dekenai. Inai taravatu be emui tubudia edia latanai danu, lagani ibounai hanaihanai, edia noho gabudia ibounai lalonai.

³²Inai dina be umui emui Sabati laga-ani dinana ta. Inai hua namba 7 ena dina namba 9, dina ia diho negana, ela bona dina namba 10 dina ia diho negana, inai Sabati do umui badinaia. Inai dina lalonai aniani ta do umui ania lasi.”

³³Lohiabada ese Mose ma ia hereva henia, ia gwau,

³⁴“Israela taudia do oi hamaoroa, hua namba 7 ena dina namba 15 be Au Raurau Ruma Maragidia Aria do idia karaia dinana. Dina 7 lalonai inai au raurau ruma maragidia dekenai do idia noho, bona lau do idia laloa.

³⁵Inai dina 7 ena dina ginigunana be hebou helagana totona do umui haboua, bona gaukara ta do umui karaia lasi.

³⁶Inai dina 7 lalonai dina ta ta ibounai lau Lohiabada dekenai boubou, gabua gaudia do umui henia. Bona dina namba 8 dekenai emui hebou helagana do umui karaia, bona boubou, gabua gaudia ma do umui henia lou. Inai dina namba 8 be guriguri dinana sibona, unai dainai emui gaukara ta do umui karaia lasi.

³⁷“Lau Lohiabada egu dina badadia be unai. Inai dina badadia do umui badinaia. Idia be dina helagadia bona hebou helagadia dinadia lau Lohiabada hanamoa totona, emui aniani bouboudia, emui gabua bouboudia, paraoa bouboudia, boromakau bona mamoe bouboudia, bona uaina bouboudia, ta ta edia dina, edia dina dekenai do umui karaia.

³⁸Inai dina badadia be idau, bona pura ta ta Sabati Dinadia danu be idau. Bona inai dina badadia edia boubou gaudia ibounai be idau, emui harihari gaudia, emui gwauhamata bouboudia, bona emui tanikiu henia bouboudia, lau Lohiabada dekenai umui henia noho gaudia be ma idau.

³⁹“Hua namba 7 ena dina namba 15 dekenai, emui uma anina ibounai umui haboua murinai, lau Lohiabada egu Au Raurau Ruma Maragidia aria be dina 7 lalonai do umui karaia, bona lau dekenai do umui laloa noho. Unai aria ena dina ginigunana be laga-ani helaga dinana, ma dina namba 8 danu.