LEVITIKO 23:17-34

¹⁷Emui ruma amo flaoa namo-hereana efa ta ba karoa, karoa ima, bena karoa ta bavabia, ihatubuna muramurana ida ba buloa; bena ba gabua, igabu rua ba kara, davedave boubouna ḡaudia, emui flaoa matamatana amo.

¹⁸Bona flaoa igabudia ida mamoe natudia asi bebeka-bebekadia hitu, laḡani tamona ḡaudia, bona boromakau natuna maruanena ta, bona mamoe mamaruanedia rua, ḡole-oho boubouna ai baela, Iehova ena, flaoa boubouna bona inuinu bouboudia ida; idoinai bonana namo boubouna ai bainela lahi ai, Iehova ena.

¹⁹Kara rea boubouna danu ba henia, nani maruanena ta, bona herohemaino boubouna, mamoe natuna mamaruanedia rua, laḡani tamona ḡaudia.

²⁰Hahelaḡa tauna ese baine davedia, flaoa matamatana bouboudia ida, idoinai, hari mamoe natuna ruaosi ida, davedave boubouna ai bainela, Iehova ena. Idia na Iehova ena ḡau helaḡadia, hahelaḡa tauna ana.

²¹Una dina tamona ai danu taunimanima ba boiridia hebou, emui hebou helaḡana ba karaia; una dina ai ḡaukara badana ta basio karaia. Ina taravatu baine mia hanaihanai, emui uru iboudiai bona emui noho gabudia iboudiai lalodiai.

²²Emui uit eiava emui bali ba utua negana ai, basio utua ela bona emu inoḡo hetoana korikori ai, bona tano ai bae moru anidia basio gogo: bae mia, oroḡami tauna eiava noho-hedoa tauna ana. Lau binai Iehova, emui Dirava.

²³Iehova ese Mose ma e hereva henia, eto,

²⁴Israel taudia ba hamaorodia, baoto: Hua ihahituna dinana gini-gunana na laḡa-ani dinanahelaḡana ta emui, helalo-tao dinana mai kibi ihiriridia, bona hebou helaḡana dinana.

²⁵Una dina ai ḡaukara badana ta basio karaia; a ḡole-ohoboubouna Iehova ba henia.

²⁶Iehova ese Mose e hamaoroa, eto,

²⁷Hua ihahituna dinana ihagwautana na herohemaino dinana: una dina ai emui hebou helaḡana ba karaia, bona ba helalo kerehai, bona ḡole-oho boubouna Iehova ba henia.

²⁸Una dina ai ḡaukara ta basio karaia, lasi vaitani; badina be ia na herohemaino dinana. Iehova emui Dirava ida ba herohemaino una dina ai.

²⁹A tau ta una dina ai basine helalo, ia na ena bese amo bae negea daure.

³⁰Bona tau ta una dina ai baine ḡaukara, lau ese baina hamasea, ena bese taudia bogaragidia amo.

³¹Ḡaukara ta basio karaia, lasi ona lasi vaitani: ina taravatu baine mia hanaihanai, emui uru iboudiai bona emui noho gabudia iboudiai lalodiai.

³²Ina na dina helaḡa badana, emui laḡa-ani dinana badana, bona emui helalo dinana badana: hua dinana ihataurahani-tana ai dina baine diho elabona dina ihagwautana ai dina baine diho ina dina helaḡana ba badinaia.

³³Iehova ese Mose ma e hereva henia, eto,

³⁴Israel taudia ba hamaorodia, baoto: Ina hua ihahituna dinana ihagwauta-imana na kalaga ariana ba matamaia dina hitu lalodiai ba karaia, Iehova ena.