11 Ia ese mase tauna kahirakahira do ia lao lasi, iena tamana o sinana danu, idia kahirakahira do ia lao lasi, do ia miro garina.
12 Ia ese Helaga Gabuna do ia rakatania lasi, Dirava ena Palai Dubu do ia matauraia lasi garina. Badina be Dirava ena dehoro helagana be iena latanai idia bubua vadaeni, ia be helaga. Lau Lohiabada inai.
13 “Ia ese sihari do ia diba lasi, rami hebou kekeni sibona do ia adavaia.
14 Ia ese vabu, o negea hahine, o lebulebu hahine ta do ia adavaia lasi, to sihari ia do diba lasi kekeni, iena bese dekena amo, sibona do ia adavaia.
15 Unai dekena amo iena natuna be do idia hemarai lasi edia bese taudia edia huanai. Badina be lau Lohiabada ese lau hahelagaia vadaeni, Hahelagaia Tauna Badana.”
16 Lohiabada ese Mose ma ia hereva henia, ia gwau,
17 “Arona do oi hamaoroa, ‘Oiemu natuna o tubuna ta, bema iena tauanina be mai ena dika ta, o gorere ta, ia ese Dirava ena paraoa boubouna be lau Lohiabada dekenai do ia henia lasi. Inai be noho hanaihanai taravatuna.’
18 “Badina be tau ta mai ena tauanina dika ta be egu boubou do ia karaia lasi, iena matana ia kepulu, o bema iena aena ia dika, o bema iena udubaubauna ia makohia, o bema iena ima kwakikwakina o ae kwakikwakina be momo, 5 sibona lasi,
19 o bema iena aena o imana ia makohia,
20 o bema iena doruna ia gageva, o kwadogi herea tauna, o matana ta ia dika tauna, o iena kopina dekenai toto idia noho tauna, o iena abona idia dika tauna.
21 “Arona ena natuna o tubuna tauna ta, bema iena tauanina be mai ena dika ta, ia ese lau kahirakahira do ia raka mai lasi, Lohiabada ena gabua ore bouboudia karaia totona. Iena tauanina be mai ena dika dainai, Dirava ena paraoa do ia henia lasi.
22 Unai tau ese Dirava dekenai henia paraoa ia ania diba, helaga gauna, bona helaga herea gauna danu.
