LEVITIKO 22:2-14

²Aaron mai natuna ida taravadia bavatu, idia na Israel taudia edia boubou ḡaudia helaḡadia, lau dekegu ai e mailaidiamu ḡaudia, na bae matauraidia, lau ladagu helaḡana basie hahemaraia: lau binai Iehova.

³Ba hamaorodia, baoto: Emui uru iboudiai lalodiai emui iduhu tauna ta ese Israel taudia edia boubou ḡaudia, e hahelaḡadiamu Iehova ena, baine raka henidia kahi mai mirona ida, una tau be lau vairagu ai bae negea daure. Lau binai Iehova.

⁴Aaron ena iduhu tauna ta lepra eiava enobou gorerena baine davaria, ia ese aniani helaḡadia basine ani ela bona tauna baine ḡoeva. Bona ta ese mase dainai vada e miro ḡauna ta baine daua toho, eiava vesina e arumu tauna ta baine daua toho,

⁵eiava tano ai e raumu ḡauna mirona ta baine daua toho, eiava edena miro edena miro amo vada e hahemiro tauna baine daua toho,

⁶una miro baine daua toho tauna na baine taubu ela bona dina baine diho; bona aniani helaḡana basine ania ela bona ranu ai baine digu.

⁷A dina baine diho, bena baine ḡoeva; una murinai ia ese aniani helaḡana baine ania, badina be ena heubu ḡauna bunai.

⁸E mase kava ḡauna eiava uda boromadia ese e hamasea ḡauna na basine ania, baine miro na garina: lau binai Iehova.

⁹Taunabunai, egu haheḡani bae badinadia; bae tata utu negana ai bae kara dika bona edia kara dika ai bae mase na garina. Lau Iehova ese vada na hahelaḡadia.

¹⁰Idau iduhu tauna ta ese aniani helaḡana basine ania; hahelaḡa tauna ena vadivadi ese basine ania; hesiai tauna mai davana ese basine ania.

¹¹A hahelaḡa tauna ese moni amo e hoia tauna ese baine ania; bona hahelaḡa tauna ena ruma ai hesiai ai e vara tauna ese danu baine ania.

¹²Hahelaḡa tauna natuna hahinena ese idau iduhu tauna ta baine adavaia, ia ese aniani helaḡana, e duduia isi boubouna hidiona, na basine ania.

¹³A hahelaḡa tauna natuna hahinena bema vabu, eiava bema diho, asi natuna, bena tamana ena ruma bema lou henia, unuseni ai bema noho, kekenina negana heḡereḡerena, ia be tamana ana aniani baine ania. A idau iduhu tauna ta basine ania diba.

¹⁴Tau ta ese aniani helaḡana baine ania kava, asi dibana vada e helaḡa dainai, ia ese davana na hahelaḡa tauna baine henia mai ato-kauna ida; ato-kauna na e ania ḡauna bema karoa, karoa ima, benakaroa ta heḡereḡerena ma baine atoa kau.